Galata'da, Haseki Sultan evkafına ait evin, burada mektep ve çeşme yapmak isteyen Gümrük emini Hasan'ın mülk evi ile istibdaline dair hüküm

16/268/1280 İstanbul'da, geçimliği olmayan Şeyh Nezir'e, Sultan Süleyman vakfı mahlulünden yemek ve on akçe vazife verilmesine dair hüküm.

İstanbul'da Sultân Süleymân mütevellîsine hüküm ki:

Şeyh-i şehîr Nezîr gelüp bu garîbü’d-diyâr(?) ve mahall-i merhamet olup medâr-ı ma‘işeti olmamağla düşen mahlûlden iki çift mükemmel ta‘âm ve on akçe vazîfe mahall ve müstehıkk olan mûmâ ileyhe tevcîh olınmak içün arz eylemen içün yazılmışdur.

Fî evâsıt-ı N sene [1]103 [27 Mayıs-5 Haziran 1692]

16/275/1310 İstanbul'da, Sultan Süleyman vakfından düşen ilk mahlulden talebeden olan Mehmed'e aş ve fodula verilmesine dair hüküm.

İstanbul'da Sultân Süleymân Hân evkãfı mütevellîsine hüküm ki:

Talebe-i ulûmdan Mehmed nâm kimesne gelüp mezkûr tâlib-i ilm olup geçinmekde iktidârı olmamağla müşârun ileyhün imâret-i âmiremden almak üzre ibtidâ düşen mahlûlinden iki aş ve iki çift fodula virilmek bâbında hükm-i hümâyûnum recâ eyledüği ecilden vech-i meşrûh üzre düşen mahlûlden virilmek içün yazılmışdur.

Fî evâsıt-ı N sene [1]103 [27 Mayıs-5 Haziran 1692]

16/275/1314 Yusuf Efendi evkafına ait Beşiktaş'a bağlı Kuruçeşme köyündeki evin kiracısı Yahudi ve vakıf arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Heryas(?) nâm yehûdî gelüp Galata kazâsı muzâfâtından Beşiktaş'a tâbi‘ Kurıçeşme nâm karyede vâkı‘ Yûsuf Efendi evkãfı akãrâtından mutasarrıf olduğı menzil (kesik) icâresi hâssa mi‘mâr ma‘rifetiyle şer‘le keşf ve mahall (kesik) temessük taleb eyledükde celb-i mâl içün (kesik) bildürüp hükm recâ itdükde yedinde olan (kesik) alıvirilüp hilâf-ı şer‘ (kesik)

Fî evâsıt-ı N sene [1]103 [27 Mayıs-5 Haziran 1692]

16/278/1325 İstanbul'da, Cameşûy vakfına olan borcunu ödeyen zimmi ve bundan ayrıca ribâ namına aldığı paradan tatmin olmayan mütevelli arasındaki ihtilafın ilgili kadılıkta görülmesine dair hüküm.

İstanbul kãimmakãmına ve monlâsına hüküm ki:

Kosti nâm zimmî gelüp İstanbul'da vâkı‘ Câmeşûy vakfı mütevellîsine Çoban oğlı Ohan zimmî kefâletinde bir mikdâr (silik) sahîhden şer‘an lâzım geleni virüp kusûrı yoğiken mezbûr bilâ mesâğ-ı şer‘î ribâ nâmına iki yüz yetmiş guruş alduğından mâ‘adâ (silik) hâlî olmayup ve fetvâ-yı şerîfesi olmağla yazılagelen uslûb üzre vakfa mu‘âmele sûreti yazılmışdur.

Fî evâsıt-ı N sene [1]103 [27 Mayıs-5 Haziran 1692]

RAS16VF05

RAS17VF06
17/1/2 İstanbul'da, Şeyh Vefa yakınındaki Recep Paşa evkafına ait yanan odaların emsal kiralarını vermeğe razı olan kiracılar ve bunları ziyade kira talebiyle rahatsız eden vakıf mütevellisi arasındaki ihtilafın ilgili kadılıkta görülmesine dair hüküm.

İstanbul kãdîsına hüküm ki:

Mahmiyye-i mezbûrede Şeyh Vefâ kurbında vâkı‘ müteveffâ Receb Paşa evkãfından olan odaları harîkde muhterik olmağla ecr-i misle mu‘âdil icârelerin virmeğe râzîlar iken vakf-ı merkúm mütevellîsi (boş) nâm kimesne ziyâde talebiyle te‘addî eyledüğin ve fetvâ-yı şerîfe virildüğin bildürüp fetvâ-yı şerîfeleri mûcebince amel olınup hâssa mi‘mârbaşı ma‘rifetiyle şer‘le keşf olınup ecr-i mislinden ziyâde talebiyle te‘addî olınmamak içün yazılmışdur.

