Azərbaycan Milli Elmlər Akademiyası Milli Azərbaycan Tarixi Muzeyi

6. İndiki İstiqlaliyyət küçəsi.

7. Ali Sovet – Azərbaycan Sovet Sosialist Respub­li­ka­sının ali qanunvericilik orqanı. 1950-60-cı illərdə keçmiş H.Z.Tağıyevin qız məktəbinin binasında yerləşirdi. Hal-ha­zırda binada AMEA M.Füzuli adına Əlyazmalar İnstitutu, Azərbaycan Respublikası Prezidenti yanında Ali Attes­tasiya Komissiyası və Hüseyn Cavidin ev-muzeyi yerləşir.

8. Məryəm Sulkeviç (1861-1917) – maarifçi-pedaqoq, ictimai xadim. Aleksandrinski qız məktəbində müəllim, müdir, daha sonra 1-ci rus-Azərbaycan qız məktəbində mü­əll­im işləmişdir. Maarif sahəsində xidmətlərinə görə 1907-ci ildə “Səyinə görə” yazısı olan və Stanislav lentində sinəyə taxılan gümüş medalla təltif olunmuşdu. Bakı Müsəlman Qadın Xeyriyyə Cəmiyyətinin üzvü idi.

9. Həbib bəy Mahmudbəyov (1864-1928) - maarif xadimi, Bakıda ilk xüsusi rus-tatar (Azərbaycan) məktə­binin yaradıcılarından biri. Bakı şəhər dumasında məktəb komissiyasının üzvü olmuşdur. 1921-1927-ci illərdə Ali Pedaqoji İnstitutda direktor müavini işləmişdir.

10. Məhəmməd Hafiz Şeyxzadə (Əfəndizadə) (?-?) – Azərbaycanda qadın təhsilinin qoyulması işində böyük rol oynamışdır. Şəkidə dərs dediyi “Darüssüada” məktəbinin nəzdində 1894-cü ildə qızlar üçün ayrıca bir sinif açmışdı. Məktəb 4 il fəaliyyət göstərmişdir. M.H.Şeyxzadə Şamaxıya köçdüyü üçün məktəb də işini dayandırmalı olmuşdur. 1902-ci il Şamaxı zəlzələsindən sonra Bakıya köçmüşdü. Tağı­yevin qız məktəbində ilk təhsilini almış, sonralar gör­kəmli maarif xadimi olmuş Şəfiqə Əfəndizadənin atasıdır.

11. Ömər Faiq Nemanzadə (1872-1937) - maarif və mətbuat xadimi, publisist. İstanbulda, Şəkidə, Şamaxıda müəllim işləmişdir. “Şərqi-rus”, “Həyat” qəzetləri, “Molla Nəsrəddin” jurnalı və digər mətbuat orqanları ilə fəal əmək­daşlıq etmiş, Cəlil Məmmədquluzadə və Məşədi Ələsgər Bağırovla birgə “Qeyrət” mətbəəsinin yaradıcısı olmuşdur.

12. “Nicat” Bakı müsəlman maarif cəmiyyəti – 1906-cı ildə fəaliyyətə başlamış mədəni-maarif cəmiyyəti. Cəmiy­yətin əsas məqsədi azərbaycanlı əhali arasında maarifı yay­maq, orta və ali təhsil müəssisələrinin ehtiyacı olan tələbə­lərinə maddi yardım göstərmək, həmçinin Azərbaycan dili­nin və ədəbiyyatının, milli teatr sənətinin inkişafına kömək et­mək idi.

13. “Səfa” mədəni-maarif cəmiyyəti - 1912-1920-ci illərdə Bakıda fəaliyyət göstərmişdir. Məqsədi çoxsaylı baxım­­sız uşaqları təhsilə cəlb etmək, əhalinin yoxsul təbə­qəsinə tibbi yardım göstərmək, xalqın mədəni səviyyəsini yüksəltməkdən ibarət idi.

14. “Səadət” - 1907-ci ildən Bakıda fəaliyyət göstərən müsəlman xeyriyyə cəmiyyəti. Cəmiyyətin yaranması və fəaliyyətində H.Z.Tağıyevin böyük rolu olmuşdur. “Səadət” cəmiyyəti köhnə üsullu məktəb və mədrəsələrin yenidən qurulmasına, təkmilləşdirilməsinə, onların yayılmasına, kitabxanalar, qiraətxanalar açılmasına çalışırdı.

15. Əlisgəndər Cəfərov (1875-1941) - ictimai və maarif xadimi, naşir, mühərrir. 1897-ci ildən Bakının təhsil müəssisələrində müəllim işləmiş, 1906-1918-ci illərdə “Nəşri-maarif” cəmiyyətində katib olmuşdur. Azərbaycanda ana dilində müstəqil uşaq mətbuatının yaranması Ə.Cəfərovun adı ilə bağlıdır. O, “Dəbistan” adlı ilk pedaqoji jurnalın (1906-1908) naşiri və mühərriridir.