Əvvələn, son 200 il ərzində dünya əhalisinin sayı bir neçə dəfə artaraq, 7 milyard nəfərə yaxınlaşır. Bu amil, şübhəsiz təkrar istehsal prosesinin əvvəlki dövrlərə nisbətən müvafiq surətdə artırılmasını tələb edir ki, cəmiyyət üzvlərinin artmaqda olan ehtiyaclarını ödəmək mümkün olsun. İnsanların maddi-mənəvi tələbatlarının yalnız kəmiyyətcə deyil, həm də keyfiyyətcə yüksəldiyi nəzərə alınarsa, istehsalın geniş təkrar prosesi istiqamətində genişləndirilməsi zərurəti aydın olar. Sonra, geniş təkrar istehsalın daha yeni və mükəmməl maddi-texniki baza əsasında, səmərəli yollarla həyata keçirilməsi elmi-texniki fikrin inkişafını, habelə bu işə xeyli vəsait yönəldilməsini tələb edir. Elm və texnikanın nəzəri müddəalarınınpraktik nəticəsi olan yeni istehsal vasitələrini, maşınları, dəzgahları, avadanlıqları, texnoloji prosesləri idarə etmək üçün ixtisaslı, peşəkar kadrlar hazırlamaq lazım gəlir. Daha sonra, geniş təkrar istehsal prosesi müvafiq infrastruktura və xidmət dairəsinin (nəqliyyat, ticarət, səhiyyə, kommunal təsərrüfatı, digər xidmətlərin) formalaşdırılmasını zəruri bir şərt kimi irəli sürür. Daha sonra,ölkənin milli təhlükəsizliyinin (ərzaq və hərbi) təmin edilməsi, habelə bununla yanaşı digər problemlərin həlli, geniş təkrar istehsal prosesinin cəmiyyətin müasir inkişaf səviyyəsində nə qədər vacib olduğunu göstərir. Nəhayət, müasir inteqrasiya prosesləri və vahid dünya təsərrüfat sisteminin formalaşdığı, bəşəriyyətin qlobal problemlərlə üzləşdiyi bir şəraitdə, nəinki milli iqtisadiyyatlar, habelə planet miqyasında geniş təkrar istehsal prosesini ictimai əmək bölgüsü və kooperasiya təməlində həyata keçirmək tələb olunur.