Fî evâil-i B sene [1]105 [26 Şubat-7 Mart 1694]

17/2/8 İstanbul'da, Cebecibaşı mahallesindeki vakfedilen eve mahkeme kararı gereği mutasarrıf olan şahsa karşı vakfedenin azatlıları evladından olmak iddiasıyla vaki müdahalenin önlenmesine dair hüküm.
İstanbul kãimmakãmına ve kãdîsına hüküm ki:

El-Hâcc Mustafâ gelüp bundan akdem Mehmed nâm kimesne mahrûse-i İstanbul'da Cebecibaşı mahallesinde vâkı‘ ma‘lûmu’l-hudûd mülk menzilini tescîl-i şer‘î ve teslîm ile’l-mütevellî birle vakf ve süknâsını evvelen kendü nefsine ba‘dehû evlâdına ve evlâd-ı evlâdına ve ba‘de’l-inkırâz utekãsına ve evlâd-ı utekãsına ve ba‘de’l-inkırâz bir recul-i sâlih[e] şart eyleyüp vech-i meşrûh üzre vakfiyyeti vakfiyye-i ma‘mûlün bihâsında mukayyed olup menzil-i merkúma meşrûtiyyet üzre mutasarrıf olanlar bi’l-külliyye münkarız olup bu sulehâdan olmağla süknâya ihtiyâcı olmağın menzil-i merkúm cânib-i şer‘den buna tevcîh olınup yedine hüccet virilmeğle mutasarrıfiken (boş) nâm kimesne ile (boş) nâm hâtûn evlâd-ı utekãdan olmak iddi‘âsıyla zabtına mâni‘ olup te‘addî eyledüğin bildürmeğle hücceti mûcebince hilâf-ı şer‘ dahl ü ta‘arruz olınmamak içün hüküm recâ itmeğin sen ki vezîr-i müşârun ileyh ve Mevlânâ-yı mûmâ ileyhsin yedinde olan hüccet mûcebince zabtiyçün hüküm yazılmışdur.

Fî evâil-i B sene [1]105 [26 Şubat-7 Mart 1694]

17/33/157 Rodos'da, Sultan Süleyman evkafı mütevellisine iletmek için Kapıağası İbrahim Ağa'ya verdiği paranın bir kısmını geri isteyen şahıs ve bu parayı iade etmeden ölen İbrahim Ağa'nın varisleri arasındaki ihtilafı çözmeye özel yargıç atanmasına, sonucun bildirilmesine dair hüküm.

İstanbul kãimmakãm paşaya ve sâbıkã Haleb kãdîsı olan Abdülhalîm ve müfettiş-i evkãf vekîline hüküm ki:

Şa‘bân gelüp Rodos'da vâkı‘ merhûm ve mağfûrun leh Sultân Süleymân Hân evkãfı mütevellîsi içün bin doksan beş senesinde sâbıkã kapuağası İbrâhîm Ağa'ya câize nâmıyla üç bin guruş virüp meblağ-ı merkúmdan iki bin iki yüz seksen sekiz guruşı bunun muhâsebesine mahsûb olup şer‘an mezbûr İbrâhîm Ağa'dan redd îcâb itmeğle mahrûse-i İstanbul'da sâkin muhallefâtın kabz iden vârislerinden taleb eyledükde virmekde te‘allül itmeğle sen ki Mevlânâ-yı mûmâ ileyhsin husûs-ı mezbûra müvellâ olup müfettiş-i evkãf vekîli ile ma‘an bu(?) da‘vâyı istimâ‘ ve hakk üzre görüp sıhhati üzre i‘lâm ve ihtimâm eyleyesiz diyü yazılmışdur.

Fî evâil-i B sene [1]105 [26 Şubat-7 Mart 1694]

17/35/169 Bursa'da, Gazi HüDivandigar evkafının eski ve mütevellisi arasında hesabın görülmesine, hadiseyle ilgisi olmayanların müdahalelerinin önlenmesine dair hüküm.

