Galata'da, Haseki Sultan evkafına ait evin, burada mektep ve çeşme yapmak isteyen Gümrük emini Hasan'ın mülk evi ile istibdaline dair hüküm

26/29(?)/142 Kasımpaşa'da, Okmeydanı yakınında Sakız muharebesi yüzünden vakıf gelirlerinin düşmesiyle ancak mürtezikaların vazifelerini verebildiğini bildiren Piyale Paşa câmi‘ evkafı mütevellisine, vakfedenin şartına aykırı müdahale edilmemesine dair hüküm.

İslâmbol kãimmakãmına ve İslâmbol'da müfettiş-i evkãfı⁷⁵ vekîline hüküm ki:

Galata kazâsı muzâfâtından Kãsım Paşa'da Okmeydânı kurbında vâkı‘ kapudân-ı sâbık Gãzî Piyâle Paşa binâ eyledüği câmi‘-i şerîf evkãfınun evlâdiyyet ve meşrûtiyyet üzre mütevellîsi olan Ahmed gelüp vakf-ı mezbûrun ekser mustakaffâtı⁷⁶ cezîre-i Sakız'da olup Sakız ma‘rekesinde vakf-ı mezbûrun iki hânı ve hammâmı ve dükkânın vesâir akãrâtınun ekseri harâba müşrif olduğından mâ‘adâ bir mikdârı dahi kal‘a mevâzi‘i(?) içün hedm olınmağın mahsûl-i mâni‘⁷⁷ za‘f târî olup müsâ‘adesi olmayup vakf-ı mezbûr mürtezikalarınun vazîfelerin şart-ı vâkıf ve vakfiyye-i ma‘mûlün bihâ mûcebince virmekde râzîlar iken mezbûrlar kanâ‘at itmeyüp hilâf-ı şart-ı vâkıf muhdes vazîfe ve şart-ı vâkıfa muğãyir ziyâde talebiyle dahl ü rencîde eyledüklerin bildürüp vakf-ı mezbûrun musakkafât ve akãrâtı ma‘rifet-i şer‘le tahrîr ve vakf ve mürtezikalarun vazîfeleri şart-ı vâkıf ve vakfiyye-i ma‘mûlun [bihâ] mûcebince ziyâde talebiyle olınmamak içün yazılmışdur.

Fî evâsıt-ı Z sene [1]108 [1-10 Temmuz 1697]

26/29(?)/143 Haslar'da, atası Çoban(?) Bey'in vakfettiği çiftlik yerlerinin tasarruf nöbeti kendisine intikal eden kadın ve bu yerlerin gelirine müdahale eden şahıs arasındaki ihtilafın usulüne göre çözülmesine dair hüküm.

Müfettiş-i evkãfı⁷⁸ vekîline hüküm ki:

Âyişe Hâtûn gelüp bunun ceddi müteveffâ Çoban(?) Beğ Hâslar kazâsına tâbi‘ yirlerinün hâsıl olan gallesin evlâdına ve evlâd-ı evlâdına vakf idüp vech-i meşrûh üzre vakfiyyeti defter-i cedîd-i hâkãnîde mukayyed ve mezbûre evlâddan olup nevbet-i tasarruf kendüye intikãl itmişiken İslâmbol'da sâkin müteveffâ Süleymân Paşa oğlı (boş) nâm kimesne ol çiftlik yirlerinün hâsıl olan gallesine hilâf-ı defter müdâhale idüp gadr itmeğle sen ki Mevlânâ-yı mûmâ ileyhsin şer‘le görmek içün yazılmışdur.

Fî evâsıt-ı Z sene [1]108 [1-10 Temmuz 1697]

26/74/394 Filibe'de, Yeni İslamlı(?) köyünde Köprülü Mehmet Paşa kethüdası Mehmet'in câmi‘nin tevliyetine mutasarrıf kadının ölümü üzerine tasarruf nöbeti kendisine intikal eden kişi ve tevliyeti zapteden şahıs arasındaki ihtilafın Divan-ı Edirne'de görülmesine dair hüküm.

Âstâne-i sa‘âdet kãimmakãmına hüküm ki:

Hüseyin gelüp Filibe kazâsında İslâmlu-i(?) cedîd nâm karyede Köprüli Mehmed Paşa kethudâsı Mehmed'ün binâ eyledüği câmi‘-i şerîfün tevliyeti evlâd-ı evlâdına ve ba‘dehû utekãsına şart eyledüği vakfiyyesinde mastûr iken ber mûceb-i şart-ı vâkıf mutasarrıf olan Fâtıma Hâtûn fevt olup nevbet-i tasarruf tevliyeti bunun iken âhar mahallde bulınmağla (kesik) mahmiyye-i mezbûrede sâkin Abdurrahmân alup gadr itmeğle Dîvân-ı Edirne'ye ihzâr (kesik) huzûrında ahvâlleri görilmek içün nâzır-ı vakf Dâru’s-sa‘âde ağası Alî tarafından (kesik) mûcebince ihzâriçün yazılmışdur.

