Galata'da, Haseki Sultan evkafına ait evin, burada mektep ve çeşme yapmak isteyen Gümrük emini Hasan'ın mülk evi ile istibdaline dair hüküm

[Derkenar] Dâru’s-sa‘âde ağası yazıcısı âdemi tarafından yazıcı yediyle hüküm yazılmışdur.
Üsküdar kãdîsına hüküm ki:

Ahmed oğlı Süleymân zîde kadruhû gelüp medîne-i Üsküdar'da vâkı‘ merhûme ceddem Vâlide Sultân tâbet serâhunun câmi‘-i şerîfi kurbında Çiftehammâm dimeğle ma‘rûf hammâmun hammâmcısı olan Ahmed Beğ zimmetinden Mustafâ nâm kimesneye virilüp ânun dahi zimmetinde bin yüz senesi Cemâziyye’l-evvel'inün gurresinde buna on iki bin akçeye der‘uhde ve iltizâm olınup iltizâmı olan meblağ-ı merkúmı bi’t-temâm edâ vü teslîm idüp zabtıyçün mütevellî-i vakf tarafından memhûr temessük virildüğin bildürüp mûcebince zabt itmek bâbında emr-i şerîfüm recâ itmeğin kabzına zabt eylemek emrüm olmışdur diyü yazılmışdur.

[Fî] evâhir-i Ca sene 1100 [13-22 Mart 1689]

13/29/140 Kapıağası Osman Ağa evkafına ait mukataaları ve mahlulleri vakıf katibine yazdırmayan, katibe ve cabiye ücretini vermeyen vakıf mütevellisinin hesaplarının mahkemece görülmesine dair hüküm.

İstanbul kãdîsına hüküm ki:

Sâbıkã kapuağası müteveffâ Osmân Ağa evkãfınun bi’l-fi‘l berât-ı şerîfümle kâtibi olan Hasan gelüp evkãf-ı mezbûrun mütevellîsi olan Hüseyin nâm kimesne umûr-ı vakfa kimesnenün ahvâli muttali‘ olmasun içün vakfun mukãta‘aları ve mahlûlâtları kâtib-i vakfun kâtibine tahrîr itdürmeyüp kâtibe ve câbiye kãnûn üzre resmin virmeyüp ve muhâsebesin dahi hîle ile görüp vakfa ve bunlara gadr eylemeğle sen ki Mevlânâ-yı mûmâ ileyhsin şer‘le muhâsebesi görilmek içün hüküm yazılmışdur.

Fî evâhir-i Ca sene [1]100 [13-22 Mart 1689]

13/30/147 Tophâne'de, Ömer Paşa mescidi evkafından vakıf şartına aykırı olarak nazırlık, cabilik ve cüzhanlık namına vazife ihdas ettiren şahısların vazifesinin kaldırılmasına dair hüküm.

Galata monlâsına hüküm ki:

Kazâ-i mezbûre tâbi‘ nefs-i Tophâne'de vâkı‘ müteveffâ Ömer Paşa mescidi evkãfınun evlâdiyyet ve meşrûtiyyet üzre mütevellîsi gelüp vakf-ı mezbûre kurâ ve mezâri‘a olmayup nükúd ve musakkafâtı olmayup ve emvâl-i vakfdan olan mürtezikaya virilen vazîfeden cümlesi vakfiyye-i mâ‘mûlün bihâdan vakfun evlâdına meşrûta eylemek ba‘zı kimesneler hilâf-ı şart-ı vâkıf birer tarîkle nezâret ve cibâyet ve cüzhânlık nâmına vazîfe ihdâs ve berât itdürmeleriyle emvâl-i vakfda hârice muhdes teklîf talebiyle te‘addî üzre olmalarıyla emvâl-i vakfdan hârice muhdes teklîf olınmağla te‘addî olmaya diyü yazılmışdur.

Fî evâhir-i Ca sene [1]100 [13-22 Mart 1689]

13/32/157 Tophâne'de, Ömer Paşa mescidi evkafından vakfedenin şartına aykırı olarak nazırlık, cabilik ve cüzhanlık namına vazife ihdas ettiren şahısların vazifesinin kaldırılmasına dair hüküm.

