Sahibkar – firmanın təşkili və idarə edilməsi riskini və məsuliyyətini öz üzərinə götürən şəxs (qrup insan)dır. Sahibkarlıq fəaliyyət növüdür və 3 əsas növə ayrılır:
Fərdi sahibkarlıq – bu bir şəxsin və onun ailəsinin yaradıcı fəaliyyətidir (ticarət köşkü, böyük olmayan aptek, kimyəvi təmizləmə və s. yaratmaq). Bu halda asanlıqla müəyyən etmək olar ki, riskə gedən, məsuliyyəti öz üzərinə götürən, idarə edən kimdir.
Kollektiv sahibkarlıq – hər hansı bir kollektiv birgə sahibkarlıq fəaliyyəti ilə məşğul ola bilər. Bu cür sahibkarlıq mülkiyyət payı əsasında yaradılmış firmalarda həyata keçirilir. Burada riski, məsuliyyəti, qərarların qəbulunu bir qrup şəxs öz üzərinə götürür (yoldaşlığın, səhmdar cəmiyyətin üzvləri).
Dövlət sahibkarlığı– dövlət müəssisələrində həyata keçirilir. Ancaq burada təsərrüfat rəhbərinin təşəbbüsü yuxarı orqanların əmr və göstərişləri ilə məhdudlaşdırılır.
Azərbaycan qanunvericiliyinə görə sahibkarlıq fəaliyyəti vətəndaşların müstəqil təşəbbüskarlıq fəaliyyəti olub, mənfəət götürməyə istiqamətləndirilmişdir. Bu fəaliyyət müəyyən təşkilati-hüquqi formada, yəni müəssisə (firma) formasında həyata keçirilir.
İqtisadi ədəbiyyatlarda sahibkarların üç funksiyası göstərilir:
Birinci funksiya resurslar əldə etməkdir. İstənilən təsərrüfat fəaliyyəti üçün istehsalın obyektiv amilləri (istehsal vasitələri) və subyektiv, şəxsi amili (iş görməyi bacaran işçilər) olmalıdır. İkinci funksiya – təşkilatçılıq funksiyasıdır. Sahibkar istehsal amillərinin elə birləşdirilməsi və kombinasiyasını təşkil etməlidir ki, öz məqsədinə çatmağı təmin etsin. Üçüncü funksiya – yaradıcılıq funksiyasıdır. Bu təşkilati-təsərrüfatçılıq novatorluğu ilə bağlıdır. Sahibkarın bu funksiyası müasir elmi-texniki tərəqqi və qeyri-qiymət rəqabətinin gücləndiyi bir zamanda daha da artmışdır.
Sahibkar mikroiqtisadiyyatda əsas iqtisadi agentdir. Sahibkarların başlıca məqsədi əmtəə və xidmətləri istehsal etmək, reallaşdırmaq və mənfəət əldə etməkdir. O, bilavasitə istehsalla məşğul olur, maddi nemətlər və xidmət məhsulları istehsal edir. Bazar iqtisadiyyatı şəraitində sahibkarlıq fəaliyyəti azaddır.