[Fî evâhir-i M sene 1109](?) [9-18 Ağustos 1697]

26/80/428 Haslar'da, Şeyh Şüca Efendi vakfı eski mütevellisi, muhasebesi görülüp üzerindeki vakıf malı alınmadan vefat ettiğinden, terekesini kabzeden mirasçıları ile murafaa olunup zuhur eden vakıf malının tahsiline dair hüküm.

Hâslar nâibine ve kassâma hüküm ki:

Medîne-i Hâslar'da vâkı‘ müteveffâ Şeyh Şücâ‘ Efendi vakfınun hâlâ mütevellîsi olan Abdülganî gelüp vakf-ı mezbûrun sâbıkã mütevellîsi olan Dervîş Mehmed nâm kimesneden muhâsebesin görüp zimmetinde zuhûr iden mâl-ı vakfı almadın fevt olmağla muhallefâtın kabz iden oğlı Mustafâ'nun sağïr oğlı Abdülkãdir'ün vâlidesi ve vasiyyesi Hadîce nâm hâtûn ile murâfa‘a-i şer‘ olup zuhûr [iden] mâl-ı vakfı müteveffânun muhallefâtın vakfiçün alup kabz itmek istedükde te‘allül itmeğle şer‘le görilüp zuhûr iden mâl-ı vakf tahsîl itdürilmek içün yazılmışdur.

Fî evâil-i S sene [1]109 [19-28 Ağustos 1697]

26/89/483 İstanbul'da, Küçük Ayasofya zaviyesi vakfı mütevellisi ve hücre vazifesi ile yemek akçelerinin eksik ödenmek istendiğinden şikayet eden Küçük Ayasofya zaviyesi mensupları arasındaki ihtilafın usulüne göre çözülmesine dair hüküm.

Âstâne kãimmakãmına ve Âstâne'de Haremeyn-i şerîfeyn müfettişi vekîline hüküm ki:

İstanbul'da Küçük Ayasofya zâviyesinün şeyhi olan Abdüllatîf ile zâviye-i mezbûrede sâkin dervîşân fukarâsı gelüp zâviye-i mezbûrun meşîhat(?) ve dervîşân fukarâsınun hucurât vazîfesi ve ta‘âmiyyeleriyçün mahmiyye-i mezbûrda vâkı‘ evkãf-ı merkúme mülhakãtından (boş) hammâmı dimeğle ma‘rûf hammâmun icâresinden beher şehr iki bin iki yüz elli akçe evkãf-ı mezbûrun vakfiyyesinde şart ve ta‘yîn olınup kadîmden bu âna değin alınugelüp ve vakfda müsâ‘ade kemâlde iken hâlâ vakf-ı mezbûr mütevellîsi Mehmed nâm kimesne meşîhat(?) ve dervîşân fukarâsınun hucurât vazîfesi ve ta‘âmiyyeleri akçesin hilâf-ı şart-ı vâkıf noksân teklîf idüp te‘addî itmeğle vech-i meşrûh üzre şer‘le görilmek içün yazılmışdur.

Fî evâsıt-ı S sene [1]109 [29 Ağustos-7 Eylül 1697]

26/90/487 Üsküdar'da, Hüdayi Mahmut Efendi evkafına bağlı Saliha Hatun evkafı nükudu mütevellisi ve türlü bahanelerle bunun muhasebesinin görülmesini isteyen vakfa hıyaneti sabit olan eski vakıf mütevellisi arasındaki ihtilafın eskiden olduğu gibi Üsküdar kadılarınca görülmesine dair hüküm.

İstanbul kãimmakãmına ve Üsküdar nâibine hüküm ki:

