Galata'da, Haseki Sultan evkafına ait evin, burada mektep ve çeşme yapmak isteyen Gümrük emini Hasan'ın mülk evi ile istibdaline dair hüküm

18/155/738 Üsküdar'daki Hacı Paşa evkafına ait İstanbul'daki dükkanların kira bedelleri hususunda vakıf mütevellisi ve kiracılar arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Üsküdar'da vâkı‘ müteveffâ Hâcı Paşa evkãfınun evlâdiyyet ve meşrûtiyyet üzre mütevellîsi olan Mehmed Sâdık gelüp evkãf-ı mezbûrun(?) defterde mukayyed akãrâtından mahmiyye-i İstanbul'da vâkı‘ oda dükkânlarınun müste’cirlerinden ecr-i misle mu‘âdil icârelerin taleb eyledükde içlerinden ba‘zıları(?) elimüzde olan temessük mûcebince virüp ecr-i misle mu‘âdil virmezüz diyü hilâf-ı şer‘ te‘allül eyledüğin bildürüp ol bâbda hüküm recâ itmeğin şer‘le görilmek içün yazılmışdur.

Fî evâhir-i Z sene [1]105 [13-21 Ağustos 1694 ]

18/167/792 İstanbul'da oturan vakıf mütevellisi Ayşe Hatun'un iki vekili arasında, birisinin vekillik süresindeki hesaplarının yanlışlığına ilişkin iddia sebebiyle doğan ihtilafın ilgili kadılıkta görülmesine dair hüküm.

İstanbul kãimmakãmına ve İstanbul kãdîsına hüküm ki:

Hamdî zîde kadruhû gelüp mahrûse-i İstanbul'da sâkine Âyişe nâm hâtûnun umûrın görmeğe vekîli³⁹ şer‘îsi olmağla vekîli olduğı eyyâmun şer‘le muhâsebesi görildükde masrûfından merkúmenün zimmetinde bir mikdâr hakkı zuhûr itmeğle muhâsebe defteri mûcebince edâ itmek üzre yedine temessük dahi virüp zimmetin ibrâ eyleyüp muhâsebesinde şübhe yoğiken yine mahrûse-i mezbûrda sâkin Mahmûd nâm kimesne mezbûrenün tarafından vekîli olmağla mezbûrenün bununla gördüği muhâsebe içün galat vardur icrâsında sen kefîl olmışdun diyü bin yüz dört senesinde bu mevcûd değil [iken] İstanbul'da Ahmed nâm kimesneyi tutup ahz ü habs ve cebr ü kerh eyledükde mezbûr Ahmed'ün vâlidesi (boş) nâm hâtûnun oğlı mezbûrı tahlîs içün gelüp bunun yiğirmi bin guruşluk emvâl ü eşyâsın fuzûlî ahz ve yine mahrûse-i mezbûrdan Köse Mehmed ve Hâcı Velî ve Mustafâ ve (boş) nâm kimesnelere ve dahi ba‘zılarına rehn vaz‘ ve mukãbelesinde alduğı altı bin guruş[ı] virüp oğlı mezbûrı tahlîs eyledükden sonra mezbûre hâtûn bunun câmi‘-i şerîfe vakf eyledüği menzil ve (boş) nâm mahallde vâkı‘ değirmenler vesâir eşyâsın fürûht eyledükden sonra meblağ-ı merkúm mukãbelesinde rehn vaz‘ eylediği yiğirmi bin guruşluk eşyâsın dahi fuzûlî âhara bey‘ ve zâyi‘ ve telef eyleyüp küllî gadr eyledüğin ve fetvâsı olduğın bildürüp hüküm recâ itmeğin şer‘le görilmek içün hüküm yazılmışdur.

Fî evâhir-i Z sene 1105 [13-21 Ağustos 1694]

18/175/828 İstanbul'da, Ümmî Sinanzade zaviyesinde Tezkireci Ahmet Efendi evkafının yeni mütevellisi ve üzerinde vakıf malı kaldığı iddia edilen eski mütevelli arasındaki ihtilafın ilgili kadılıkta görülmesine dair hüküm.

İstanbul kãdîsına hüküm ki:

İstanbul'da vâkı‘ Ümmî Sinânzâde zâviyesinde Tezkireci Ahmed Efendi evkãfınun mütevellîsi olan Mustafâ gelüp mahrûse-i mezbûrda sâkin sâbıkã vakf-ı mezbûr mütevellîsi olan Rıdvân mâl-ı vakfı ekl ü bel‘ ve kendü mesârifine sarf ve istihlâk idüp mâl-ı vakfa küllî gadr olmağla ma‘rifet-i şer‘le muhâsebesi görilüp zimmetinde zuhûr iden mâl-ı vakf her ne ise vakfiçün buna alıvirilmek bâbında hüküm recâ itmeğin mahallinde şer‘le görile diyü yazılmışdur.

