Pul-kredit siyasətinin ölkənin istehsal həcminə və inflyasiyaya təsiri.
Sxemdən aydın olur ki, FES-nin ölkədə iqtisadi fəallığa təsir göstərmək və inkişafın qeyri-sabitlik meyllərini tənzimləmək üçün həyata keçirdiyi tədbirlər sistemi hansı konkret nəticələrə gətirib çıxara bilir. Əvvələn,məcburi ehtiyat normasının (1) dəyişdirilməsi, ölkədə pul təklifinə və tədavüldəki pul kütləsinin həcminə (2) təsir edəcəkdir. Sonra,bu dəyişiklik bank faiz dərəcələri və kredit şərtlərinin (3) konkret vəziyyətdən asılı olaraq, enib qalxması ilə nəticələnəcəkdir. Daha sonra,bank faiz dərəcələrindəki enib-qalxmalarla bağlı, investisiyaların həcminin və digər xərclərin dəyişməsi, öz növbəsində ümumi (məcmu) tələbə (4-AD) müsbət yaxud mənfi istiqamətlərdə təsir göstərəcəkdir. Nəhayət,bütövlükdə iqtisadiyyatda zəncirvari şəkildə baş verən bu proseslər ölkədə istehsalın həcminə, məşğulluğun və inflyasiyanın səviyyəsinə bilavasitə yaxud dolayı yollarla təsir edəcəkdir. Kommersiya banklarıölkənin bank sisteminin ikinci pilləsini təşkil edərək, Mərkəzi Bankın (Milli Bankın) ümumi nəzarəti altında fəaliyyət göstərirlər. Bazar münasibətləri iqtisadi sistemi şəraitində bu banklar öz müştəriləri olan fiziki və hüquqi şəxslərlə qarşılıqlı münasibətlərini müəyyən mənfəət əldə etmək prinsipi, habelə risk əsasında qururlar. Kommersiya bankları malik olduqları pul resursları və müəyyən faizlə Mərkəzi Bankdan borc götürdükləri vəsait hesabına müştərilərinə müxtəlif təyinatlı xidmətlər göstərirlər. Bu bankların fəaliyyəti əsas 3 istiqamət: a) passiv əməliyyatlar (vəsaitlərin cəlb olunması), b) aktiv əməliyyatlar (vəsaitlərin yerləşdirilməsi, kreditə verilməsi), c) kommersiya-vasitəçilik əməliyyatları üzrə aparılır. Onların əməliyyatları arasında bank xidmətləri mühüm yer tutur. Həmin xidmətlərə xarici valyuta ilə əməliyyatlar, qiymətli kağızların yerləşdirilməsi və saxlanması, müştərilərin etimadnaməsi əsasında onların kapitalının, əmlakının idarə edilməsi, habelə sairə daxildir. Kommersiya bankları öz əməliyyatlarını nağd və qeyri-nağd, yəni köçürmə hesablaşmaları yolu ilə həyata keçirirlər. Müxtəlif ölkələrdə kommersiya banklarının geniş şəbəkəsi fəaliyyət göstərir. Məsələn, ABŞ-da 8000-ə yaxın, Rusiyada 1500-dən çox, Azərbaycan Respublikasında 40-a qədər kommersiya bankı bazar münasibətləri iqtisadi sisteminin tərkib hissəsi kimi müxtəlif fiziki və hüquqi şəxslərə xidmətlər göstərirlər. Son dövrdə kredit birlikləri və əmanət qurumlarının qovuşması prosesi getdiyindən, onların ümumi sayının azalması, habelə ölkənin məcmu maliyyə aktivlərində xüsusi çəkisinin aşağı düşməsi meyli nəzərə çarpır. Kommersiya bankları ənənəvi xidmət növləri ilə yanaşı, nisbətən yeni sayılan və müasir dövrün tələblərinə cavab verən lizinq, faktorinq, farfeytinq, trastkimi kreditləşdirmə formalarının dairəsini getdikcə genişləndirirlər.