EKOSİSTEMLƏRİN TƏSNİFATI. Ekosistemlər əmələgəlmə səbəbinə görə iki qrupa ayrılır: təbii ekosistemlər və antropogen ekosistemlər. Təbii ekosistemlər (çay, göl, dəniz, kolluq, me-şə, çəmənlik və s.) milyon-milyon illərdə təbii seçmənin sınağından çıxıb təkamül etməklə əmələ gəlirlər. Ona görə də tərkibinə görə çox zəngin və davamlı olurlar. Lakin, antropogen ekosistemlər (kanal, tarla, bağ, park, üzümlük və s.) insan tərəfindən qısa müddətdə yaradılır, tərkibi kasıbdır, ömrü qısadır, daima qayğı tələb edir, tez dəyişir. Ekosistemin dayanaqlığı onun böyüklüyündən və üzvlərinin çoxluğundan asılıdır. Məsələn, ekosistemdə produsent orqanizm 2-4 növ olanda onun ömrü az, 200- 500 növ olanda isə ömrü uzun olur. Konsumentlər və redusentlər bu prinsipə tabedirlər. Kiçik bir hövzə ekosisteminə nisbətən göl, ona nisbətən dəniz, dənizdən okean, ondan da bütün hidrosfer ekosistemi böyük və dözümlüdür. Biosfer ən böyük və ən çox dözümlü ekosistem hesab edilə bilər.