Mahrûse-i Üsküdar'da vâkı‘ Hüdâyî Mahmûd Efendi kuddise sırruhu’l-azîzün evkãfı mülhakãtından müteveffiye Sâliha Hâtûn evkãfı nükúdınun berâtile mütevellîsi Abdülgaffâr bin Şa‘bân gelüp vakf-ı mezbûrun sâbıkã mütevellîsi olup Üsküdar'da sâkin Hüseyin nâm kimesne mâl-ı vakfı ekl ü bel‘ itmeğle bundan akdem emr-i şerîfümle şer‘le muhâsebesi görildükde hıyâneti zâhir olmağla ref‘inden tevliyet-i mezbûr yevmî yiğirmi akçe vazîfe ile kendüye tevcîh olınup berât-ı şerîfüm virilmişiken mezbûr Hüseyin şirrete sülûk idüp gâh meşrûtamdur ve gâh vakfa gadr murâd itmeğle tekrâr muhâsebemi hevâsına tâbi‘ kãdî ve müfettiş ile görürüm diyü te‘allül idüp bu âna gelince kimesnenün nezâretinde olmayup olmayup⁷⁹ ancak nâzır-ı vakf ma‘rifetiyle Üsküdar kãdîları göregelmeğle vech-i meşrûh üzre şer‘le görilmek recâsına Anadolı muhâsebesi defterlerine nazar olındukda tevliyet-i mezbûr mezkûr Hüseyin'ün ref‘inden kendüye tevcîh olınduğı mastûr u mukayyed bulınmağın vech-i meşrûh üzre şer‘le görmenüz içün yazılmışdur.

[Fî] evâsıt-ı S sene [1]109 [29 Ağustos-7 Eylül 1697]

26/94/507 İstanbul'da, Murat Paşa câmi‘ yakınında Pir Mehmet mescidi ve muallimhanesinin Bursa'da oturan mütevellisi Fatma Hatun'un öldüğünü belirtip kãimmakãmının muhasebesinin görülüp ortaya çıkacak vakıf malı ile mescitle muallimhanenin onarılmasını isteyen şahıs ve Fatma Hatun'un İstanbul'da oturan kãimmakãmı arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Mehmed gelüp İstanbul'da Murâd Paşa câmi‘i kurbında Pîr Mehmed binâ eyledüği mescid ve mu‘allimhânenün ber vech-i meşrûta mütevelliyesi olup vâlidesi Fâtıma nâm hâtûn Burusa'da sâkin olmağla tarafından kãimmakãmı olup mahrûse-i mezbûrede sâkin (boş) nâm kimesne on seneden berü muhâsebesin görmedin vâlidesi müteveffiye olmağla şer‘le muhâsebesi görilüp zimmetinde zuhûr iden mâl-ı vakf ile mescid-i merkúm ile mu‘allimhâne ta‘mîr olınmak bâbında hüküm recâ itmeğin vech-i meşrûh üzre şer‘le görmenüz içün yazılmışdur.

[Fî] evâsıt-ı S sene [1]109 [29 Ağustos-7 Eylül 1697]

26/102/556 İstanbul ve Edirne'de, Defterdâr Kosta(?) Mustafa Efendi evkafı tevliyeti sadrazam olanlar nezâretine naklolunup Hacı Ahmet'e verildiğinden, İstanbul kadısı tarafından nezaretinde olmak üzere Mustafa'ya verilemeyeceğine, tevliyetin elindeki beratı gereğince Hacı Ahmet'e verilmesine, başkasına müdahale ettirilmemesine dair hüküm.

İstanbul kãimmakãmına ve İstanbul'da vezîr-i a‘zamum nezâretinde olan evkãf müfettişi Mevlânâ (boş) zîde ilmuhûya hüküm ki:

El-Hâcc Ahmed gelüp İstanbul ve Edirne'de vâkı‘ Kosta(?) Mustafâ Efendi defterdâr-ı sâbık evkãfınun tevliyeti berât ile üzerinde ve câmi‘i Edirne'de olup İstanbul'da olan akãrâtı câbîsi ma‘rifetiyle cem‘ u tahsîl ve mütevellîsi ma‘rifetiyle sarf olınagelüp lâkin İstanbul kãdîları nezâretinde oldukça Edirne'de câmi‘i ve vakfları sıyânet olınmayup mütevellîler gâh Edirne'de ve gâh İstanbul'da mütemekkin olduğından vakf harâb ve levâzımı görilmeyüp tevliyet-i mezbûr vezîr-i a‘zam olanlar nezâretine nakl olınup kendüye ibkã olınmışiken İstanbul kãdîsı tarafından nezâretinde olmak üzre âhardan Mustafâ'ya virilüp gadr olmağla yedinde olan berâtı mûcebince zabt itdürilüp âharı müdâhale itdürilmemek içün hüküm yazılmışdur.

Fî evâil-i Ra sene [1]109 [17-26 Eylül 1697]

27/80/543 Şile'de, Hacı Kasım Gönanî câmi‘ evkafına ait hamamı üç seneliğine kiralayan şahısların kira müddeti sonuna dek hamamı zaptetmelerine ve kendilerine müdahale edilmemesine dair hüküm.