Galata kãdîsına hüküm ki:

Kazâ-i mezbûra tâbi‘ nefs-i Tophâne'de vâkı‘ müteveffâ Ömer Paşa binâ eyledüği mescidi evkãfınun mütevellîsi olan (boş) gelüp vakf-ı merkúmun kurâ ve mezâri‘-i olmayup nükúd ve musakkafâtı olmayup ve emvâl-i vakfdan olan mürtezikaya virilen vazîfeden fazlası vakfiyye-i ma‘mûlün bihâda evlâdına meşrûta iken ba‘zı kimesneler hilâf-ı şart-ı vâkıf bir tarîkle nezâret ve cibâyet ve cüzhânlık nâmına vazîfe ısdâr idüp emvâl-i vakfdan hârice muhdes vazîfe talebiyle te‘addî itmeleriyle fazla kalmayup ol vechile olan vâkı‘ küllî gadr u te‘addî olınduğın ve bu bâbda tarafından Mehmed nâm kimesneyi vekîl eyledüğin bildürüp usûl-i vakfdan hârice vazîfe talebiyle te‘addî olınmamak emrüm olmışdur diyü yazılmışdur.

[Fî] evâhir-i Ca sene 1100 [13-22 Mart 1689]

13/44/216 İstanbul'da, Kalenderhane mahallesinde, ulu şeyhlerden Seyit Osman'ın yaptırdığı câmi‘ve zaviye fukarası için Süleymaniye imâretinde pişirilen fodula ve yemekten oluşacak mahluldan takas olmak şartıyla zaviye fukarasına beş adet verilmesine dair hüküm.

İstanbul'da vâkı‘ merhûm Sultân Süleymân Hân câmi‘i evkãfınun mütevellîsine hüküm ki:

Meşâyih-i i‘zâmdan Seyyid Osmân keşfe gelüp İstanbul'da Kalenderhâne mahallesinde müceddeden binâ eyledüği câmi‘-i şerîfe ve zâviye fukarâsınun ta‘âmiyyeleri olmayup zarûretleri olmağla Süleymâniyye imâretinde tabh olınan fodula ve ta‘âmdan ibtidâ düşen mahlûlden takãss olmak üzre ve zâviye-i mezbûre fukarâsına on çift fodula ta‘âmiyesi ta‘yîn olınmak bâbında hükm-i hümâyûnum recâ itmeğin ve zâviye-i mezbûre fukarâsına ibtidâ düşen mahlûlden takãss olmak şartıyla yalnız beş aded düşenden virilmek emrüm olmışdur diyü yazılmışdur.

[Fî] evâhir-i Ca sene 1100 [13-22 Mart 1689]

13/76/370 Soğanağa mahallesinden olduklarına dair belgeleri olup tekalif akçesini mahalle ahalisi ile birlikte ödeyen, Kamer Hatun evkafına ait evlerin mutasarrıfları ve bu evlerin kendi mahallerine dahil olduğunu iddia edip bunların paralarını alan Katip Sinan mahallesi imamı arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

İstanbul'da Soğan Ağası mahallesi ahâlîsinden Alî ve Abacı Ahmed ve Hüseyin ve Yûsuf Usta ve Mustafâ ve Kapucı Osmân ve Halîl ve Abdüllatîf ve el-Hâcc Ramazân ve el-Hâcc Mehmed ve Osmân ve Hasan Efendi eytâmları ve Hâcı Yûsuf eytâmı Mustafâ nâm kimesneler Dergâh-ı mu‘allâma arz-ı hâl idüp müteveffiye Kamer Hâtûn evkãfından arsa icâre ve mukãta‘alu mutasarrıf oldukları menzilleri Soğan Ağası mahallesinden olduklarına yüz seneden mütecâviz yedlerinde vakfiyye-i ma‘mûlün bihâ ve hüccet-i şer‘iyye ve temessükâtları olup işbu sene-i mübârekede emr-i şerîfüm tevârüd olan tekâlîf akçesin mahalle-i mezbûre ahâlîsi ile ma‘an edâ itmişler iken civârlarında vâkı‘ Kâtib Sinân mahallesi imâmı Hasan zikr olınan evler bizüm mahallemüzdendür diyü nizâ‘ ve müdde‘âsın şuhûd-ı udûl ile vech-i şer‘î üzre isbâta kãdir değil iken mezbûr İmâm Hasan bin yüz senesinde ol bahâne ile bunlarun hilâf-ı şer‘ (boş) guruşların alup küllî gadr itmeğle yedlerinde olan temessükâtları mûcebince şer‘le görilüp bi gayri hakk aldukları guruşları alıvirilmek bâbında hükm-i hümâyûnum recâ itmeğin mûcebince yazılmışdur.

[Fî] evâil-i C sene [1]100 [23 Mart-1 Nisan 1689]

13/77/374 İstanbul'da, Katip Sinan mescidi yakınında iştirak üzere mutasarrıf oldukları evin malikleri ve ev arsasının kısmen Haremeyn vakfına ait olduğunu iddia eden vakıf mütevelli arasındaki ihtilafın ilgili kadılıkta görülmesine dair hüküm.