Fî evâil-i M sene [1]106 [22-31 Ağustos 1694]

18/184/169 Aşık Paşa mahallesinde Seyit Vilayet(?) vakfına ait arsası mukataalı, binası mülk evin, mutasarrıfının ölümüyle tasarruf hakkı kendisine intikal eden eş ve evin vakfa intikal ettiğini söyleyip başkasına kiralayan vakıf mütevellisi arasındaki ihtilafın evvelce verilen mahkeme kararına göre çözülmesine dair hüküm.

İstanbul kãimmakãmına ve İstanbul'da şeyhülislâm nezâretinde olan evkãf müfettişine hüküm ki:

Mahmiyye-i mezbûr sâkinlerinden Âyişe nâm hâtûn Dergâh-ı mu‘allâma arz-ı hâl idüp mahmiyye-i mezbûr mahallâtından Âşık Paşa mahallesinde vâkı‘ müteveffâ es-Seyyid Vilâyet(?) vakfına senede yedi yüz yiğirmi akçe mukãta‘alu menzile mezbûrenün zevci es-Seyyid Mehmed nâm kimesne mutasarrıfiken menzil-i mezbûrun hâriciyyesinün ebniyesi harâb olup kãbil-i süknâ olmamağla bin seksen üç senesinde vakf-ı mezbûr mütevellîsi olan es-Seyyid Mahmûd nâm kimesne mezbûre hâtûnun zevci olan mezkûr Seyyid Mehmed'e menzil-i mezbûr hâriciyyesinün harâb olan ebniyesini hedm ve mâlıyla mülki olmak üzre müceddeden binâya izin virmeğle zevci mezbûr dahi ebniyesini hedm ve mâlıyla mülki olmak üzre müceddeden fevkãnî üç bâb oda ve bir suffa ve bir kenîf binâ itdükden sonra zevci mezbûr Seyyid Mehmed fevt oldukda menzil-i mezbûr müteveffâ-yı mezbûrun zevcesi mezbûre Âyişe ve sulbiyye kızı Şerîfe ve⁴⁰ Afîfe'ye ve ceddesi Sühandan(?) nâm hâtûna intikãl idüp ba‘dehû mezbûre Şerîfe Afîfe ile mezkûre Sühandan(?) müteveffiye olmalarıyla menzil-i mezbûr mezbûre Âyişe'ye intikãl itmişiken mütevellî-i vakfa intikãl eyledi diyü menzil-i mezbûrı âhardan Abdullâh nâm kimesneye beş yüz guruş icâre-i mu‘accele ve senede yedi yüz yiğirmi akçe müeccele ile îcâr ol dahi ba‘de’l-istîcâr Havvâ ve Rukıyye ve Latîfe nâm hâtûnlara bin sekiz yüz guruşa izn-i mütevellî ile ferâğ u tefvîz idüp mezbûre Âyişe'ye gadr olmağla bundan akdem Rûmili kãdîaskeri huzûrında murâfa‘a-i şer‘ oldukda mütevellî-i mezbûr müteveffâ-yı mezbûr Seyyid Mehmed menzil-i mezbûrda hâriciyyesinün harâb olan ebniyesini hedm ve mâlıyla mülki olmak üzre binâya izin virüp mezbûr Seyyid Mehmed dahi hâriciyye-i mezkûrenün ebniyesin hedm ve mâlıyla mülki olmak üzre müceddeden fevkãnî üç bâb oda ve bir suffa ve bir kenîf binâ eyledüği sâbit ve zâhir ve mülkiyyet üzre hüküm birle hüccet-i şer‘iyye virilüp ve bu makúle bir def‘a şer‘le görilüp fasl olınup hüccet-i şer‘iyye virilen da‘vânun tekrâr istimâ‘ı memnû‘iken ol hüccet-i şer‘iyyeye muğãyir tekrâr nizâ‘ ve bin yüz (boş) senesinde bir tarîkle hücceti elinden alup ve zikr olınan emlâki zabt idüp ziyâde gadr u te‘addî eyledüklerin ve bu bâbda şeyhülislâmdan da‘vâsına muvâfık fetvâ-yı şerîfesi olduğın bildürüp mûcebince şer‘le görilüp ol hüccet ve zikr olınan emlâki girü kendüye alıvirilüp zabt itdürilmek bâbında hükm-i hümâyûnum recâ itmeğin şer‘le görile diyü yazılmışdur.