Şile nâhiyesi nâibine hüküm ki:

İbrâhîm ve Ahmed gelüp müteveffâ el-Hâcc Kãsım Gönânî câmi‘i evkãfı akãrâtından Şile'de vâkı‘ hammâmun bin yüz on senesi Muharrem'i gurresinden üç sene temâmına değin beher sene on dörder bin akçeden üç senesi kırk iki bin akçeye olmak üzre cânib-i vakfdan kendülere îcâr olınup vakf-ı mezbûr mütevellîsi Seyyid Halîl [tarafından] mühürlü temessük virildüğin bildürüp müddet-i icâresi temâmına değin zabt itdürdüp âhardan müdâhale olınmamak bâbında hükm-i hümâyûnum recâ itmeğin memhûr temessüki mûcebince zabtiçün yazılmışdur.

Fî evâil-i M sene 1110 [10-19 Temmuz 1698]

28/8/10 İstanbul'daki Mihrimah, Ayşe Sultan ve Rüstem Paşa evkafları mütevellisinin, tayin olunan vazifelerine kanaat etmeyip vakfiyeye aykırı vazife ihdas eden vakfedenin bazı evladınca rencide olunmasına dair hüküm.
İstanbul kãimmakãmına ve kãdîsına hüküm:

İstanbul'da Mihrimâh ve Âyişe Sultân ve Rüstem Paşa evkãflarınun evlâdiyyet üzre mütevellîsi olan Ahmed gelüp evkãf-ı mezbûrun hâsıl olan gallesinün fazlasından vakfiyye-i ma‘mûlün bihâsında evlâd-ı vâkıfdan olanlara vazîfe şart ve ta‘yîn itmiş iken evlâd-ı vâkıfdan ba‘zıları ta‘yîn olınan vazîfelerine kanâ‘at itmeyüp vazîfe ihdâs itmeleriyle hilâf-ı şart-ı vâkıf vazîfe talebiyle te‘addî vü rencîde olınmaya diyü hüküm yazılmışdur.

Fî evâhir-i Ca sene [1]109 [5-14 Aralık 1697]

28/22/69 Sadrazam Piri Mehmet Paşa evkafına ait Galata'da, Tophâne kapısına bitişik dükkanları vakıf için zapt ve yananları tamir etmek isteyen vakıf mütevellisine, Tophâne mütevellisinin müdahalesinin önlenmesine dair hüküm.

Âstâne kãimmakãmına ve kãdîsına hüküm ki:

Vezîr-i a‘zam-ı sâbık müteveffâ Pîrî Mehmed Paşa'nun evkãfı mütevellîsi Seyyid Mehemmed el-Kâmî(?) zîde şerefü siyâdetihî(?) gelüp vâkıf-ı müşârun ileyhün vakfiyye-i ma‘mûlün bihâsında mukayyed akãrâtından Galata'da Tophâne kapusı'na muttasıl dekâkîn vakf tarafından zabt ve ihrâk-ı kebîrde muhterik olup ta‘mîr murâd eyledükde Tophâne mütevellîsi ol arza bizüm vakfdandur diyü ta‘mîrine mâni‘ olup te‘addî üzre olduğın bildürüp te‘addîleri şer‘le men‘ u def‘ olınmak içün yazılmışdur.

Fî evâil-i Ca sene [1]109 [15-24 Kasım 1697]

28/27/92 Sadrazam Pir Mehmet Paşa evkafına ait Galata'da, Yelkenciler çarşısında yanan iki dükkan arsasını zaptetmek isteyen vakıf mütevellisi ve bunları zaptedip kiralayan Hacı Kasım vakfı mütevellisi arasındaki ihtilafın ilgili kadılıkta görülmesine dair hüküm.

Âstâne kãimmakãmı Yûsuf Paşa'ya ve Galata kãdîsına hüküm ki:

Vezîr-i a‘zam-ı sâbık müteveffâ Pîr Mehmed Paşa evkãfınun bi’l-fi‘l mütevellîsi olan Seyyid Mehmed zîde kadruhû gelüp vakf-ı merkúmun vakfiyye-i ma‘mûlün bihâsında mukayyed akãrâtından medîne-i Galata'da Yelkenciler sûkında vâkı‘ iki bâb dükkânı ihrâk bi’n-nâr olup ol dükkânlarun arsası zabtında iken civârında vâkı‘ el-Hâcc Kãsım vakfı mütevellîsi olan (boş) nâm kimesne el-Hâcc Kãsım vakfı arsasından olmak üzre fuzûlî zabt ve âhardan İsmâ‘îl nâm kimesneye îcâr idüp vakf-ı merkúma gadr eyledüğin bildürüp ol bâbda hükm-i hümâyûnum recâ itmeğin yedinde olan vakfiyye-i ma‘mûlün bihâsı mûcebince şer‘le görilmek içün yazılmışdur.