Âstâne-i sa‘âdetde müfettiş-i evkãf vekîli olana hüküm ki:

Ahmed ve müşterekesi Mu‘ammer[e] nâm hâtûn hâliyâ mahrûse-i İstanbul'da vâkı‘ Kâtib Sinân mescidi kurbında mülk olmak üzre ber vech-i iştirâk mutasarrıf oldukları menziller içün Haremeyn evkãfı mütevellîsi (boş) tarafından menzil-i mezbûrun arsasınun bir mikdârın Haremeynü’ş-şerîfeyn vakfındandur diyü münâza‘a itmeğle şer‘le görilüp tarafeyne gadr olınmamak üzre iftihâru’l-havâss ve’l-mukarrebîn bi’l-fi‘l Dâru’s-sa‘âde ağası olan Mustafâ Ağa dâme ulüvvuhû tarafından mührlü mektûb virilmeğle mûcebince hüküm yazılmışdur.

Fî evâil-i C sene [1]100 [23 Mart-1 Nisan 1689]

13/78/376 İstanbul'da, Yeni câmi‘yakınında vakıf arsaya mutasarrıf olan kadın ve bu arsada bina yapan şahıs arasında Edirne'de bakılan davada verilen karar gereğince müdahalesi sabit olan şahsın men olunmasına dair hüküm.

Âstâne'de kãimmakãm paşaya ve İstanbul kãdîsına hüküm ki:

(...) nâm hâtûn gelüp mahrûse-i İstanbul'da Yeni câmi‘-i şerîf kurbında mütevellî temessüki ile mutasarrıfe olduğı vakf arsa-i hâliyesi kimesneye izn-i mütevellî ile fâriğa olmış değil iken Mustafâ nâm kimesne bin doksan (boş) senesinde fuzûlî binâ ihdâs itmeğle mahrûse-i Edirne'de murâfa‘a olduklarında mezkûr Mustafâ'nun alâkası olmayup mezbûre hâtûnun taht-ı icâresinde olduğın bi’l-fi‘l Haremeynü’ş-şerîfeyn evkãfı mütevellîsi olan Alî zîde fazluhû arz u i‘lâm eylemek Mevlânâ-yı müşârun ileyhün arzı mûcebince hüccet-i şer‘le men‘ u def‘ olınmak emrüm olmışdur diyü yazılmışdur.

[Fî] evâil-i C sene 1100 [23 Mart-1 Nisan 1689]

13/78/377 İstanbul'da, Katip Sinan mescidi yakınında iştirak üzere mutasarrıf oldukları evin malikleri ve ev arsasının kısmen Haremeyn vakfına ait olduğunu iddia eden vakıf mütevelli arasındaki ihtilafın ilgili kadılıkta görülmesine dair hüküm.

Âstâne-i sa‘âdetümde müfettiş-i evkãf vekîli olan (boş) zîde ilmuhûya hüküm ki:

Mahrûse-i İstanbul'da vâkı‘ Kâtib Sinân mescidi kurbında mülk olmak üzre ber vech-i iştirâk mutasarrıf oldukları menzilleriyçün Haremeynü’ş-şerîfeyn evkãfı mütevellîsi (boş) tarafından menzil-i mezbûrun arsasınun bir mikdârı Haremeynü’ş-şerîfeyne vakfdur diyü müdâhale itmeğle şer‘le görilüp tarafeyne gadr olınmamak üzre bi’l-fi‘l Dâru’s-sa‘âdetüm ağası olan Mustafâ Ağa tarafından mühürlü mektûb virilmeğin mûcebince şer‘le görilmek emrüm olmışdur diyü yazılmışdur.

[Fî] evâsıt-ı C sene 1100 [2-11 Nisan 1689]

13/78/379 Eyüp'te, Toklu Baba(?) zaviyesi ve evkafına ait bostan ve içindeki Küplüce ayazmasının tasarrufuna sabık sadrazamın evladınca vaki kadime ve deftere aykırı müdahalenin önlenmesine dair hüküm.

Âstâne-i sa‘âdetde kãimmakãm paşaya ve Hâslar kãdîsına hüküm ki:

Medîne-i hazret-i Ebâ Eyyûb el-Ensârî'de vâkı‘ Toklı Baba(?) zâviyesinün zâviyedârı ve evkãfınun mütevellîsi olan Dervîş el-Hâcc Mahmûd bin Hüseyin zîde mecdûhu gelüp tasarrufı ve gallesi zâviye-i mezbûrenün meşrûtiyyet üzre ve yine defterde mukayyed evkãfından olup kadîmü’l-eyyâmdan berü cânib-i vakfdan tasarruf olınagelen bostân ve hudûdı dâhilinde vâkı‘ Küplice ayazma dimeğle ma‘rûf ayazmanun tasarrufına vezîr-i a‘zam-ı sâbık müteveffâ-yı mûmâ ileyhün evlâdları tarafından fuzûlî müdâhale olınmağla ahvâlleri şer‘le görildükde münâza‘un fihâ olan mahaller defterde mukayyed zâviye-i mezbûrenün evkãfından olup kadîmü’l-eyyâmdan berü ve cânib-i vakfdan tasarruf olınageldüği huddâmı muvâcehesinde sâbit ve cânib-i şer‘den hüccet virilüp kadîme ve deftere muhâlif ta‘arruz olınmamak üzre mâliyye tarafından emr-i şerîf mûcebince hüküm yazılmışdur.

