I mövzu: Mədəniyyətşünaslığın predmeti Plan: Mədəniyyətşünaslığın elm kimi formalaşması

I mövzu: Mədəniyyətşünaslığın predmeti

Plan:

1. 
   Mədəniyyətşünaslığın elm kimi formalaşması;
   
2. 
   Mədəniyyətşünaslığın predmeti və obyekti;
   
3. 
   Mədəniyyətşünaslığın vəzifə, məqsədi və səviyyələri;
   
4. 
   Mədəniyyətşünaslığın digər elmlərlə əlaqəsi;
   
5. 
   Müasir elmdə mədəniyyət anlayışına yanaşmalar.
   

I

Bəşəriyyətin qədimdən müasir dövrədək keçdiyi tarixi yol mürəkkəb və ziddiyyətli idi. Bu yolda tərəqqi və tənəzzül hadisələri, yeniliyə can atma və adət edilən həyat tərzinə sadiq qalma, dəyişikliklər etmək arzusu və keçmişin ideallaşdırılması bəzən birləşirdilər. Bu zaman insanların həyatında mədəniyyət başlıca rol oynayırdı, o, insanlara daima dəyişən həyat şəraitinə uyğunlaşmağa, onun mənasını və məqsədini tapmağa, insanda insaniyyətin qorunub saxlanmasına kömək edirdi. Bu səbəbdən də insanlar həmişə ətraf aləmin bu sahəsilə maraqlanmış və nəticədə biliyin xüsusi sahəsi olan, mədəniyyəti öyrənən mədəniyyətşünaslıq meydana gəlmişdir. Mədəniyyətşünaslıq ilk növbədə mədəniyyət haqqında elmdir.