Fî evâil-i C sene [1]109 [15-24 Aralık 1697]

28/36/127 Galata'da, Sadrazam Mustafa Paşa câmi‘ ve etrafındaki iskeleler evkafının mütevellisi ve vakfın akarlarından olan bağ evi için ecr-i misline denk kira vermeyen gümrük emini arasındaki ihtilafın çözülmesi için anılan evin hassa mimarbaşısı marifetiyle keşfolunup ecr-i mislinin belirlenmesine dair hüküm.

İstanbul kãimmakãmına ve İstanbul'da müfettiş-i evkãf vekîline hüküm ki:

Vezîr-i a‘zam-ı sâbık müteveffâ Mustafâ Paşa evkãfından Galata'da vâkı‘ câmi‘-i şerîf ve etrâfında vâkı‘ iskeleler evkãfınun meşrûtiyyet üzre mütevellîsi Alî gelüp vakf-ı merkúmun defterde mukayyed akãrâtından bâğ menziliyçün(?) bu âna dek(?) gümrük emîni olanlar cânib-i vakfa ecr-i misli olan yevmiyye yüzer(?) pâre icâre viregelmişler iken hâlâ gümrük emîni olanlar ecr-i misli virmeyüp kırkar pâre virmeleriyle zikr olınan câmi‘-i şerîf ve etrâfında olan iskelelerün iktizâ iden ta‘mîr ü termîmine vesâir mühimmâtına vefâ eylemeyüp vakfa küllî gadr olmağla hâssa mi‘mârbaşısı (boş) zîde mecduhû ma‘rifetiyle kıbel-i şer‘den üzerine varılup ecr-i misli keşf ve ta‘yîn olınmak bâbında vech-i meşrûh üzre şer‘le görilmek içün yazılmışdur.

Fî evâil-i C sene [1]109 [15-24 Aralık 1697]

28/42/149 İstanbul'da, Akbıyık mahallesinde mutasarrıf olduğu evinde ailesi ile sakin olan şahsın evinin dışına müdahale eden Küçük Ayasofya katibi Hasan'ın oradan çıkarılmasına ilişkin mahkeme kararının uygulanmasına dair hüküm.

İstanbul kãimmakãmına ve kãdîsına hüküm ki:

Abdülmu‘în el-Buharî gelüp mahmiyye-i mezbûr mahallâtından Akbıyık mahallesinde ulemâya meşrûta mutasarrıf olduğı menzilinde ehl [ü] iyâli ile sâkin iken âhardan hilâf-ı şer‘-i şerîf Ayasofya-i sağïr kâtibi Hasan nâm kimesne menzil-i mezbûrun fuzûlî taşrasına girüp te‘addî itmeğle bundan akdem ihrâcıyçün taraf-ı şer‘den tenbîh olınmışiken itâ‘at-i şer‘-i şerîf eylemeyüp illet(?) üzre olduğın bildürüp ol bâbda hükm-i hümâyûnum recâ itmeğin sen ki vezîr-i mûmâ ileyh ve Mevlânâ-yı mûmâ ileyhsin hilâf-ı şer‘-i şerîf müdâhale olınmamak içün hüküm yazılmışdur.

[Fî] evâil-i C sene [1]109 [15-24 Aralık 1697]

28/51/182 İstanbul'da, tasarrufundaki icâreteynli vakıf evi yıkıp arsasına kendisi için yeni ev yapan şahsın, binayı sökmesi ve yıktığı evin kıymetini ödemesi için ilgili kadılıkta muhakeme edilmesine dair hüküm.

Âstâne kãimmakãmına ve kãdîsına hüküm ki:

Müteveffâ Rüstem Paşazâde Ahmed gelüp mahrûse-i İstanbul'da (boş) nâm mahallde vâkı‘ vakf-ı mezbûrun vakfiyye-i ma‘mûlün bihâsında mukayyed akãrâtından olan icâre-i mu‘accele ve müeccele ile vakf menzilin binâsınun mutasarrıfı olan (boş) nâm kimesne teğallüben hedm ve nıkzın istihlâk idüp arsasına mütevellî izinsiz kendü mâlıyla nefsiyçün müceddeden menzil binâ idüp kal‘ı vakfa kasr(?) olmamağla mezkûra binâsını kal‘ itdürüp binâ-i mehdûmun mebniyyen kıymetin mezbûrdan taleb eyledükde hilâf-ı şer‘ nizâ‘ eyledüğin ve bu bâbda şeyhülislâmdan fetvâ-yı şerîfe virilmeğle şer‘le görilmek içün yazılmışdur.

Fî evâil-i C sene 1109 [15-24 Aralık 1697]

28/83/307 Galata'da, Okçu Musa mahallesinde Musa Efendi muallimhanesine ait Azepkapısı haricinde, zamanla battal olan mumhanenin kadimden mumhane olup olmadığı ve kimseye zararı bulunup bulunmadığı hususlarının bildirilmesine dair hüküm.