İstanbul kãimmakãmına ve mahmiyye-i İstanbul'da sadr-ı a‘zam nezâretinde olan evkãf müfettişine hüküm ki:

Burusa'da vâkı‘ merhûm ve mağfûrun leh Gãzî Hudâvendigâr tâbe serâhu evkãfınun sâbıkã mütevellîsi olan Ahmed zîde kadruhû gelüp hâliyâ vakf-ı mezbûr mütevellîsi olup mahmiyye-i İstanbul'da sâkin Abbâs nâm kimesne ile şer‘le görilmesi lâzım gelen muhâsebesin şer‘le görmeğe râzî iken Murâd nâm imâm ve Seyyid Mehmed ve Câbî Mustafâ nâm kimesnelerün kaziyyede alâkaları yoğiken muhâsebe görmesine mâni‘ olup gadr eyledüklerin bildürüp muhâsebesin hakk u adl üzre şer‘le görilüp alâkası olmayan mezbûrlar müdâhale eylememek içün hüküm recâ itmeğin sen ki vezîr-i müşârun ileyh ve mevlânâ-yı mûmâ ileyhsin görilmesi lâzım gelen muhâsebesi hakk u adl üzre görilüp kaziyyede medhali olmayanlara bîvech-i şer‘î müdâhale itdürilmemek içün yazılmışdur.

Fî evâil-i B sene [1]105 [26 Şubat-7 Mart 1694]

17/43/204 İstanbul'da Katip Mehmet evkafına ait eve tasarruf eden kadın ve bunun mahzeninin üzerine haksız yere duvar çeken kimse arasındaki ihtilafın ilgili kadılıkta görülmesine dair hüküm.

Kãimmakãm paşaya ve İstanbul kãdîsına hüküm ki:

Mahrûse-i İstanbul mahallâtından (boş) nâm mahalle sâkinelerinden (boş) nâm hâtûn gelüp bunun mahalle-i merkúmede vâkı‘ müteveffâ Kâtib Mehmed evkãfından mutasarrıf olduğı menzilinde mahzeninün üzerine (boş) nâm kimesne fuzûlî dîvâr çeküp gadr [u] zarar olduğın ve şeyhülislâmdan fetvâ-yı şerîfesi olduğın bildürüp ol bâbda hükm-i hümâyûnum recâ itmeğin şer‘le görilmek içün.

Fî evâil-i B sene [1]105 [26 Şubat-7 Mart 1694]

17/43/209 İstanbul'da Katip Mehmet evkafına ait eve tasarruf eden kadın ve bunun mahzeninin üzerine haksız yere duvar çeken kimse arasındaki ihtilafın ilgili kadılıkta görülmesine dair hüküm.

İstanbul kãimmakãmına ve mollasına hüküm ki:

İstanbul mahallâtından (boş) nâm mahalle sâkinelerinden (boş) nâm hâtûn gelüp bunun mahalle-i mezbûrda Kâtib Mehmed vakfından mutasarrıf olduğı menzilün içinde vâkı‘ mahzenün üzerine (boş) nâm kimesne fuzûlî Dîvân²⁴ çeküp gadr itmeğle yedinde olan fetvâ-yı şerîfesi mûcebince şer‘le zarar-ı şer‘îsi men‘ birle hüküm yazılmışdur.

[Fî] evâil-i B sene [1]105 [26 Şubat-7 Mart 1694]

17/45/216 Bursa'da, Gazi HüDivandigar evkafının eski ve yeni mütevellisi arasındaki ihtilafın ilgili kadılıkta görülmesine dair hüküm.

İstanbul kãimmakãmına ve müfettiş-i evkãfa hüküm ki:

Bi’l-fi‘l vezîr-i a‘zamum olan Mustafâ Paşa'nun taht-ı nezâretinde olan evkãfdan mahrûse-i Burusa'da vâkı‘ Hudâvendigâr-ı Gãzî tâbe serâhu evkãfınun sâbıkã mütevellîsi olan Ahmed gelüp kimesneye şer‘an îcâb ider vireceği yoğiken vakf-ı mezbûra hâlâ mütevellî olan Abbâs mücerred ta‘cîz içün mukaddemâ mütevellî iken vakf-ı mezbûrun ba‘zı akãrâtın ta‘mîr eyledükde zimmetünde mâl-ı vakf kalmış diyü hilâf-ı şer‘-i şerîf rencîde eyledüğ[in] ve bu bâbda hücceti olduğı[n] bildürüp mûcebince amel olınup hilâf-ı şer‘-i şerîf rencîde olınmamak bâbında hükm-i hümâyûnum recâ itmeğin şer‘le görilmek içün yazılmışdur.

Fî evâil-i Receb sene 1105 [26 Şubat-7 Mart 1694]

17/46/222 Macuncı çarşısında, Tezkireci Ahmet Efendi evkafı mütevellisinin, babasında vakfın alacağı olduğu iddiasıyla Mustafa'yı incitmemesine dair hüküm.