[Fî] evâil-i M sene 1106 [22-31 Ağustos 1694]

18/195/915 Yemiş(?) adası muhafazasında iken ölen Mehmet Paşa'dan alacaklı olan şahıs ve Paşa'nın İstanbul'da sakin oğlu ile kefili arasındaki ihtilafın ilgili kadılıkta görülmesine dair hüküm.

İstanbul kãimmakãmına ve monlâsına hüküm ki:

Ahmed gelüp bunun babası müteveffâ el-Hâcc Hasan nâm kimesnenün Yemiş(?) cezîresi muhâfazasında iken fevt olan Mehmed Paşa'nun zimmetinde memhûr temessüki mûcebince bin beş yüz guruş hakkı olup sekiz yüz guruşını hâl-i hayâtında virüp bâkï yedi yüz guruşı zimmetinde kalmağın mahrûse-i mezbûrda sâkin oğlı Hüseyin ile İbrâhîm nâm kimesne meblağ-ı mezbûra(?) kefîl bi’l-mâl olmışlar iken taleb eyledükde virmekde te‘allül itmeleriyle şer‘le görile diyü yazılmışdur.

Fî evâsıt-ı M sene [1]106 [1-10 Eylül 1694]

18/195/917 Üsküdar'da, Kefce mahallesinde Babüssaade ağası İsmail Ağa'nın yaptırdığı Çifte hamamın, eski kiracısından alınıp başkasına kiralanmasına dair hüküm.

Üsküdar monlâsına hüküm ki:

Velî gelüp medîne-i mezbûrda Kefce mahallesinde vâkı‘ sâbıkã Bâbü’s-sa‘âde ağası müteveffâ İsmâ‘îl Ağa binâ eyledüği Çiftehammâmun müste’ciri olan Hâcı Muslı nâm kimesnenün senesi temâm olup vakfı mezbûrun huddâmı hoşnûd ve râzî olmamağla bin yüz altı Muharrem'i gurresinden sene-i mezbûre Zi’l-hicce'si gãyetine değin iki yüz elli guruşa der‘uhde olınup ve beher mâh vakf-ı mezbûra iki bin beş yüz akçe virüp vâkı‘ olan ta‘mîrâtı taraf-ı vakfdan ta‘mîr olınup müste’cir-i sâbık mezbûr el-Hâcc Muslı ve taraf-ı âhardan müdâhale olınmamak üzre vakf-ı mezbûrun meşrûtiyyet üzre mütevelliyesi olan Âyişe Hâtûn tarafından yedine memhûr temessük virilmeğle elinde olan temessüki mûcebince zabtiyçün emr-i şerîf virilmişdür.

Fî evâsıt-ı M sene [1]106 [1-10 Eylül 1694]

18/197/926 İstanbul'da, Lala Hayreddin Bey evkafına ait Büyük Ayasofya yakınında icâreteynli evin kirasını isteyen mütevelli ve evin mülkleri olduğu iddiasıyla ödemekten kaçınan mutasarrıfın küçükleri arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

İstanbul'da vâkı‘ müteveffâ Lala Hayreddîn Beğ evkãfı mütevellîsi (boş) nâm kimesne gelüp vâkıf-ı merkúmun vakfiyye-i ma‘mûlün bihâsında mukayyed akãrâtından Ayasofya-i kebîr kurbında icâre-i mu‘accele ve müeccele ile vakf menzilün mutasarrıfı olan müteveffâ İmâm Alî Efendi'nün eytâm-ı sığãrınun vasîsi olan İbrâhîm'den icâresin taleb eyledükde eytâm-ı sığãra babalarından intikãl itmeğle mülkleridür diyü te‘allül eyledüğin ve hüccet-i şer‘iyyesi olduğın bildürüp şer‘le görile diyü hüküm yazılmışdur.

[Fî] evâsıt-ı M sene [1]106 [1-10 Eylül 1694]

18/198/931 İstanbul'da, Lala Hayreddin Bey evkafına ait Büyük Ayasofya yakınında icâreteynli evin kirasını isteyen mütevelli ve evin mülkleri olduğu iddiasıyla ödemekten kaçınan mutasarrıfın küçükleri arasındaki ihtilafın ilgili kadılıkta görülmesine dair hüküm.