İstanbul kãimmakãmı Yûsuf Paşa'ya hüküm ki:

Galata kazâsında nâibü’ş-şer‘ olan Mevlânâ Mustafâ zîde fazluhû Dergâh-ı mu‘allâma mektûb gönderüp mahrûse-i Galata dâhilinde Okcı Mûsâ mahallesinde Mûsâ Efendi mu‘allimhânesi dimeğle ma‘rûf mu‘allimhânenün müstegallâtından olup mahrûse-i mezbûre hısnı ebvâbından Azeb kapusı hâricinde vâkı‘ İbrâhîm nâm kimesnenün taht-ı icâresinde olan mûmhâne mürûr-ı eyyâm ile mu‘attal olup ve zikr olınan mu‘allimhânenün mezkûr mûmhâneden gayri vakfı kalîl olmağla ol dahi mu‘attal kalmağa karîb oldığı ve zikr olınan mûmhâne idilüp(?) sâbık üzre mûmhâne olması cânib-i vakfa ve ibâdullâha her vechile enfa‘ u evlâ olduğın mahrûse-i mezbûre ahâlîsinden olan sikãt-ı müslimînden cemm-i gafîr ve cem‘-i kesîr meclis-i şer‘den haber virmeleriyle sâbıku’z-zikr mûmhâne idilüp(?) sâbık üzre sâir mûmhâneler gibi mûmhâne olmak üzre emr-i şerîfüm recâsına arz itmeğin kadîmden mûmhâne olup kimesneye zarar-ı şer‘îsi yoğise görüp arz eylemeleri(?) içün hüküm yazılmışdur.

Fî evâsıt-ı C sene [1]109 [25 Aralık 1697-3 Ocak 1698]

28/104/400 İstanbul'da, Kenan Paşa evkafının tevliyetini istikamet üzere gören mütevelli ve bunun tevliyet işlerine karışan bazı vakıf mürtezikası arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Mahrûse-i İstanbul'da vâkı‘ müteveffâ Ken‘ân Paşa evkãfınun mütevellîsi olan Hâcı Mustafâ zîde kadruhû gelüp mezkûr umûr-ı vakfı istikãmet üzre görüp bir vechile vaz‘ [u] te‘addîsi yoğiken vakf-ı merkúme mürtezikalarından Hızır ve Kâtib Dervîş ve Hamza nâm kimesneler mücerred mâl-ı vakfı ekl ü bel‘ eylemek içün bunun tevliyeti umûrına karışup zabtına mâni‘ olup te‘addî itmeğle hüccet-i şer‘iyyesi olduğın bildürüp ahvâlleri şer‘le görilüp mezbûrlar tevliyet umûrına müdâhale itdürilmeyüp men‘ u def‘ olınmak içün yazılmışdur.

Fî evâhir-i C sene [1]109 [4-12 Ocak 1698]

28/106/409 İstanbul'da, Sultan Süleyman evkafı imâretinden günlük altı vukiyye ekmeğe mutasarrıf olan Ama İsa'nın ölümüyle mahlulünden iki vukiyye ekmeğin Ama Mustafa'ya verilmesine dair hüküm.

İstanbul'da vâkı‘ Sultân Süleymân evkãfı mütevellîlerine hüküm ki:

A‘mâ Mustafâ gelüp vakf-ı merkúm imâretinden yevmî altı vukiyye nâna mutasarrıf olan A‘mâ Îsâ fevt olup mahlûl olmağla mahlûl-i mezbûrda[n] iki vukiyye nân kendüye virilmek bâbında hüküm recâ itmeğin mahlûl olduğı(?) vâkı‘ ise iki vukiyye nânı mezbûra arz eylemek içün yazılmışdur.

Fî evâhir-i C sene [1]109 [4-12 Ocak 1698]

28/113/437 Eyüp'te, Koca Kasım Paşa mahallesinde Muslihiddin el-Kadrî(?) adlı hayır sahibinin süknasını ulemaya şart ettiği evin, mahkemece kendisine verilen müderris Şeyh Şehrî(?) Ahmet tarafından zaptettirilmesine dair hüküm.