İstanbul kãimmakãmına ve monlâsına hüküm ki:

Mustafâ gelüp bunun babası Abdülkerîm nâm kimesnenün şer‘an kimesneye vireceği yoğiken Ma‘cûncı çârşûsında Tezkireci Ahmed Efendi evkãfınun mütevellîsi senün baban zimmetinde mâl-ı vakf vardur diyü dahl ü rencîde itmeğle men‘ birle hüküm yazılmışdur.

[Fî] evâil-i B sene [1]105 [26 Şubat-7 Mart 1694]

17/47/227 Bursa'da, Gazi HüDivandigar evkafına duacı olan şahsa vazife ve buğdayının verilmesine dair hüküm.

İstanbul kãimmakãmına ve müfettiş-i evkãfına²⁵ hüküm ki:

Alî Abdullâh gelüp vezîr-i a‘zamum Mustafâ Paşa'nun taht-ı nezâretinde olan evkãfdan Burusa'da vâkı‘ merhûm Gãzî Hudâvendigâr evkãfından almak üzre berât-ı şerîfümle yevmî beş akçe vazîfe ve senevî üç müdd hınta ile du‘âgûy olup bin yüz dört senesinde müstahıkk olduğı vazîfe ve hıntasın İstanbul'da sâkin mütevellî-i vakf olan Abbâs'dan taleb eyledükde usûli(?) vakfdan olup vakfda müsâ‘ade var iken edâda te‘allül üzre olduğın bildürüp Anadolı muhâsebesi defterlerine nazar olındukda üzerinde olup mastûr u mukayyed bulınmağın vech-i meşrûh üzre amel olına diyü hüküm yazılmışdur.

Fî evâil-i B sene [1]105 [26 Şubat-7 Mart 1694]

17/47/228 İstanbul'da, Sarı Nasuh mahallesindeki Tezkireci Ahmet Efendi para vakfının gelirinden paylarını isteyen azatlıları çocukları ve vakıf mütevellisi arasındaki ihtilafın ilgili kadılıkta görülmesine dair hüküm.

İstanbul kãimmakãmına ve monlâsına hüküm ki:

İstanbul sâkinlerinden Mustafâ ile kız karındaşı Hadîce ve oğlı Mehmed gelüp mahrûse-i mezbûrda Sarı Nasûh mahallesinde vâkı‘ müteveffâ Tezkireci Ahmed Efendi nükúdı vakfınun hâsıl-ı gallesinden vakfiyye-i ma‘mûlün bihâsında evlâd-ı utekãsına hisse şart idüp bunlar mezbûrun utekãsı evlâdından iken vakf-ı merkúm mütevellîsi sâir utekãya virüp bunlarun hisselerine düşeni virmeyüp gadr itmeğle şer‘le görile diyü hüküm yazılmışdur.

Fî evâil-i B sene [1]105 [26 Şubat-7 Mart 1694]

17/47/229 Bursa'da, Gazi HüDivandigar evkafı katipliğinin elindeki yeni hüccete göre Divan katiplerinden Mehmet Abdülkerim'in üzerinde olduğuna ve kendisinin incitilmemesine dair hüküm.
İstanbul kãimmakãmına [ve] vezîr-i a‘zamum evkãf müfettişine hüküm ki:

Müşârun ileyhün nezâretinde olan evkãfdan Burusa'da vâkı‘ merhûm Hudâvendigâr-ı Gãzî evkãfınun ber vech-i te’yîd berât-ı şerîfümle kâtibi olan Dîvân-ı âlîşânum kâtiblerinden Mehmed Abdülkerîm gelüp evkãf-ı mezbûrun kitâbet[i] bundan akdem ulûfesi bedeli berât ile üzerinde iken hıyânet zâhir olmağla ref‘ olına[n](?) Ramazân fuzûlî alup fevt olmağla mütevellî-i vakf bulınan İsmâ‘îl Hersek nâm çâvûş kendü üzerine berât itdürdükde tevliyet ve kitâbet bir yirde mâni‘u’l-hacm(?) olmağla İsmâ‘îl Hersek ref‘inden tevcîh olınup berât ile üzerinde iken Hıdmetkâr(?) Mehmed kitâbet-i mezbûrı Ramazân mahlûlinden ben aldum diyü mürtezika-i vakfdan hevâsına tâbi‘ İmâm Murâd ve Seyyid Mehmed ve Câbî Mustafâ nâm kimesnelerün(?) i‘ânet ile aldukda mezbûrun iddi‘âsı şirret olduğı zâhir ve mu‘ârazadan men‘ olınup hâlâ tarafından vekîli hıdmet-i lâzımesin edâ itmek murâd eyledüğinde mezbûr Mehmed müdâhale idüp te‘addî itmeğle yedinde olan berât-ı cedîde muğãyir ve hilâf-ı şer‘ rencîde olınmamak içün hüküm yazılmışdur.