İstanbul kãimmakãmına ve monlâsına hüküm ki:

İstanbul'da vâkı‘ müteveffâ Lala Hayreddîn Beğ evkãfınun mütevellîsi olan (boş) gelüp vâkıf-ı merkúmun vakfiyye-i ma‘mûlün bihâsında mukayyed akãrâtından Ayasofya-i kebîr kurbında icâre-i mu‘accele ve müeccele ile vakf menzilün mutasarrıfı olan müteveffâ İmâm Alî Efendi'nün eytâm-ı sığãrınun vasîsi olan İbrâhîm nâm kimesneden ecr-i misle mu‘âdil icâresin taleb eyledükde eytâm-ı sığãra babalarından intikãl itmeğle mülkleridür diyü virmekde te‘allül eyledüğin ve hüccet-i şer‘iyyesi olduğın bildürüp mûcebince şer‘le görilüp icrâ-yı hakk olınmak bâbında emr-i şerîfüm recâ itmeğin şer‘le görilmek üzre emr-i şerîf yazılmışdur.

Fî evâsıt-ı M sene 1106 [1-10 Eylül 1694]

18/219/1018 İstanbul'da, Yavuz Sultan Selim vakfından ulemâdan Pişgürezâde(?) Şeyh Seyit Abdülkadir'e düşen mahlulden birkaç çift fodula verilmesine dair hüküm.

İstanbul'da Sultân Selîm-i Atîk evkãfı mütevellîsine hüküm ki:

Ulemâdan Pişgürezâde(?) Şeyh Seyyid Abdülkãdir Dergâh-ı mu‘allâma gelüp mezkûr sâdât-ı kirâmdan ve meşâyihden olup ehl ü iyâl ve⁴¹ vech-i ma‘âşda küllî zarûreti olmağla evkãf-ı mezbûre izdiyâdından düşen mahlûlden takãss olmak üzre birkaç çift fodula virilmek bâbında hüküm recâ itmeğin sen ki mütevellî-i mezkûrsun vakf-ı mezbûrun izdiyâdı olup düşenden takãss olınmak üzre iki çift fodula virilmek üzre hüküm yazılmışdur.

Fî evâsıt-ı M sene [1]106 [1-10 Eylül 1694]

18/222/1036 Fodula(?) ağası İsmail Ağa evkafının katibinin ölümüyle katiplik hizmetinin oğluna verildiğine, halen katiplik hizmetinin küçük olan bu şahsın vekilince ifa edileceğine ve kendilerine müdahale olunmamasına dair hüküm.

İstanbul kãimmakãmına hüküm ki:

Sarây-ı cedîd-i âmirem ağası olan dâme ulüvvuhûya dahi yazıldı.

Mustafâ gelüp müteveffâ Fodula(?) ağası İsmâ‘îl Ağa evkãfınun yevmî dokuz akçe vazîfe ile kâtibi olan babası Yûsuf fevt oldukda ecânibden Mehmed bin Hüseyin nâm kimesne bir tarîkile berât itdürüp hâlâ kitâbet-i mezbûr babası fevtinden ve mezkûr Mehmed ref‘inden buna tevcîh olınup berât-ı şerîfümle üzerinde olmağla irişüp hıdmet-i kitâbete kãdir olınca tarafından nasb eyledüği vekîli edâ-yı hıdmet idüp ref‘ olınan mezkûr Mehmed bin Hüseyin tarafından ve âhardan müdâhale olınmamak bâbında hüküm recâ itmeğin irişüp hıdmet-i kitâbete kãdir olınca yirine vekîl nasb idüp âhardan müdâhale olınmaya diyü emr-i şerîf virilmişdür.

Fî evâhir-i M sene [1]106 [11-20 Eylül 1694]

18/246/1147 İstanbul'da, Cerrahî(?) Ahmet Paşa mescidi vakfının mütevellisinin vakıf için kullandığı mührün, sahteciliği önlemek için, mahkemede bir kağıda bastırılıp bundan sonraki yazılarına uygulanmak üzere saklanmasına dair hüküm.