[Fî] evâsıt-ı C sene [1]100 [2-11 Nisan 1689]

13/79/384 İstanbul'da, babasının kimseye borcu olmadığını bildiren kimse ve bunun babasının mutasarrıf olduğu Şamizade Mehmet Efendi evkafına ait evi ferağ ettiğini, evin nizalı olması sebebiyle verilen bedelin iadesini isteyen Merami Ali Efendi'nin küçük oğlu arasındaki ihtilafın ilgili kadılıkta görülmesine dair hüküm.

Âstâne-i sa‘âdetde kãimmakãm paşaya ve İstanbul kãdîsına hüküm ki:

Mahrûse-i İstanbul sâkinlerinden Alî gelüp bunun müteveffâ babası Sefer'ün kimesneye vireceği yoğiken Müteveffâ Merâmî Alî Efendi dimeğle ma‘rûf kimesnenün oğlı Mehmed nâm sağïrün vasîsi olan (boş) nâm kimesne tarafından bunun babası mezbûr Sefer bin seksen sekiz senesinde mahrûse-i mezbûrede müteveffâ Şâmîzâde Mehmed Efendi evkãfından icâre ile mutasarrıf olduğı menzili âhara mütevellî ile mezkûr Merâmî Alî'ye iki yüz guruşa ferâğat eyledüği menzilün nizâ‘ı zuhûr eyledi bedel-i ferâğ nâmına babamun(?) alduğı akçemi sağïr içün vesâyeten senden alurum diyü bi gayri hakk akçe talebiyle dahl ü rencîde itmeğle şer‘le def‘ olınmak bâbında emr-i şerîf recâ itmeğin şer‘le görilmek içün yazılmışdur.

Fî evâsıt-ı C sene [1]100 [2-11 Nisan 1689]

RAS10-13VF03

RAS13-15VF04

13/83/402 İstanbul'da, Mahmut Paşa'da, Daye Hatun-ı Atik'in yaptırdığı mescit vakfının mürtezikalarının ücretlerinin mütevelli tarafından verildiğine, vakıf şartına aykırı hareket edilmemesine dair hüküm.

İstanbul paşasına ve monlâsına hüküm ki:

İstanbul Mahmûd Paşa'da Dâye Hâtûn-ı Atîk binâ eyledüği mescid-i şerîf evkãfından olan vech-i meşrûh üzre mütevellîsi olan Mustafâ gelüp evkãf-ı mezbûr mürtezikalarınun vâkı‘ olan cihâtı mütevellîleri olanlar arz idüp âhardan müdâhale olınmaya diyü vakfiyye-i ma‘mûlün bihâsında şart eyledüği mastûr iken sen ki Mevlânâ-yı mûmâ ileyhsin hilâf-ı şart-ı vâkıf arz virüp ve muhâsebe kâtibleri dahi mücerred celb-i mâl içün evkãf-ı mezbûreye gadr olınduğın bildürüp emr-i şerîf recâ itmeğin şart-ı vâkıf mûcebince amel olınmak içün yazılmışdur.

[Fî] evâsıt-ı C sene 1100 [2-11 Nisan 1689]

13/87/419 İstanbul'da, Valide Sultan evkafının mütevellisi ve tasarrufunda bulunan binası yanmış olan boş arsayı ferağ etmesine rağmen evkaf defterine kaydedilmemesinden yararlanarak ferağını inkar eden kadın arasındaki ihtilafın ilgili kadılıkta görülmesine dair hüküm.