Fî evâil-i B sene [1]105 [26 Şubat-7 Mart 1694]

17/53/254 İstanbul'da, Bezirgan Hüsrev(?) câmi‘ vakfının eski ve yeni mütevellisi arasındaki hesap ihtilafının ilgili kadılıkta görülmesine dair hüküm.

İstanbul kãimmakãmına ve monlâsına hüküm ki:

Mahrûse-i İstanbul'da vâkı‘ Bâzergân Hüsrev(?) câmi‘-i şerîfi mütevellîsi Mehmed gelüp sâbıkã mütevellî olup ve kendüden mukaddem tevliyet-i mezbûra mutasarrıf müteveffâ Çâvûşzâde (boş) nâm kimesne tarafından mütevellî vekîli mahrûse-i mezbûrda sâkin Topal Süleymân mâl-ı vakfı ekl ü bel‘ ve zâyi‘ ve telef itmeğle şer‘le muhâsebesi görilüp zimmetinde zuhûr iden mâl-ı vakf alıvirilmek bâbında hükm-i hümâyûnum recâ itmeğin şer‘le görilmek içün yazılmışdur.

[Fî] evâil-i B sene [1]105 [26 Şubat-7 Mart 1694]

17/54/256 Hacı Hatun evkafına ait hamamı kira bedeline sayılmak üzere mütevelli izniyle kendi parasıyla onaran hamamcının mütevelli ile hesap görülmesi isteğinin haklı olduğuna dair hüküm.

İstanbul kãimmakãmına ve müfettiş-i evkãf vekîline hüküm ki:

El-Hâcc Hâtûn evkãfınun hammâmınun hammâmcısı zuhûra(?) gelüp hammâm-ı mezbûr ta‘mîre muhtâc olmağla vakfun mütevellîsi (boş) nâm kimesne hammâmı mülkün ile ta‘mîr eyle masrûfını ecrine hisâb ider(?) dimeğle bu dahi kendü mâlıyla (boş) akçe sarf idüp hâlâ hisâb eylemek istedükde te‘allül üzre olduğın fetvâ-yı şerîfe mûcebince yazılmışdur.

[Fî] evâil-i B sene [1]105 [26 Şubat-7 Mart 1694]

17/61/291 Hasan Ağa evkafına ait Ayasofya yakınındaki gelir getirmeyen yıkık evi icâreteyn usulü ile kiralamak isteyen mütevelli ve buna karşı çıkanlar arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Hasan Ağa evkãfınun mütevellîsi Abdülbâkï gelüp vakf-ı mezbûr akãrâtından Ayasofya kurbında olan vakf menzil ustâmından(?) hedm olınup(?) on beş seneden mütecâviz taraf-ı vakfa nef‘i(?) olmayup Sofya'da olan zâviyesi kurrâsınun vazîfesini noksân-ı mezîd(?) itmeğle icâre-i müeccele ve mu‘accele ile îcâr vakfa enfa‘(?) olmağla tâlibine îcâr itmek istedükde hilâf-ı şer‘ ba‘zıları müdâhale eyledüklerin bildürüp ol bâbda emr-i şerîf recâ itmeğin vech-i meşrûh üzre şer‘le görilmek içün yazılmışdur.

[Fî] evâhir-i B sene [1]105 [18-27 Mart 1694]

17/71/344 İstanbul'da, Haremeyn evkafına ait arsa üzerine bina ihdas ettiğinde vakıf için veya kendi için yaptığını belirtmeyip şimdi kendim için yaptım diyen şahıs ve mütevelli arasındaki ihtilafın ilgili kadılıkta görülmesine dair hüküm.

İstanbul'da Haremeyn vekîli²⁶ müfettiş[ine](?) hüküm ki:

Ömer gelüp İstanbul'da vâkı‘ Haremeyn-i şerîfeyn evkãfından ma‘lûmetü’l-hudûd vakf arsa üzerine binâ ihdâs itdükde vakf içün veyâ nefsi içün binâ itdiğin beyân itmeyüp hâlâ nefsüm içün binâ itdüm dimeğle binâyı mülkiyyet üzre zabt itmek istedükde mütevellî (boş) nâm kimesne hilâf-ı şer‘-i şerîf nizâ‘ idüp şeyhülislâmdan fetvâsı olduğın bildürüp şer‘le görilmek içün yazılmışdur.