İstanbul kãdîsına hüküm ki:

Mustafâ Halîfe gelüp mahrûse-i İstanbul'da vâkı‘ müteveffâ Cerrâhî(?) Ahmed Paşa mescidinün müezzini Ömer fevt olup mahlûlinden buna tevcîh olınmak üzre meşrûtiyyet üzre mütevelliyesi olan Fâtıma nâm hâtûn yedine mühürlü arz virmişiken Ahmed(?) nâmına bir kimesne içün dahi sâhte mütevellî arzı ibrâz itmeleriyle mühürleri tatbîk(?) içün mütevellîye-i mezbûrenün mühri irsâl(?) olınmak bâbında emr-i şerîfüm recâ itmeğin sen ki mevlânâ-yı mûmâ ileyhsin mütevellîye-i mezbûreyi meclis-i şer‘a ihzâr idüp vakfiçün isti‘mâl ve ma‘mûlün bih olan mührini huzûrunda bir kâğıda basdurup(?) fîmâ ba‘d vâkı‘ olan arzları tatbîk(?) olınmak üzre mahalline(?) hıfz içün irsâl olına diyü yazılmışdur.

Fî evâhir-i M sene [1]106 [11-20 Eylül 1694]

18/249/1164 İstanbul'da hassa çamaşırcı ocağı hizmetlilerinin nukud vakfına bağlı nukud vakıflarının eski mütevellisinin hesaplarının görülmesine dair hüküm.

İstanbul kãimmakãmına ve monlâsına hüküm ki:

Mahrûse-i İstanbul'da hâssa Câmeşûyhâne ocağı huddâmınun ta‘âmiyyesine vakf olan nükúd akçenün berât-ı şerîfümle mütevellîsi Hâcı Ahmed(?) zîde kadruhû arz-ı hâl idüp vakf-ı merkúmun mülhakãtından Voynuk(?) Ahmed ve Rıdvân ve Ramazân ile Belkïs nâm hâtûnun nükúd-ı mevkûfelerinün sâbıkã mütevellîsi Boyacı Hüseyin nâm kimesne zimmetinde mâl-ı vakf olmağla şer‘le muhâsebesi görilmek içün hüküm yazılmışdur.

Fî evâil-i S sene [1]106 [21-30 Eylül 1694]

18/257/1197 İstanbul'da, Canbaziye mahallesinde Cerrah Mehmet Paşa vakfına ait odaların kiracılarından emsalinden ziyade kira talep edilmemesine dair hüküm.

İstanbul kãimmakãmına ve şeyhülislâm nezâretinde olan evkãfun müfettişi mevlânâya hüküm ki:

Mahrûse-i İstanbul mahallâtından Cânbâziyye mahallesinde Cerrâh Mehmed Paşa vakfından icârelü dokuz aded vakf odalarun müste’cirleri arz-ı hâl idüp vakf-ı merkúm mütevellîsi vakf odalardan icâre-i mislinden ziyâde icâre talebiyle rencîde itmeğle şeyhülislâm fetvâsı mûcebince hüküm virilmişdür.

[Fî] evâil-i S sene [1]106 [21-30 Eylül 1694]

18/266/1238 Hacı Hüseyin'in vakfettiği nükudun mütevellisi ve vakıf malını yiyip bunun tevliyetine karışan eski mütevellileri Musa Hoca ile Seyit Abdülfettah arasındaki ihtilafın ilgili kadılıkta görülmesine dair hüküm.

İstanbul'da şeyhülislâm nezâretinde olan evkãf müfettişi olan (boş) zîde ilmuhûya hüküm:

El-Hâcc Mehmed gelüp müteveffâ babası el-Hâcc Hüseyin'ün vakf eyledüği nükúdun berât ile mütevellîsi olmağla nükúd-ı mevkûfeye İstanbul sâkinlerinden sâbıkã mütevellî olan Mûsâ Hâce ile Seyyid Abdülfettâh nâm kimesneler hilâf-ı şer‘-i şerîf ve muğãyir-i şart-ı vâkıf mâl-ı vakfı ekl ü bel‘ itmeleriyle ziyâde gadr u te‘addî eyledüklerinden gayri hilâf-ı şart-ı vâkıf ve bilâ berât bunun tevliyeti umûrına karışup te‘addîden hâlî olmadukların [bildürüp] hüküm recâ şer‘le görilüp mezbûrlarun zimmetlerinde zuhûr iden mâl-ı vakf vakf içün alıvirilmek içün hüküm yazılmışdur.

Fî evâil-i S sene [1]106 [21-30 Eylül 1694]

18/272/1260 İstanbul'da, vakıf Bayram Paşa sarayının tasarruf nöbeti kendisine intikal eden kimse ve burada zorla sakin olup çıkmayan şahıs arasındaki ihtilafın ilgili kadılıkta görülmesine dair hüküm.