İstanbul kãimmakãmına ve kãdîsına hüküm ki:

Müderrisînden Mevlânâ Şeyh Şehrî(?) Ahmed zîde ilmuhû arz-ı hâl idüp medîne-i Ebâ Eyyûb-i Ensârî aleyhi’r-rahmetü’l-bârî mahallâtından Koca Kãsım Paşa mahallesinde müteveffâ Muslihiddîn el-Kadrî(?) nâm sâhib-i hayrun süknâsı ulemâya meşrûta ma‘lûmetü’l-hudûd vakf menzile mutasarrıf olan es-Seyyid Abdurrahmân fevt olup zikr olınan menzil mahlûl olmağla Mevlânâ-yı mezkûr ulemâdan olup süknâya muhtâc olmağla menzil-i merkúm ber mûceb-i şart-ı vâkıf taraf-ı şer‘den kendüye tevcîh ve yedine hüccet-i şer‘iyye virilmeğle hüccet-i şer‘iyye mûcebince zabt itdürilmemek⁸⁰ bâbında emr-i şerîfüm recâ itmeğin hüccet-i şer‘iyyesi mûcebince şer‘le zabt itdürilmek içün hüküm yazılmışdur.

Fî evâhir-i C sene [1]109 [4-12 Ocak 1698]

28/136/531 İstanbul'da, Hayyat Hacı Sinan ve Fatma Hatun evkaflarına ait icâreteynli evlerin kiracılarındaki kira parasını talep eden vakıf mütevellisi ve kiracılar arasındaki ihtilafın ilgili kadılıkta görülmesine dair hüküm.

İstanbul kãdîsına hüküm:

İstanbul'da vâkı‘ müteveffâ Hayyât el-Hâcc Sinân ve Fâtıma Hâtûn evkãflarınun meşrûtiyyet üzre mütevellîsi olan Mevlânâ Hâfız el-Hâcc İbrâhîm arz-ı hâl sunup mahrûse-i mezbûrede vâkı‘ evkãf-ı mezbûrlarun icâre-i mu‘accele ve müeccelelü akãrâtından vakf menzillerün müste’cirleri olan (boş) ve (boş) nâm kimesneler zimmetlerinde birer mikdâr icâre-i vakf olup taleb eyledükde mezbûrlar virmekde te‘allül ü inâd eyledüklerin ve şeyhülislâmdan fetvâ-yı şerîfe virildüğin mûcebince amel olınmak bâbında hüküm recâ fetvâ-yı şerîfesi mûcebince şer‘le görilmek içün yazılmışdur.

Fî evâhir-i C sene [1]109 [4-12 Ocak 1698]

28/138/543 İstanbul'da, Sultan Süleyman evkafından ilk düşen mahlulden talebe-i ulumdan İbrahim Halife'ye vazife ve ekmek verilmesine dair hüküm.

Mahrûse-i İstanbul'da vâkı‘ merhûm Sultân Süleymân evkãfı mütevellîsi (boş) zîde mecduhûya hüküm ki:

Talebe-i ulûmdan İbrâhîm Halîfe gelüp emr-i ma‘âşda muztaribü’l-hâl olmağla ibtidâ düşen mahlûlden yiğirmi akçe vazîfe ve aşıyla üç çift fodula virilmek bâbında hüküm recâ eyledüği ecilden sen ki mütevellî-i mûmâ ileyhsin düşen mahlûlden vazîfe ve etmeği mezkûr İbrâhîm içün arz eylemen emrüm olmışdur diyü yazılmışdur.

Fî evâil-i B sene [1]109 [13-22 Ocak 1698]

28/156/617 İstanbul'da, Eğrikapı dahilinde Molla Aşki mescidi imamı ile müezzini ve bunları mütevelli, nazır, katip ve cabiî vazifesi ihdas edip rencide eden bazı kimseler arasındaki ihtilafın ilgili kadılıkta görülmesine dair hüküm.

Âstâne-i sa‘âdetüm kãimmakãmı Yûsuf Paşa'ya ve monlâya hüküm ki:

İstanbul'da Eğrikapu dâhilinde vâkı‘ Monlâ Aşkï mescid-i şerîfinün imâmı ve mütevellîsi olan Mehmed ile müezzini (boş) nâm kimesneler Dergâh-ı mu‘allâma gelüp evkãf-ı mezbûrenün tevliyeti vakfiyye-i ma‘mûlün bihâsında imâm ve müezzin olanlara vakf ve şart olup ber mûceb-i şart-ı vâkıf tevliyet-i mezbûreye mutasarrıflar olup ve vakf-ı merkúmun müstegallâtı kurâ ve mezâri‘ olmayup musakkafât olup ve şart-ı vâkıfda zevâyidinden vazîfe ta‘yîn olmış değil iken ve vakfda müsâ‘ade yoğiken ba‘zı kimesneler hilâf-ı şart-ı vâkıf mütevellî ve nâzır ve kâtib ve câbî vazîfesi ihdâs itmeleriyle bunları muhdes vazîfe talebiyle rencîde eyledüklerin bildürüp hilâf-ı şart-ı vâkıf muhdes vazîfe talebiyle dahl ü rencîde itdürilmemek bâbında hükm-i hümâyûnum recâ eyledükleri ecilden vech-i meşrûh üzre şer‘le görile diyü yazılmışdur.