[Fî] evâhir-i B sene [1]105 [18-27 Mart 1694]

17/73/350 Ferruh Kethüda evkafına ait İstanbul'da Balatkapısı dahilinde Hacı İsa mahallesinde tasarruf ettiği evin altında kadim ipekçi atelyesindeki kiracıların zararsız olduğunu söyleyen kimse ve bunların zararından yakınanlar arasındaki ihtilafın ilgili kadılıkta görülmesine dair hüküm.

Âstâne kãimmakãmına ve kãdîsına hüküm ki:

El-Hâcc Alî gelüp müteveffâ Ferruh Kethudâ evkãfından mahrûse-i İstanbul'da Balat kapusı dâhilinde el-Hâcc Îsâ mahallesinde vâkı‘ icâre ile mutasarrıf olduğı menzilinün tahtında kadîmî ipekci kârhânesi olmağla tâife-i mezbûrdan ol kârhânede müste’cirîn zimmîlerün [hilâf-ı] şer‘ kimesneye zarar u te‘addîleri yoğiken mahalle-i mezbûreden Kayyımoğlı İbrâhîm ve eimmeden Ahmed ve Yahyâ nâm kimesneler celb-i mâl içün hilâf-ı şer‘-i şerîf ve bilâ emr mâni‘ olmalarıyla hâssa mi‘mâr ma‘rifetiyle keşf olındukda zarar-ı şer‘îleri olmamağla bîvech mu‘ârazadan men‘ birle hüccet virilmişiken kanâ‘at itmeyüp ol hüccete muğãyir dahl ü rencîde eyledüklerin bildürmeğle yedinde olan hüccet mûcebince şer‘le görilmek içün yazılmışdur.

[Fî] evâhir-i B sene [1]105 [18-27 Mart 1694]

17/91/436 İstanbul'da, Tavukpazarı yakınındaki Babüssaade ağası Hüseyin Ağa câmi‘ evkafı mütevellisi ve icâreteyn usulü ile mutasarrıf oldukları odaların ana duvarlarının onarılması ile kira bedelinin indirilmesini isteyen kiracılar arasındaki ihtilafın ilgili kadılıkta görülmesine dair hüküm.

İstanbul kãdîsına ve müfettiş-i evkãf vekîline (boş) zîde ilmuhû hüküm ki:

Bâb-ı sa‘âdetüm ağası olan Mustafâ dâme ulüvvuhû arz gönderüp nezâretinde olan Haremeyn-i şerîfeyn evkãfından İstanbul'da Tavukbâzârı kurbında vâkı‘ sâbıkã Bâb-ı sa‘âdetüm ağası müteveffâ Hüseyin Ağa binâ eyledüği câmi‘-i şerîf evkãfınun musakkafâtından hâsıl olan îrâdı kalîl olup masrafına bir vechile vefâ eylemeyüp vakfun hâli mükedder iken evkãf-ı mezbûre musakkafâtından icâre-i mu‘accele ve müeccele ile vakf odalar müste’cirlerinden Hâcı Sun‘ullâh ve (boş) nâm kimesne şirrete sülûk idüp mutasarrıf oldukları odalarun ana dîvârların müceddeden ta‘mîr eyle diyü mütevellî-i vakfı ta‘cîz eyledüklerinden mâ‘adâ ecr-i misle mu‘âdil olan icâresin tenzîl eyle diyü hilâf-ı şer‘-i şerîf mütevellî-i vakfı ta‘cîz ile vakfa gadr murâd idüp te‘addî eylemeleriyle emr-i şerîf virilmek recâsına arz itmeğin şer‘le görilmek içün yazılmışdur.

Fî evâhir-i B sene [1]105 [18-27 Mart 1694]

17/94/451 Galata'da, Ağa câmi‘ yakınındaki vakıf evin tasarruf nöbetinin kendisine intikal ettiğini iddia eden kadın ve bunu haksız yere zapteden kimse arasındaki ihtilafın ilgili kadılıkta görülmesine dair hüküm.