İstanbul kãimmakãmına ve monlâsına hüküm ki:

(Boş) nâm hâtûn gelüp mahrûse-i İstanbul'da vâkı‘ Bayrâm Paşa sarâyı dimeğle ma‘rûf sarâyı bunun ceddi tescîl-i şer‘î ve teslîm ile’l-mütevellî birle vakf ve süknâsını evlâd-ı evlâdına şart idüp vech-i meşrûh üzre vakfiyyeti vakfiyye-i ma‘mûlün bihâsında mastûr u mukayyed olup ve bu evlâddan olmağla nevbet-i tasarruf buna intikãl itmeğin meşrûtiyyet üzre sâkine olmak istedükde ecânibden Alî nâm kimesne zikr olınan sarâyda teğallüben sâkin olmağla çıkmayup buna küllî gadr u te‘addî olduğın bildürüp mezkûr Alî ihrâc olınup meşrûtası olan sarâyda iskânına hilâf-ı şart-ı vâkıf kimesne mâni‘ olmamak bâbında hüküm recâ itmeğin şer‘le görile diyü yazılmışdur.

Fî evâsıt-ı S sene [1]106 [1-10 Ekim 1694]

18/273/1266 İstanbul yakınında Hasköy'de, ölen kişiden intikal eden Piri Mehmet Paşa evkafına ait hamamı usulüne göre mallarıyla onarıp ecr-i misle denk kirasını vermeğe razı olan şahıslardan ecr-i mislinden ziyade kira istenmemesine dair hüküm.

İstanbul kãdîsına hüküm ki:

Hâcı Mehmed ve Hâcı İsmâ‘îl ve Hâcı Alî nâm kimesneler gelüp sen ki mevlânâ-yı mûmâ ileyhsin taht-ı nezâretinde olup İstanbul kurbında Hasköy nâm karyede vâkı‘ müteveffâ Pîrî Mehmed Paşa evkãfı akãrâtından icâre-i mu‘accele ve müeccele ile hammâm[a] babaları el-Hâcc Mehmed nâm kimesne mutasarrıf iken fevt oldukda bunlara intikãl itmeğle bunlar dahi zabt ve harâbesin ma‘rifet-i şer‘le mâllarıyla ta‘mîr idüp hammâm-ı mezbûrun ecr-i misle mu‘âdil icâre-i mu‘accele ve müeccelesin virmeğe râzîlar iken vakf-ı merkúm mütevellîsi ecr-i mislinden ziyâde talebiyle te‘addî eyledüğin ve bu bâbda şeyhülislâmdan fetvâ-yı şerîfe ve hüccet-i şer‘iyyeleri olduğın bildürüp mûcebince amel olınup ol cânibe âhar husûsiçün emr-i şerîfümle mübâşir ta‘yîn olınan (boş) çâvûş ma‘rifetiyle ehl-i vukúf bîgaraz müslimîn ile hammâm-ı merkúm şer‘le keşf olınup ecr-i mislinden ziyâde talebiyle te‘addî olınmamak üzre hüküm yazılmışdur.

Fî evâsıt-ı S sene 1106 [1-10 Ekim 1694]

18/276/1280 Beşiktaş'ta, Kılıç Ali Paşa evkafının mütevellisi ve vakıf malını yemekle suçlanan eski vakıf mütevellisi arasındaki ihtilafın ilgili kadılıkta görülmesine dair hüküm.

İstanbul'da şeyhülislâm nezâretinde olan evkãf müfettişine hüküm ki:

Şeyhülislâm nezâretinde olan evkãfdan Beşiktaş'da vâkı‘ müteveffâ Kılıç Alî Paşa evkãfınun berât ile mütevellîsi olan Mustafâ gelüp mahrûse-i İstanbul sükkânından sâbıkã vakf-ı merkúmun mütevellîsi olan Abdullâh mâl-ı vakfı ekl ü bel‘ idüp zimmetinde küllî mâl-ı vakf olup şer‘le tahsîl ve alıvirilmek bâbında hüküm recâ itmeğin şer‘le görile diyü emr-i şerîf virilmişdür.

Fî evâsıt-ı S sene [1]106 [1-10 Ekim 1694]

18/280/1299 İstanbul ve İzmit'teki Pertev Paşa evkafının mütevellisi ve üzerinde vakıf malı bulunan eski mütevelli arasındaki ihtilafın ilgili kadılıkta görülmesine dair hüküm.