İstanbul kãimmakãmı ve İstanbul kãdîsına hüküm ki:

Mahrûse-i İstanbul'da vâkı‘ merhûm ve mağfûrun lehâ Vâlide Sultân evkãfınun mütevellîsi olan Mustafâ arz-ı hâl idüp müşârun ileyhânun evkãfından mahrûse-i mezbûrda olan (...) bundan akdem harîkde muhterik olup bi’l-kulliye arsa-i sırf kalup mi‘mâr-ı sâbık müteveffâ Ahmed Ağa fermânıyla keşf idüp ta‘mîr eyledükde (boş) evkãfından yetmiş beş zirâ‘ mikdârı arsa-i sırf mutasarrıfesi olan (boş) nâm hâtûn ferâğında zevci vekâletiyle isticâr ve muhâsebe zamm ve ilhâk olınup lâkin ol mahallde mezbûrenün ferâğı tahrîr ve defter-i evkãfa kayd olınmamağla hâlâ mezbûre hâtûn ferâğı münkire olup şirrete sâlik olmağla bundan akdem bu bâbda şeyhülislâm[dan] fetvâ-yı şerîfesi mûcebince şer‘le görilüp icrâ-yı şer‘ ve ihkãk-ı [hakk] olınmak bâbında emr-i şerîfüm recâ itmeğin fetvâ-yı şerîfesi mûcebince amel olınmak içün yazılmışdur.

Fî evâsıt-ı C sene [1]100 [ 2-11 Nisan 1689 ]

13/88/421 İstanbul'da, Nahılbend çarşısında Doğancıbaşı Hacı Mehmet Ağa'nın evkafı müsait olmamasına rağmen, vakıf şartına aykırı ihdas edilen katiplik ücretiyle vakıf mütevellisinin rahatsız edilmemesine dair hüküm.

İstanbul kãdîsına hüküm ki:

Kazâ-i mezbûrda vâkı‘ Nahılbend çârşûsında müteveffâ Doğancıbaşı el-Hâcc Mehmed Ağa'nun evkãfı mütevellîsi olan İbrâhîm arz-ı hâl idüp vakf-ı mezbûrun kurâ ve mezâri‘i olmayup ve vakfiyye-i ma‘mûlün bihâsında kâtip vazîfesi nâmıyla bir nesne şart-ı vakfiyyet olınmış değil iken ve vakfdan müsâ‘ade yoğiken âhardan İsmâ‘îl nâm kimesne hilâf-ı şart-ı vâkıf muhdes kitâbet vazîfesi talebiyle dahi rencîde itmekden halî olmamağla vakf-ı mezbûra (...) mezbûrede fukarâlarınun vazîfelerine küllî noksân olduğın bildürüp ol vechile hilâf-ı şart-ı vâkıf rencîde olınmamak bâbında şart-ı vâkıf mûcebince rencîde olınmamak içün yazılmışdur.

Fî evâsıt-ı C sene 1100 [2-11 Nisan 1689]

13/95/456 Koyun emini Ahmet Ağa'nın çocukları ve üzerinde vakıf parası bulunduğunu iddia ettikleri vakıf mütevellisi arasındaki ihtilafın ilgili kadılıkta görülmesine dair hüküm.

Âstânede kãimmakãm Paşa'ya ve İstanbul kãdîsına hüküm ki:

Müteveffâ Koyun emîni Ahmed Ağa dimeğle ma‘rûf kimesnenün evlâdlarından (boş) ve (boş) nâm kimesneler gelüp babaları mezbûrun meşrûtiyyet üzre mütevellîsi oldukları ve mukaddemâ bundan akdem vakf-ı merkúm mütevellîsi olan Mehmed nâm kimesne zimmetinde bin yedi yüz guruş mâl-ı vakf olup taleb eyledüklerinde te‘allül üzre olmağla murâfa‘a-i şer‘ olduklarında hükm birle hüccet-i şer‘iyye virilmeğin kanâ‘at itmeyüp ol hüccete muğãyir nizâ‘ eyledüğin bildürüp zâbiti ma‘rifetiyle şer‘le görilüp zimmetinde zuhûr iden mâl-ı vakf hüccet-i şer‘iyye mûcebince amel olınmak fermânum olmışdur diyü yazılmışdur.

[Fî] evâhir-i C sene 1100 [12-21 Nisan 1689]

13/109/530 Kurupazarı kazasında, sadrazam Nasuh Paşa'nın evkafına ait vakıf parasını getiren vakıf zabiti ve bunun yolunu kesip parasını alan Kadıköyü'nde Hacı Muslu'nun köleleri arasındaki ihtilafın ilgili kadılıkta görülmesine dair hüküm.

Üsküdar monlâsına ve hâssa bostâncıbaşıya hüküm ki:

Kurıbâzârı kazâsına tâbi‘ vezîr-i a‘zam-ı sâbık müteveffâ Nasûh Paşa'nun evkãfından Na‘llıhân dimeğle ma‘rûf vakf hânun zâbiti olan İbrâhîm gelüp altı aylık vakf mâlı ve mürtezika akçelerin getürür iken Üsküdar'a karîb Kãdîköyi'nde sâkin Hâcı Muslı nâm kimesnenün köleleri bin yüz senesinde bunun önüne inüp elinden almağla küllî fesâd eyledüklerin bildürüp icrâ-yı hakk olınmak bâbında emr-i şerîfüm recâ itmeğin mahallinde şer‘le görilmek içün yazılmışdur.

