Becərilmə texnologiyası. Növbəli əkinlərdə zirənin daha yaxşı sələfləri payızlıq dənli taxıl
bitkiləri və dənli-paxlalılardır.
Torpağın becərilməsi və gübrələmə sistemi cirədə olduğu kimidir.
Zirəni erkən yazda gencərgəli, cərgəarası 45 sm olmaqla səpirlər.
Zirə əkinlərinə qulluq işləri kəltənləri xırdalanması və alaq otlarının məhv edilməsi üçün
cərgəaralarının becərilməsidir. Bundan əlavə həyatının birinci ili şaxtadan qorunmaq üçün payızda
yüngülvarı dibi doldurulur, lakin ikinci ili erkən yazda cərgələrə köndələn istiqamətdə malalanır.
Meyvələr 60% qonurlaşdıqda zirə yığılır. Məhsulun yığılması birbaşa taxıl yığan
kombaynlarla həyata keçirilir.
Saxlayarkən toxumun nəmliyi 12%-dən yüksək olmamalıdır.
21.2.4. Nanə Əhəmiyyəti, yayılması və məhsuldarlığı. Nanə yarpaq almaq üçün becərilir. Yarpağın
tərkibində 1,5%-dən 3,5%-ə qədər nanəli efir yağı vardır. Ondan tibdə, ətriyyatda və qənnadı
məmulatları istehsalında istifadə olunur. Adi nanənin yarpaq və çiçək qrupunun tərkibində 40-65%,
çöl nanəsində isə 50-70% mentol olan nanə efir yağı var. Nanənin yerüstü hissələrindən nanə yağı,
nanə cövhəri və s. hazırlanır. Tibdə nanə yarpaqlarından hazırlanan cövhərdən ürəkbulanmasında və
ödqovucu dərman kimi istifadə edilir. Nanə yağı aromatik maddə kimi ətriyyat-kosmetika
sənayesində istifadə olunur. Nanə yağı diş tozu və diş pastasının tərkibinə əlavə edilir.
Azərbaycanda qədim zamanlardan nanədən həm təzə, həm də qurudulmuş halda istifadə
olunur. Nanə bir çox Qafqaz o cümlədən Azərbaycan xörəklərinə (ət, xəmir, tərəvəz və s.) qatılır.
Nanədən çəkilən nanə cövhəri mədə-bağırsaq xəstəliyində faydalı dərman sayılır.
Azərbaycan Respublikasında nanənin beş növü məlumdur. Becərilən əsasən adi nanədir. Quru
yarpağın məhsuldarlığı hektardan 7-10 sentnerə çatır.
Botaniki təsviri və bioloji xüsusiyyətləri. Nanə - Dodaqçiçəklilər -