İstanbul'da vâkı‘ sadr-ı a‘zam nezâretinde olan evkãf müfettişine hüküm ki:

Müteveffâ Pertev Paşa'nun İstanbul ve İznikmid'de evkãfınun evlâdiyyet ve meşrûtiyyet üzre mütevelliyesi olan fahrü’l-muhadderât Havvâ Hânım Dergâh-ı mu‘allâma arz-ı hâl idüp evkãf-ı mezbûrun tevliyeti bundan akdem üzerinde iken âhardan Hâcı Mehmed nâm kimesne hilâf-ı inhâ ile alup hâlâ tevliyet-i mezbûr ibkã ve mukarrer kılınup lâkin mezbûr birkaç seneden berü mâl-ı vakfı ekl ü bel‘ eylemeğle zimmetinde olan mâl-ı vakf şer‘le alıvirilmek içün hüküm yazılmışdur.

Fî evâsıt-ı S sene 1106 [1-10 Ekim 1694]

18/289/1328 İstanbul'da, Haseki Sultan câmi‘ ve imâreti evkafına ait Bezzazistan yakınındaki odanın mutasarrıfının çocuksuz ölmesiyle, vakfa intikal eden odayı kiralayan şahıs ve bu odayı, ölen mutasarrıfın sağlığında kendisine kiraladığını söyleyen kimse arasındaki ihtilafın usulüne göre çözülmesine dair hüküm.

İstanbul kãimmakãmına ve müfettiş-i evkãf vekîline hüküm ki:

Mahrûse-i mezbûrda vâkı‘ merhûme ve mağfûrun lehâ Haseki Sultân câmi‘-i şerîf ve imâret-i âmiresi evkãfınun mütevellîsi olan Abdullâh gelüp vakf-ı merkúmun icâre-i mu‘accele ve müeccele ile tasarruf olınagelen akãrâtından mahrûse-i mezbûrda Bezzâzistân kurbında bir bâb odaya mutasarrıf olan Kapucı(?) Sarı Osmân oğlı Mehmed bilâ veled fevt olup ol oda vakfa intikãl itmeğle ba‘de’l-müzâyede taraf-ı vakfdan tâlibine beş yüz elli guruşa îcâr olınmışiken âhardan dîğer Mehmed nâm kimesne müteveffâ-yı mezbûr Osmân oda-i merkúma mutasarrıfiken hayâtında izn-i mütevellî ile bana îcâr itmişidi diyü zûr şâhid ikãmetiyle nizâ‘ ve cânib-i vakfdan istîcâr idenün tasarrufına mâni‘ olup vakfa gadr eyledüğin bildürüp şer‘le görilüp ihkãk-ı hakk olınmak bâbında şer‘le görile diyü yazılmışdur.

Fî evâsıt-ı S sene [1]106 [1-10 Ekim 1694]

18/290/1331 Sadrazam Mustafa Paşa evkafının mütevelli kãimmakãmı ve üzerinde vakıf malından akçe zuhur eden mütevelli vekili arasındaki ihtilafın ilgili kadılıkta görülmesine dair hüküm.

Âstâne kãimmakãmına ve kãdîsına hüküm ki:

Vezîr-i a‘zam-ı sâbık müteveffâ Mustafâ Paşa evkãfınun hâlâ mütevellî kãimmakãmı olan el-Hâcc Mahmûd gelüp bundan akdem bin yüz bir Receb'i gurresinden bin yüz dört Cumâde’l-âhir'i gãyetine değin vakf-ı merkúmun mütevellî vekîli olan İstanbul'da sâkin Mehmed Hamdî nâm kimesnenün bin yüz dört senesinde fermân ile kãdîaskerüm huzûrında şer‘le muhâsebesi görildükde memhûr muhâsebe defteri mûcebince mezkûr Mehmed Hamdî'nün zimmetinde mâl-ı vakfdan üç yük doksan üç bin yüz akçe zuhûr itmeğle meblağ-ı merkúm müste’cirînün(?) zimmetlerinde bâkï(?) diyü müste’cirlerden⁴² havâle itmeğin müste’cirlerden taleb olındukda merkúm Mehmed Hamdî'ye virdük diyü temessük ibrâz itmeleriyle mezkûr Mehmed Hamdî'den istendükde virmekde te‘allül üzre olduğın bildürüp zimmetinde müteveccih olan mâl-ı vakf alıvirilmek bâbında hüküm mahallinde şer‘le görilüp yanında olan mâl-ı vakf tahsîl olınmak içün yazılmışdur.

