Galata'da, Haseki Sultan evkafına ait evin, burada mektep ve çeşme yapmak isteyen Gümrük emini Hasan'ın mülk evi ile istibdaline dair hüküm

25/138/545 Defterdâr Mahmut Efendi evkafından vakfedenin şartına aykırı ihdas olunan vekillik, nazırlık ve kãimmakãmlık vazifelerinin kaldırılmasına dair hüküm.

Âstâne kãimmakãmına hüküm ki:

Defterdâr-ı sâbık müteveffâ Mahmûd Efendi evkãfınun evlâdiyyet ve meşrûtiyyet üzre mütevelliyesi olan fahrü’l-muhadderât Afîfe nâm hâtûn ordû-ı hümâyûnuma arz-ı hâl idüp vakf-ı mezbûrun kurâ ve mezâri‘i olmayup vakfı musakkafât olup ve şart-ı vâkıfda vekâlet ve nezâret ve kãimmakãmlık nâmıyla vazîfe şart ve ta‘yîn olınmış değil iken ba‘zı kimesneler hilâf-ı şart-ı vâkıf vekâlet ve nezâret ve kãimmakãmlık nâmıyla vazîfe ihdâs ve Âstâne-i sa‘âdetümde olan Küçük evkãf defterine kayd itdürüp vakfa gadr eyledüklerin bildürüp hilâf-ı şart-ı vâkıf ihdâs olınan vekâlet ve nezâret ve kãimmakãmlık vazîfesi ref‘ olınmak bâbında emr-i şerîfüm recâ eyledüği ecilden sen ki vezîr-i müşârun ileyhsin hilâf-ı şart-ı vâkıf vekâlet ve nezâret ve kãimmakãmlık kaydı ref‘ olınmak içün yazılmışdur.

[Fî] evâsıt-ı Za sene [1]108 [1-10 Haziran 1697]

25/149/596 İstanbul'da, Elvânzâde câmi‘ne bağlı Üskübi Ali Ağa evkafının mütevellisi ve “vakfedenin azatlılarındanız” diye müdahalede bulunan İstanbul'dan bazı kişiler arasındaki ihtilafın usulüne göre çözülmesine dair hüküm.

İstanbul'da müfettiş-i evkãf vekîline hüküm:

Mahrûse-i İstanbul'da vâkı‘ Sarây-ı cedîdüm ağası nezâretinde olan evkãfdan Elvânzâde câmi‘-i şerîfi mülhakãtından müteveffâ Üskübî Alî Ağa evkãfınun mütevellîsi Abdullâh ordû-yı [hü]mâyûnuma gelüp mahrûse-i mezbûrdan (boş) ve (boş) ve (boş) nâm kimesneler âharun utekãsından oldukları tevâtür ile sâbit olup vâkıf-ı merkúmun utekãsından olmayup ve yedlerinde ma‘mûlün bih senedleri yoğiken vâkıf-ı mezbûrun utekãsındanız diyü müdâhale ve hevâsına tâbi‘ müfettiş kâtibleriyle yekdil olmağla bir tarîkle hüccet peydâ ve vakf-ı merkúma gadr u te‘addî üzre oldukların bildürüp sarây-ı cedîdüm ağası olup vakf-ı merkúm nâzırı (boş) ağa dâme ulüvvuhû ma‘rifetiyle şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/152/610 Galata'da, Mahmut Efendi evkafında vakfedenin şartına aykırı ihdas olunmuş cüzhanlık, kãimmakãmlık, nazırlık ve vekillik vazifelerinin kaldırılmasına dair hüküm.

Galata monlâsına hüküm:

Kazâ-i mezbûrda vâkı‘ müteveffâ Mahmûd Efendi evkãfınun mütevelliyesi Afîfe Hânım arz-ı hâl ider İstanbul'da medrese muhterik olup ta‘mîre müsâ‘id olmayup ve vakf-ı mezbûr kurâ ve mezâri‘ olmayup musakkafât olup ve şart-ı vâkıfda cüzhânlık ve kãimmakãmlık ve nezâret ve vekâlet nâmına ta‘yîn olınmış değil iken ve usûl-i vakfda olan mürtezikanun ba‘zıları dahi ziyâde vazîfe talebiyle te‘addî üzre olup hilâf-ı şart-ı vâkıf muhdes vazîfe talebiyle dahl ü rencîde olınmamak içün hüküm yazılmışdur.