[Fî] evâsıt-ı C sene 1100 [2-11 Nisan 1689]

13/110/535 İstanbul'da, üzerindeki vakıf parasını ödemeyen Gedik Ahmet Paşa evkafı katibiyle ilgili Divanın, Haremeyn müfettişi önünde Edirne'de görülmesine dair hüküm.

Âstâne-i sa‘âdetde kãimmakãm Ömer Paşa'ya hüküm ki:

Bi’l-fi‘l Dâru’s-sa‘âdetüm ağası olan el-Hâcc Mustafâ Ağa dâme ulüvvuhû mektûb gönderüp taht-ı nezâretinde olup mahrûse-i İstanbul'da vâkı‘ müteveffâ Gedik Ahmed Paşa evkãfınun hâlen kâtibi olan Ahmed nâm kimesne zimmetinde vakf-ı mezbûr mâlından hüccet-i şer‘iyye ile bin iki yüz guruş mâl-ı vakf olup taleb eyledükde şirrete sülûk idüp zûr şâhid ikãmetiyle virmekde te‘allül itmeğle da‘vâsı âhar yirde istimâ‘ olınmayup Haremeynü’ş-şerîfeyn müfettişi huzûrında şer‘le görilmek içün Edirne'ye havâle olınmak bâbında emr-i şerîfüm recâsına i‘lâm itmeğin vech-i meşrûh üzre amel [içün] hüküm yazılmışdur.

[Fî] evâsıt-ı C sene [1]100 [2-11 Nisan 1689]

13/113/549 Üsküdar'da, Ensârî Mahmut Ağa evkafı mütevellisi ile nazırı ve bir süredir vakıftan ücretini alamayan şeyhülkurra arasındaki ihtilafın ilgili kadılıkta görülmesine dair hüküm.

Âstâne'de müfettişine hüküm ki:

Mehmed bin Feyzullâh gelüp Üsküdar'da medfûn Üsküdarî Mahmûd Ağa evkãfından yevmî on akçe vazîfe ile şeyh-i kurrâ olmağla şart-ı vâkıf mûcebince müstahıkk olduğı vazîfesin taleb eyledükde vakfun müsâ‘adesi var iken meşrûtiyyet üzre mütevellîsi ve nâzırı vakfda akçe yokdur diyü bin doksan yedi senesi Ramazân-ı şerîfi gurresinden berü müstahıkk olduğı vazîfesi alıvirilmek bâbında emr-i şerîfüm recâ itmeğin şer‘le görilmek içün yazılmışdur.

[Fî] evâhir-i C sene 1100 [12-21 Nisan 1689 ]

13/120/584 Kırkkilise kazasında, Hüseyin Çavuş evkafının eski mütevellisi, katibi ve yine görevdeyken ölen diğer mütevellisi üzerinde vakıf parası olduğundan, ilgililerin İstanbul'a ihzar edilip hesaplarının İstanbul kadısınca görülmesine dair hüküm.

İstanbul kãdîsına ve Kırkkilise kãdîsına ve Kırkkilise monlâsına hüküm ki:

Kırkkilise kazâsında vâkı‘ Hüseyin Çâvûş evkãfınun evlâdiyyet ve meşrûtiyyet üzre mütevellîsi olan Mustafâ gelüp Kırkkilise kazâsında sâkin mütevellî-i sâbık Mehmed ve Kâtib Mustafâ ve mütevellî iken fevt olan Abdurrahmân oğlı Hüseyin nâm kimesneler muhâsebelerin görmeyüp zimmetlerinde mâl-ı vakf olduğın bildürüp vakf-ı merkúm İstanbul kãdîları nezâretinde olmağla mezbûrlar İstanbul'a ihzâr ve muhâsebeleri görilmek bâbında hükm-i hümâyûnum recâ itmeğin sen ki İstanbul kãdîsı Mevlânâ-yı müşârun ileyhsin mezbûrlar İstanbul'a ihzâr olındukda muhâsebelerin şer‘le görmek hüküm yazılmışdur.

[Fî] evâsıt-ı C sene 100 [2-11 Nisan 1689]

13/122/598 İstanbul'da, vakıf mütevellisi ve borç verdiği vakıf paralar karşılığında rehin olarak aldığı değerli eşyayı saklayıp yerine değersiz nesneler koyarak vakfı zarara uğratan şahıs arasındaki ihtilafın ilgili kadılıkta görülmesine dair hüküm.

