Nəşriyyat və redaksiya adları. Məlumdur ki, qəzet və nəşriyyat adları ideonimlərə daxildir. Lakin qəzet və jurnal redaksiyalarının adları erqonimlərin tərkibində öyrənilir. Bəzi tədqiqatçılar bölgüdə nəşriyyat və redaksiya adlarını ideonimlərə aid edirlər. Fikrimizcə, bu yanlış fikirdir. Çünki, nəşriyyat və redaksiya dedikdə maddi mədəniyyət nəzərdə tutulur. İdeonimlər isə mənəvi mədəniyyətlə bağlı olan adlardır. Ona görə də, bunları qarışdırmaq lazım deyil. Bəzən qəzet və jurnal adları ilə redaksiyanın adı eyni olur. Məsələn, “Kirpi” jurnalının redaksiyası, “Azərbaycan” jurnalının redaksiyası və s.[3, s.139]. Bundan başqa respublikamızda bir çox nəşriyyat evləri fəaliyyət göstərir. “Qərb-Şərq” nəşriyyatı, “Nurlan” nəşriyyatı, “Elm” nəşriyyatı, “Elm və təhsil” nəşriyyatı, “Azərnəşr”(Azərbaycan Dövlət Nəşriyyatı), “Gənclik” nəşriyyatı, “Öyrətmən” nəşriyyatı, “Maarif” nəşriyyatı, “Adiloğlu” və s.