İstanbul paşasına ve Galata monlâsına(?) hüküm ki:

Ümmühânî nâm hâtûn gelüp medîne-i Galata'da Ağa câmi‘-i şerîfi kurbında vâkı‘ ma‘lûmetü’l-hudûd mülk süknâsını vakfiyye-i ma‘mûlün bihâda (boş) nâm kimesnenün evlâdına meşrût vakfı olup mezbûrun evlâdından olmağla nevbet-i tasarruf buna intikãl itmiş iken ecânibden Sâlih nâm kimesne fuzûlî zabt itmeğle buna küllî gadr u te‘addî itmeğle fetvâ-yı şerîfesi mûcebince şer‘le görilmek içün hüküm yazılmışdur.

Fî evâhir-i B sene [1]105 [18-27 Mart 1694]

17/102/496 Van'da, Rüstem Paşa evkafının mütevelli kãimmakãmı iken vakıf akarları kendi parasıyla onarıp masrafını almadan ölen kişinin mirasçısı ve İstanbul'da sakin vakfın büyük mütevellisi arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Sâdât-ı kirâmdan Seyyid Mehmed gelüp bundan akdem bunun babası Seyyid İshâk nâm kimesne Van'da vâkı‘ müteveffâ Rüstem Paşa evkãfınun mütevellîsi kãimmakãmı(?) iken vakf-ı merkúm akãrâtından olan dam ve hân ve suyolları harâba müşrif olup vakfda müsâ‘ade olmamağla ba‘de’l-keşf hüccet olındukda ma‘rifet-i şer‘le ta‘mîr ve mâlından üç yüz on altı guruş harc u sarf idüp masrûfı olan meblağ-ı merkúmı almadın babası mezkûr fevt olup verâseti buna munhasıra olmağla meblağ-ı merkúmı mahrûse-i İstanbul'da sâkin vakf-ı merkúmun mütevellî-i kebîri olan (boş) nâm kimesneden mâl-ı vakfdan taleb eyledükde virmekde te‘allül eyledüğin bildürüp şer‘le görilüp hukúk-i sahîha-i şer‘iyyeden müteveccih olan hakkı alıvirilmek bâbında hüküm recâ itmeğin şer‘le görilmek içün yazılmışdur.

Fî evâil-i Ş sene [1]105 [28 Mart-6 Nisan 1694]

17/125/606 Tophâne'de, Mustafa Ağa mahallesindeki vakıf evin süknasına tasarruf nöbeti hususunda taraflar arasındaki ihtilafın ilgili kadılıkta görülmesine dair hüküm.

Galata kãdîsına hüküm ki:

El-Hâcc Mustafâ gelüp bunun ceddi el-Hâcc Şükrullâh nâm kimesne Galata muzâfâtından olup Tophâne mahallâtından Mustafâ Ağa mahallesinde vâkı‘ mülkiyyet üzre mutasarrıf olduğı menzilini tescîl-i şer‘î birle vakf ve süknâsı evvelâ kendüye ba‘dehû²⁷ vefâtihî evlâd ve evlâdına ve ba‘de’l-inkırâz zevcesine vakf ve şart idüp bu hâlâ evlâd-ı vâkıfdan olup olup²⁸ nevbet-i tasarruf buna intikãl itmeğin Ümmühânî nâm hâtûn vâkıf-ı merkúmun zevcesiyüm diyü menzil-i mezbûrı bir tarîkle hilâf-ı şart-ı vâkıf fuzûlî zabt idüp gadr itmeğle şer‘le görilmek içün yazılmışdur.

Fî evâhir-i Ş sene [1]105 [17-25 Nisan 1694]

17/131/632 Çatalca'da, vakıf mütevellisi ve vakfa olan borçlarını ödemeyen şahıslar arasındaki ihtilafın ilgili kadılıkta görülmesine dair hüküm.
Çatalca kãdîsına hüküm ki:

Kazâ-i mezbûra tâbi‘ (boş) vakfınun mütevellîsi gelüp yine kazâ-i mezbûra tâbi‘ (boş) ve (boş) nâm karyeler ahâlîsinden vesâirleri zimmetlerinde düyûn-ı sahîha-i şer‘îden (boş) guruş mâl-ı vakf olup taleb eyledükde virmekde te‘allül eyledüklerin bildürüp yedinde olan fetvâ-yı şerîfesi mûcebince mahallinde şer‘le görilmek içün yazılmışdur.

[Fî] evâhir-i Ş sene [1]105 [17-25 Nisan 1694]

17/131/634 Haydar Paşa vakfı ve Rüstem Paşa vakfı mütevellileri arasında nizalı olan Kocaeli sancağında Yalova nahiyesine bağlı Buryan(Seydî Bey) ve Yeniköy(Karakilise) köylerinin Haydar Paşa vakfına ait olduğuna dair hüküm.

