Tədqiqatın obyekti və predmeti: Tədqiqatın obyektini Azərbaycan dilində müşahidə olunan ktematonimlər, predmetini isə ktematonimlərin leksik-semantik xüsusiyyətlərinin, etimoloji və üslubi cəhətlərinin, qrammatik quruluşlarının və ümumiyyətlə, linqvistik xüsusiyyətlərinin təhlili təşkil edir.
Tədqiqatın məqsəd və vəzifələri. Dissertasiya işinin qarşısına ktematonimləri sistemli şəkildə tədqiq etmək, onomastik leksikada yerini və vəzifəsini linqvistik baxımdan müəyyənləşdirmək məqsədi qoyulmuşdur. Əsərdə ktematonimlərin ayrı - ayrı qrupları araşdırılmış, onların linqvistik izahı dilçilərin gəldiyi nəticə aspektində konkretləşdirilmişdir. Ktematonimik vahidlərin bir qismini apelyativ leksika əsasında, bir qisminin xalqın həyat tərzi, adət-ənənəsi ilə bağlı şəkildə aydınlaşdırmaq dissertasiyanın qarşısında duran məqəd və vəzifələrdəndir.
Qeyd olunan məqsədə çatmaq üçün qarşıya aşağıdakı vəzifələr qoyulmuşdur:
a) Ktematonimləri bölgü üzrə təsnif etmək, konkret hansı sərhədi əhatə etdiyini dəqiqləşdirmək;
b) Erqonimlərin (idarə, müəssisə, təşkilat adları) linqvistik xüsusiyyətlərini təhlil etmək;
c) Xrematonimlərin (maddi-mədəniyyət əşyalarının adları) leksik-qrammatik və semantik xüsusiyyətlərini izah etmək;
ç) İdeonimlərin (elm, mədəniyyət, bədii ədəbiyyat bağlı əsər adları) adlandırılmasında mövcud olan prinsipləri müəyyənləşdirmək;
d) Xrononimlərə (əlamətdar gün, tarixi hadisə, bayram adları) xas xüsusiyyətlərinə münasibət bildirmək;
e) Ktematonimlərin bədii üslubda mövqeyini açmaq, rolunu müəyyənləşdirmək;
ə) Ktematonimlərin yaranma yollarını aydınlaşdırmaq;
f) Orfoqrafik xüsusiyyətlərini nəzərdən keçirmək;
g) Ktematonimləri linqvistik baxımdan bütün səviyyələrdə təhlil etmək.
Yuxarıda sadalanan bu vəzifələrin yerinə yetirilməsi Azərbaycan onomalogiyası ilə bağlı bir sıra məsələləri aydınlaşdıracaqdır.
Dostları ilə paylaş: | 