Kãimmakãm paşa ve İstanbul kãdîsına hüküm ki:

İstanbul'da vâkı‘ (boş) evkãfınun meşrûtiyyet üzre mütevellîsi olan Şeyh Mustafâ gelüp mahrûse-i mezbûrede sâkin el-Hâcc Osmân nâm kimesneyi mütevellîsi olduğı nükúd-ı vakfı i‘mâl ve istirbâh eylemek üzre tarafından ta‘yîn itmeğle mezbûr Hâcı Osmân mâl-ı vakfdan beş kîse akçe virdüm mukãbelesinde rehn aldum diyü bir çift zümrüd küpe gösterüp ba‘dehû ol küpeyi ihfâ bir kutıya taş pâresi vaz‘ ve mühürleyüp def‘a rehn olmak üzre bir incü tesbîh ile iki cevâhir kuşak ve bir sorguç deyni(?) gösterüp ânı dahi ihfâ ve yirine iki kiremid koyup bir kutı içinde mühürleyüp ve def‘a üç yüz guruş mukãbelesinde aldum diyü bir ok(?) cevâhir kuşak ile bir elmâs yüzük gösterüp ânı dahi ihfâ yirine bir pâre kurşun ile bir hurde incü kuşak vaz‘ eyleyüp mezkûrun mâl-ı vakfa küllî ihâneti zâhir olup vakfa gadr olınmağın mezkûr ahz olınup mâl-ı vakf tahsîl olınmak bâbında hükm-i hümâyûnum recâ itmeğin şer‘le tahsîl olınmak içün yazılmışdur.

Fî evâhir-i C sene 1100 [12-21 Nisan 1689]

13/128/625 İstanbul'da, Tercüman Yunus mahallesindeki bahçenin mutasarrıfı ve bu bahçenin, mütevellisi olduğu vakfa ait olduğunu, alıp başkasına kiralayacağını söyleyip müdahale eden Ahmet Paşa vakfı mütevellisi arasındaki ihtilafın ilgili kadılıkta görülmesine dair hüküm.

İstanbul kãdîsına hüküm ki:

Abdullâh arz-ı hâl idüp bunun mahrûse-i İstanbul'da (boş) câmi‘-i şerîfi kurbında Tercemân Yûnus mahallesinde vâkı‘ evlâdiyyet ve meşrûtiyyet üzre mutasarrıf olduğı bâğçesinde kimesnenün alâkası yoğiken müteveffâ Ahmed Paşa vakfı mütevellîsi olan (boş) nâm kimesne ol bâğçe benüm mütevellî olduğum vakfun akãrlarındandur alup âhara icâr iderüm diyü dahl itmeğle bundan akdem def‘atle murâfa‘a-i şer‘ olup ahvâlleri şer‘le görildükde men‘ birle cânib-i şer‘den hüccet-i şer‘iyye virilüp fasl-ı husûmet olınmışiken kanâ‘at itmeyüp tekrâr dahl ü nizâ‘dan hâlî olmadukların bildürüp hüccet-i şer‘iyyesi mûcebince amel olınup men‘ u def‘ olınmak içün emr-i şerîfüm recâ itmeğin hilâf-ı şer‘ rencîde itdürilmemek içün yazılmışdur.

Fî evâhir-i C sene 1100 [12-21 Nisan 1689]

13/132/646 Sultan Selim evkafından günlük on akçe ile ücretli olan Şeyh Mehmet, ama ve fakir olduğundan kendisine tam ücret verilmesine dair hüküm.

İstanbul'da vâkı‘ Sultân Selîm mütevellîsine hüküm ki:

Şeyh Mehmed gelüp mezkûr evkãf-ı merkúm mâlından olmak üzre yevmî on akçe ile vazîfeli olup a‘mâ ve fakïru’l-hâl olmağla temâmen vazîfe virile diyü hüküm yazılmışdur.

[Fî] evâhir-i C sene 1100 [12-21 Nisan 1689]

13/138/681 İstanbul'da, vakıftan aldığı ödünç para karşılığında mülk evini istiğlâl yoluyla verip borcu ödemeden ölen şahıs ve alacağı tahsil için istiğlâl olunan evi satmak isteyen vakıf mütevellisi arasındaki ihtilafın ilgili kadılıkta görülmesine dair hüküm.

İstanbul'da müfettiş-i evkãf-ı vekîli (boş) zîde ilmuhûya hüküm ki:

Mehmed gelüp vakf-ı mezbûr mâlından Altunıçok Alî Ağa'nun kız karındaşı oğlı Mustafâ nâm kimesne bin guruş alup mukãbelesinde mezbûr mahallâtından (boş) nâm mahallede vâkı‘ mutasarrıf olduğı mülk menzilini istiğlâl ve meblâğ-ı mezbûrı (boş) güne değin edâ itmiş iken menzil-i mezbûrı bey‘ olınup mâl-ı vakf edâ olınmak üzre nâm (boş) kimesneye vekâlet virüp ile(?) yedine hüccet-i şer‘iyye virüp meblâğ-ı mezbûr def‘ [ve] edâ itmedin merkúm Seyyid Mustafâ fevt olmağla bu dahi tevliyeti hasebiyle menzil-i mezbûrı şer‘le bey‘ itmek istedükde te‘allül üzre oldukların bildürüp ol bâbda hükm-i merkúm¹⁵ recâ itmeğin şer‘le görilmek içün yazılmışdur.