Yalakâbâd kazâsı nâibi zîde ilmuhûya hüküm ki:

Müteveffâ Haydar Paşa evkãfınun mütevellîsi olan el-Hâcc Mehmed gelüp Kocaili sancağında Yalakâbâd nâhiyesinde kıbleten Kiras pınarından Göller meşhedine ve şarkan Manastır yurdından Kemerburuna ve Çankule(?) tarlasına ve ândan korulığa(?) ve deryâya müntehî ve garben deryâya ve çermuk(?) ve Büyük karaağaç ve Şâlî(?) yurdı ve Ferruh(?) köprisi ve Türkmân harmeni ile mahdûd dört bin beş yüz yiğirmi dokuz akçe yazusı olan karye-i Buryan(?) nâm-ı dîğer Seydî(?) Beğ ve iki bin altı yüz otuz yedi akçe yazusı olan Yeniköy nâm-ı dîğer Karakilise tâbi‘-i Yörükân(?) karyesi müteveffâ-yı mezbûrun selâtîn-i mâzıyye temlîki ile defterde mukayyed mülki iken yine nâhiye-i mezbûrda vâkı‘ müteveffâ Rüstem Paşa vakfı mütevellîleri ve zâbitleri taraflarından zikr olınan karyeler Rüstem Paşa evkãfından olmak üzre hilâf-ı defter fuzûlî zabt ve birkaç seneden berü ahz ü kabz eyleyüp te‘addî eyledüğin bildürmeğle hüküm recâ itmeğin Defterhâne-i âmiremde mahfûz olan defter-i evkãfa mürâca‘at olındukda Rüstem Paşa evkãfı yazılduğı mahallde hîn-i tahrîrde bir câmi‘ ve bir kârbânsaray ve etmekçi furunı ve iki bâb mahzen ve iki bâb müsâfirhâne ve on bâb dükkân ve bir mikdâr arz ve²⁹ hâliyesi olup karye-i mezkûrdan Bâzârköy dimeğle ma‘rûf mevzi‘e varınca ibnü’s-sebîl içün kaldırım binâ itmeğin sebt-i defter olınup ve hudûd-ı mezbûr ile mahdûd dört bin beş yüz yiğirmi dokuz akçe yazar karye-i Buryan(?)nâm-ı dîğer Sa‘dî(?) Beğ ile iki bin altı yüz otuz yedi akçe yazar Yeniköy nâm-ı dîğer Karakilise tâbi‘-i Yörükân karyesi bi’l-cümle hîn-i tahrîrde muharrir kalemiyle mülk-i Haydar Paşa diyü tahrîr ve defter olınmağla ber mûceb-i defter-i hâkãnî zikr olınan iki aded karyelerde Rüstem Paşa vakfınun alâkası yokdur diyü defter emîni arz itmeğin defter emîni olan el-Hâcc Mehmed arz itmeğin defter emîni arzı mûcebince amel olınmak içün yazılmışdur.

Fî evâhir-i Ş sene [1]105 [17-25 Nisan 1694]

17/133/638 Hasan Paşa evkafına ait Beşiktaş'taki bahçeyi icâreteyn usulü ile fahiş noksanla kiralayan kimseye, kira bedelini emsaline yükseltmesini öneren mütevelli ve buna karşı çıkan kiracı arasındaki ihtilafın ilgili kadılıkta görülmesine dair hüküm.

İstanbul kãimmakãmına ve Galata kãdîsına hüküm ki:

Müteveffâ Hasan Paşa evkãfınun mütevellîsi Mehmed zîde kadruhû gelüp vakf-ı mezbûrun vakfiyye-i ma‘mûlün bihâsında mukayyed akãrâtından Galata kazâsına tâbi‘ Beşiktaş'da vâkı‘ vakf bâğçeyi ücret-i mu‘accele ve müeccele-i mislinden noksân-ı fâhiş ile Galata kazâsı sâkinlerinden (boş) nâm kimesneye îcâr itdükden sonra hâliyâ mütevellî-i vakf zikr olınan bâğçeyi merkúma ecr-i misliyle kabûl eyle diyü teklîf eyledükde mezbûr te‘allül eyledüğin ve şeyhülislâmdan fetvâ-yı şerîfesi olduğın bildürüp mûcebince hüküm recâ itmeğin şer‘le görilmek içün yazılmışdur.

[Fî] evâhir-i Ş sene [1]105 [17-25 Nisan 1694]