Fî evâsıt-ı S sene [1]106 [1-10 Ekim 1694]

18/291/1335 İstanbul'da, Haseki Sultan evkafı mütevellisi ve vakfın icâreteyn usulü ile tasarruf ettikleri mahzen ve dükkanların ecr-i misle denk kiralarını ödemeyen kiracıları arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Mahrûse-i İstanbul'da vâkı‘ merhûm Haseki Sultân tâbe serâhunun evkãfı mütevellîsi Abdullâh gelüp vakf-ı merkúmun icâre-i mu‘accele ve müeccele ile tasarruf olınagelen akãrâtından mahzen ve dekâkîne hâlâ mutasarrıf olan müste’cirlerinden ecr-i misle mu‘âdil icârelerin vakfiçün virmekde te‘allül üzre oldukların bildürmeğle akãrât-i mezbûrun hâlâ mutasarrıfı olan müste’cirlerinden icâreleri şer‘le alıvirilmek içün yazılmışdur.

Fî evâhir-i S sene [1]106 [11-19 Ekim 1694]

18/303/1383 İstanbul'da, Mehmet Paşa câmi‘ imamlığının belli vazife ile ulemadan Salih'e verildiğini bildiren ruus-ı hümâyûn suretinin İstanbul'daki Küçük evkaf muhasebesi defterlerine kaydolunmasına dair hüküm.

İstanbul kãimmakãmına hüküm ki:

Ulemâdan Sâlih gelüp mahrûse-i İstanbul'da vâkı‘ müteveffâ Mehmed Paşa câmi‘-i şerîfinün imâmeti vazîfe-i mu‘ayyenesiyle buna tevcîh olınmağla yedine virilen sûret-i ruûs-ı hümâyûnum Âstâne-i sa‘âdetümde olan Küçük evkãf muhâsebesi defterlerine kayd olınmak bâbında emr-i şerîfüm recâ itmeğin vech-i meşrûh üzre amel olına diyü yazılmışdur.

Fî evâhir-i S sene [1]106 [11-19 Ekim 1694]

18/304/1385 İstanbul'da, Balatkapısı yakınındaki Hızır Çavuş mescidi evkafının tevliyetinin evladdan olmakla kendi üzerinde olduğunu bildiren şahıs ve tevliyeti bir yolla üzerine berat ettiren kimse arasındaki ihtilafın ilgili kadılıkta görülmesine dair hüküm.

İstanbul kãdîsına hüküm ki:

Mehmed gelüp sen ki mevlânâ-yı mûmâ ileyhsin taht-ı nezâretinde olan evkãfdan mahrûse-i İstanbul'da Balat kapusı kurbında vâkı‘ ceddi Hızır Çâvûş binâ eyledüği mescidi evkãfınun tevliyeti vakfiyye-i ma‘mûlün bihâsında evlâdına şart ve ta‘yîn idüp bu evlâddan olmağla meşrûtiyyet üzre berât-ı şerîfümle mutasarrıfiken âhardan A‘rec İbrâhîm nâm kimesne tevliyet-i merkúmı hilâf-ı inhâ bir tarîkle üzerine berât itdürüp gadr itmeğle tevliyet-i merkúme evlâda meşrûta olup ve bu evlâddan mıdur ve kangısı mahall ü müstahıkkdur şer‘le tefahhus olınup vukú‘ı üzre arz olına diyü yazılmışdur.

Fî evâhir-i S sene [1]106 [11-19 Ekim 1694]

18/307/1398 Galata'da, Hüsam Bey mahallesinde Hacı Kasım evkafı mütevellisi ve vakıftan alacağı olduğu iddiası ile vakıf malını kendi işlerine harcayan eski mütevelli arasındaki ihtilafın ilgili kadılıkta görülmesine dair hüküm.

Galata kãdîsına hüküm ki:

Medîne-i mezbûrda vâkı‘ Hüsâm Beğ mahallesinde müteveffâ Hâcı Kãsım evkãfı mütevellîsi olan Mehmed gelüp vakf-ı mezbûrun sâbıkã mütevellîsi olan İbrâhîm nâm kimesnenün vakf zimmetinde alacağı olmayup ve müdde‘âsın vech-i şer‘î üzre isbât itmedin vakf zimmetinde alacağum vardur diyü mâl-ı vakfı ahz ü kabz ve kendü mesârifine sarfla istihlâk ve birkaç seneden berü muhâsebesin görmeyüp vakfa gadr itmeğle şer‘le muhâsebesi görilüp zimmetinde zuhûr iden mâl-ı vakf şer‘le alıvirilmek bâbında hüküm recâ itmeğin mahallinde şer‘le görilüp mâl-ı vakf zimmetinde zuhûr ider ise şer‘le tahsîl olına diyü yazılmışdur.

Fî evâhir-i S sene [1]106 [11-19 Ekim 1694]