GÖRƏSƏN ŞƏHVƏT BƏYƏNİLMİR?
Yemək, içmək, geyinmək, mənzil əldə etmək, minik, evlənmək, var-dövlət toplamaq və dünya vəzifələrinə meyl etmək kimi nəfsani istəklərə və heyvani ləzzətlərə şəhvət deyilir.
Şübhəsiz ki, bunlar insanın yaşayışı üçün zəruri olan işlərdir. Yəni əgər bunlar olmasa, insanın yaşayışı qeyri mümkündür. Bir tərəfdən Allah-Təala bunları insan üçün zəruri qərar vermiş, digər tərəfdən də bu şeyləri məzəmmət etmişdir. Bunu necə başa düşmək olar? Sözün qısası, bunlar bəşərin zatına qoyulmuş təbii, fitri və hətta onun ixtiyarından kənarda olan işlərdir. Eyni zamanda insanın nəfsani meyllərinə aid olduğlarına görə, onların ixtiyarı bəşərin öz əlində deyildir. Belə olan halda bunlar insanın təklifinə necə aid ola bilər?
BU ƏMRLƏRDƏ MƏZƏMMƏT VƏ QADAĞAN OLUNAN ŞEY, ONLARI İSTİFADƏ ETMƏKDƏ QAYDA-QANUNA RİAYƏT ETMƏMƏKDİR
Bu işlər heç vaxt məzəmmət və nəhy olunmur, bunların hamısı İlahi şəriətin bəyənilmiş qanunları əsasındadır. Amma məzəmmət və nəhy olunan şey, bunlardan istifadə etməkdə ifrat və təfritə varmaqdır. Yəni, bu işlərdə halal və harama riayət etməməkdir.
Əgər insan bu şeyləri qəlbinə salıb onları özü üçün hədəf qərar versə, Allah və axirəti sevməkdən əl çəkib, insaniyyət kamalına çatmaqdan qafil olacaqdır.
Bəyənilməyən və məzəmmət olunan şey, məhz elə budur. Yəni, məzəmmət və nəhy olunan şey, insanın bu şeylərə qarşı tutduğu düzgün olmayan mövqeyidir.
Dostları ilə paylaş: |