Fî evâil-i [B](?) sene [1]109 [13-22 Ocak 1698]

RAS25-28VF10
RAS28-29VF11

28/165/653 İstanbul'da, Hoca Piri evkafının katibi Hüseyin'in, muhasebe defterlerini, vaki olan ferağat ve infakları(?) yazmaya iktidarı olup hizmet ettiği sürece işlerine kimsenin karıştırılmamasına dair hüküm.

İstanbul'da sadr-ı a‘zamum nezâretinde olan evkãf müfettişi (boş) zîde kadruhûya hüküm ki:

Kıdvetü erbâbu’t-tahrîr Hüseyin zîde kadruhû gelüp İstanbul'da vâkı‘ müteveffâ Hâce Pîrî evkãfınun berât-ı şerîfle kâtibi olup vakf-ı mezbûr mütevellîleri vakfun muhâsebe defterlerin ve vâkı‘ olan ferâğat ve infâkların(?) buna tahrîr itdürmeyüp diledükleri kimesnelere tahrîr itdürüp umûr-ı vakfun ihtilâline bâ‘is ve hilâf-ı şart-ı vâkıf te‘addî eyledüklerin bildürüp ol bâbda hükm-i hümâyûnum recâ itmeğin şart-ı vâkıf üzre kifâyet-i hıdmetine iktidârı olup edâ-yı hıdmet itdükce kifâyet-i umûrına âhardan bir ferd müdâhale eylememek içün yazılmışdur.

Fî evâil-i B sene [1]109 [13-22 Ocak 1698]

28/171/675 Galata'da bağlı Sütlüce'de vakıf eve tasarruf hususunda kardeşler arasında ortaya çıkan ihtilafın ilgili kadılıkta görülmesine dair hüküm.

Galata monlâsına hüküm ki:

Feyzullâh nâm kimesne ile (boş) nâm hâtûn gelüp kazâ-i mezbûr muzâfâtından Südlice'de vâkı‘ menzilün mutasarrıfı bunlarun cedlerinün tescîl-i şer‘î teslîm-i ile’l-mütevellî birle vakfiyye-i ma‘mûlün bihâsından evlâdına ve evlâd-ı evlâdına meşrûta vakf iken karındaşları menzil-i merkúmı fuzûlî (boş) nâm kimesneye bey‘ idüp te‘addî eyledüklerin ve bu bâbda şeyhülislâmdan fetvâsı olduğın bildürüp mûcebince amel olınup meşrûtiyyet üzre zabt itdürilmek bâbında hüküm recâ itmeğin şer‘le görilmek içün yazılmışdur.

Fî evâil-i B sene [1]109 [13-22 Ocak 1698]

28/190/751 Sultan Süleyman evkafına ait Kalenderhane mahallesinde kocasının tasarrufunda olan evi mütevelli izniyle devralan kadına karşı bu evin vakfa intikal ettiğini ileri süren vakıf görevlisinin evvelce verilen mahkeme kararı gereğince müdahalesinin önlenmesine dair hüküm.

İstanbul kãimmakãmına ve monlâsına hüküm ki:

Mahrûse-i İstanbul sâkinelerinden Âyişe nâm hâtûn gelüp bundan akdem bunun zevci Ömer merhûm ve mağfûrun leh Sultân Süleymân Hân tâbe serâhu evkãfından mahrûse-i mezbûrda Kalenderhâne mahallesinde vâkı‘ icâre-i mu‘accele ve müeccele ile yed-i tasarrufında olan ma‘lûmu’l-hudûd menzilde bin yüz üç senesinde izn-i mütevellî ile bunun buna ferâğ u tefvîz idüp mezbûr dahi ol menzile mutasarrıfe iken hâlâ vakf-ı merkúm mütevellî kãimmakãmı olan Hamîd [bin] Mehmed ol menzil müteveffiye kızun Âyişe nâm sağïrenün imiş mahlûldür diyü müdâhale itmeğle murâfa‘a-i şer‘ olduklarında ol menzil zevci Ömer'ün olup tasarrufında iken izn-i mütevellî ile ferâğ u tefvîz eyledüği sâbit olmağla mezkûr Hamîd Hamîd⁸¹ bin Mehmed bîvech müdâhaleden men‘ birle hüccet-i şer‘iyye virilmişiken ol hüccet-i şer‘iyyeye muğãyir nizâ‘ itmeğle men‘ olınmak bâbında hüküm recâ itmeğin hilâf-ı şer‘-i şerîf dahl ü ta‘arruz olınmamak içün yazılmışdur.

Fî evâsıt-ı B sene [1]109 [23 Ocak-1 Şubat 1698]