Məlumatın predmetinə yönələn yekunlaşdırıcı nəticə ritorik ənənəyə uyğun olaraq hadisənin sxemini təkrar edən nəticə kimi müəyyən edilir. Bəzən belə nəticəyə kəskin ehtiyac hiss oluna bilər – xüsusən də əsas hissə fabulyar olaraq, daha doğrusu xətti sxemə uyğun olmayaraq qurularsa bu ehtiyacı duymaq olar.
Əsas hissə belə qurularkən dinləyicilər aydın şəkildə hadisənin strukturunda nizam yaratmağa, "nəyin nədən sonra baş verdiyini" izləməyə ehtiyac duyurlar. Əgər onlar "həyatın məntiqinə" deyil, danışanın məntiqinə uyğun olaraq əsas hissədə hadisəyə dair informasiya alıblarsa, onların şüurunda bu nizam yaranmaya da bilər.
Və əksinə, əgər onlar "həyatın məntiqinə" uyğun olaraq hadisələrə dair informasiya alsalar, onda onlar müəllifin şərhinə ehtiyac hiss edəcəklər (danışan hadisə ilə niyə maraqlanır, burada ən mühüm aspektlər kimi hansı məqamları fərqlənir və s.). Beləliklə, istənilən halda nəticə əsas hissə ilə elə əlaqələndirilə bilər ki, bundan həm "predmet" (hadisə), həm də dinləyicilər fayda götürər. Əlbəttə, bunun üçün yekunlaşdırma proseduru düzgün həyata keçirilməlidir.
Məsələn, mən məlumatın predmeti istiqamətində "Alisa möcüzələr ölkəsində" kitabını yekunlaşdırarkən, yəqin ki, Alisanın kim olduğunu və onun möcüzələr ölkəsinə necə gedib çıxdığına dair yığcam sürətdə məlumat verməliyəm, onun möcüzələr ölkəsində hərəkətinin əsas "məqamlarını" və onun yolda rast gəldiyi əsas fiqurları qeyd etməliyəm, onun evə qayıtmasını da qısaca olaraq təsvir etməliyəm.
Məlumatın predmetinə yönəlmiş yekunlaşdırma proseduru xülasənin işlənilib hazırlanması proseduruna oxşardır və əslində eyni qaydalar əsasında qurulur. Bu qaydalar aşağıdakılardır:
- faktı faktın qiymətləndirilməsi ilə (daha doğrusu obyektiv olanı subyektiv olan ilə) qarışdırmaq olmaz;
- mühüm olanı təsadüfi olanla qarışdırmaq olmaz;
- predmet sahəsinin sərhədlərini genişləndirmək/daraltmaq olmaz;
(daha doğrusu mənzərəyə yeni məlumatlar əlavə etmək və ya zəruri olan əvvəlki məlumatlardan hər hansı birini nəzərdən qaçırmaq olmaz)
- ilkin olaraq formulə edilənləri həddindən artıq güclü şəkildə dəyişdirmək olmaz;
- kənara çıxmaq olmaz;
Bu yekunlaşdırma növündən fərqli olaraq məlumatın strukturuna yönəlmiş yekunlaşdırma hadisənin özünün sxemini deyil, onun haqqında olan məlumatın məntiqi sxemini təkrar etməyi nəzərdə tutur. Bu çox faydalı ola bilər, çünki məsələn, mürəkkəb struktura malik oaln məlumat bir dəfə səslənməklə dinləyicilərin yaddaşında qalmaya da bilər.
Əgər kompozisiyada «izahatın – əsaslandırmanın fraqmenti», «izahatın – əsaslandırmanın digər fraqmenti» və s. kimi məqamlar daim bir-birini əvəzləyirsə nəticə mərhələsində bu məqamlardan hansının danışan üçün daha çox əhəmiyyət kəsb etdiyini dinləyicilərə göstərmək lazımdır. Bunun üçün məlumatın strukturuna yönəlmiş yekunlaşdırıcı nəticədə məlumatın konstruksiyanın ən ümumi cəhətləri, həmçinin burada işlənən arqumentlərin ardırıcıllığı və s. təkrar edilə bilər.
Məsələn, «Alisa …» kitabının məzmununu məlumatın strukturu istiqamətində ümumiləşdirərək, mən Alisanı 12 fəsildən ibarət olan kitabın əsas qəhramanı kimi qasıca olaraq təqdim etməliyəm; hər bir fəsildə qəhrəmanın möcüzələr ölkəsindəki sərgüzəştlərindən bir epizod təsvir edilib. Daha sonra kitab üçün mühüm əhəmiyyət kəsb edən fəsilləri – məsələn, 1, 3, 8, 11, 12 (Alisanın kraliça ilə qarşılıqlı əlaqələr təsvir edilən) seçib ayırmaq və bu fəsillərdə baş verənlər haqqında qısaca məlumat vermək lazımdır. Təbii ki, bu zaman mən bu fəsillərin tamın tərkibindəki yerini (əvvəldə, ortada, axırda) göstərməli olacam.
Məlumatın strukturuna yönəlmiş yekunlaşdırmanı annotasiya vermə ilə eyniləşdirmək olar. Annotasiya prosesi hadisəyə dair informasiyanın verilmə ardıcıllığı və həcmi barəsində qısa xülasəni nəzərdə tutur və müəyyən qaydalara tabedir:
- məlumatın strukturunun ümumi zəruri xarakteristikasını yaddan çıxarmamaq;
- məlumatın strukturunu çıxış zamanı dəyişdirməmək;
- bir hissədən digərinə keçid zamanı əsaslandırmanı nəzərdən qaçırmamaq.
Bir daha xatırladaq ki, burada yalnız yekunlaşdırma istiqamətində oriyentirlər göstərilib. Aydın məsələdir ki, məzmunu yekunlaşdırarkən məlumatın komponentlərinin adlandırılmasından qaçmaq çətindir. Bundan başqa, xülasə üçün irəli sürülən tələblər annotasiyaya yanaşmada düzgündür. Əsas məsələ danışanın hansı növ yekunlaşdırmaya üstünlük verməsidir.
Dostları ilə paylaş: |