[Fî] evâhir-i C sene 1100 [12-21 Nisan 1689]

13/141/693 Ali Paşa-yı Atik evkafına ait İstanbul'da, Kara Gümrük'teki Hüseyin Paşa'nın tasarruf ettiği vakıf yer, mutassarıfın ölümü üzerine yedi çocuğuna, sonra bunların ikisi çocuksuz öldüğünden hisselerinin vakfa intikal ettiğine, buna rağmen bu iki hissenin kendilerine verilmesini isteyen mirasçıları ve vakıf mütevellisi arasındaki ihtilafın usulüne göre çözülmesine dair hüküm.

Kãimmakãm paşaya ve İstanbul'da müfettiş-i evkãf vekîline hüküm ki:

Bâbu’s-sa‘âde ağası Abdurrahmân Ağa arz gönderüp müteveffâ Alî Paşa-yı Atîk evkãfı akãrâtından mahmiyye-i İstanbul'da nefs-i Kara Gümrük icâre-i müeccele ve mu‘accele ile müteveffâ Hüseyin Paşa mutasarrıfiken fevt olup yedi nefer evlâdına intikãl idüp ba‘dehû evlâdlarınun ikisi bilâ veled fevt oldukda hisseleri bi hasebi’ş-şer‘ ve’l-kãnûn vakfa intikãl itmişiken vârisleri taraf-ı vakfa mürâca‘at itmedin vakfa intikãl iden iki hisseyi gabn-ı fâhiş ile bize virmedün diyü mütevellî-i vakfı rencîde eylemeleriyle bilâ veled fevt olan mezbûrânun hisseleri taraf-ı vakfa zabt itdürilüp mütevellî-i vakf rencîde olınmamak bâbında emr-i şerîfüm virilmek recâsına i‘lâm itmeğin şer‘le görilmek içün hüküm yazılmışdur.

Fî evâhir-i C sene [1]100 [12-21 Nisan 1689]

13/156/767 İstanbul'da, Koruk Mahmut mahallesinde kazdırdığı kuyunun bakım ve onarımı için Ayşe Hatun'un vakfettiği beş dükkan ile bir evi dürüst bir şekilde yöneten vakıf mütevellisine vaki müdahalenin önlenmesine dair hüküm.

Âstâne-i sa‘âdetde Ömer Paşa'ya ve İstanbul kãdîsına hüküm ki:

İbrâhîm nâm kimesne arz-ı hâl idüp mahrûse-i mezbûrda Koruk Mahmûd mahallesinde vâkı‘ merhûme Âyişe Hâtûn hafr eyledüği kuyunun meremmât vesâir mesârıfından fazla kalursa zabt olınmak üzre vakf ve şart eyledüği vakfiyyesine tahdîd ve tevzi‘inde müstağnî beş bâb dekâkin ve bir bâb menzilin yiğirmi seneden berü icâre-i mu‘accele vesâir rüsûmâtından kuyunun meremmâtı vesâir levâzım görildükden sonra on beş bin akçe fazla kalmağla meblağ-ı merkúme onı on bir buçuk hisâbı üzre istirbâh olınup rıbhi mahalle-i mezbûre avârızdan ve tasarruf olınmak üzre vakf-ı merkúm mütevellîsi olmağın ma‘rifet-i şer‘le cânib-i şer‘den virilen hüccet-i şer‘iyye mûcebince bin altmış senesinde yiğirmi seneye varınca (...) idüp mâl-ı vakfa hıyâneti yoğiken tevliyet-i mezbûrı âhara tevcîh olınmağla şer‘le muhâsebesin görüp zimmetin ibrâ idüp bir vecihle dahl olınmak icâb itmez iken merkúme şirrete sâlik olup ol hüccet-i şer‘iyyeye muğãyir hilâf-ı şer‘-i şerîf rencîdeden hâlî olmaduğın bildürüp hüccet-i şer‘iyyesi mûcebince amel olınup hüccet-i şer‘iyyeye muğãyir hilâf-ı şer‘ dahl [u] rencîde olınmayup men‘ u def‘ olınmak içün hüküm yazılmışdur.

[Fî] evâil-i R sene 1100 [24 Ocak-2 Şubat 1689]