Fî evâsıt-ı Za sene [1]108 [1-10 Haziran 1697]

25/157/630 Galata'ya bağlı Kasımpaşa'da Mehmet Efendi mescidi vakfının boş arsalarına izinsiz ev ile odalar yapıp mescit önüne su akıtan imam ve vakıf mütevellisi arasındaki ihtilafın ilgili kadılıkta görülmesine dair hüküm.

Galata kãdîsına hüküm ki:

Galata kazâsı muzâfâtından Kãsım Paşa'da vâkı‘ Kãdî Mehmed Efendi binâ eyledüği mescidün hâlâ Hüseyin (boş) mütevellîsi olan Abdülkerîm ordû-ı hümâyûnuma gelüp vakf-ı mezbûrun arsa-i hâliye olan yirlerine bunun izni yoğiken mescid-i mezbûr imâmı olan Halîl nâm kimesne fuzûlî menzil ve odalar binâ eyledüğinden gayri mescid-i mezbûr mecrâsı önünde su akıdup ziyâde te‘addî ve vakf-ı mezbûra gadr eyledüğin bildürüp şer‘le görilüp mezbûrun hilâf-ı şer‘ te‘addîsi men‘ u def‘ olınmak bâbında hükm-i hümâyûnum recâ itmeğin vech-i meşrûh üzre şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/158/634 Alaçeşme yakınındaki câmi‘evkafı mütevellisinin, ihdas olunmuş vazifelerini isteyen şahıslarca rahatsız edilmemesine dair hüküm.

İstanbul kãdîsına hüküm:

Alaçeşme kurbında müteveffâ (boş) binâ eyledüği câmi‘-i şerîf evkãfınun bi’l-fi‘l berât-ı şerîfümle mütevellîsi Mehmed gelüp vakf-ı merkúm kurâ ve mezâri‘ olmayup vakfda müsâ‘ade yoğiken ba‘zı kimesneler muhdes vazîfe talebiyle rencîde itmeleriyle fetvâ-yı şerîfesi mûcebince şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/161/647 İstanbul'da, ölen hassa helvahanesi eski mütevellisinin terekesi küçük kızına, kızın ölmesiyle de kendisine kalan Hasan ve zimmetinde vakıf parası kaldığı iddiasıyla eski mütevellinin hesaplarının yeniden görülmesini isteyen yeni mütevelli arasındaki ihtilafın ilgili kadılıkta görülmesine dair hüküm.

Âstâne kãimmakãmına ve monlâsına hüküm ki:

Mahrûse-i İstanbul'da sâkin Hasan gelüp bundan akdem helvâhâne-i hâssa mütevellîsi olan Hâcı İbrâhîm nâm kimesnenün sıhhatinde hâkim muhâsebesin görüp ba‘dehû fevt olup muhallefâtı irs-i şer‘le Emine nâm sağïreye münhasıra ve ol dahi müteveffiye olup buna intikãl itmeğin müteveffâ-yı mezbûr Hâcı İbrâhîm'ün zimmetinde mâl-ı vakfdan bir nesne olmayup ve muhâsebesinde mahall-i şübhe yoğiken hâlâ mütevellî olan Hâcı Mehmed nâm kimesne teğallüben(?) mezbûrun tekrâr muhâsebesi görilsün diyü te‘addî ve bu bâbda şeyhülislâmdan fetvâ-yı şerîfe virilmeğle şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/162/652 İstanbul'da, Saliha Hatun vakfından alacaklı olan mütevelli ve vakıfta para olmasına rağmen alacağının ödenmesine karşı çıkan mürtezikalar arasındaki ihtilafın ilgili kadılıkta görülmesine dair hüküm.

Mahmiyye-i İstanbul'da şeyhülislâm nezâretinde olan evkãf müfettişine hüküm:

Mahmiyye-i mezbûrda müteveffiye Sâliha Hâtûn vakfınun meşrûtiyyet üzre mütevellîsi Hüseyin gelüp bunun vakf-ı merkúmda bin yüz (boş) senesinde yüz on bin akçe [a]lacağı olmağla galle-i vakfdan almak istedükde vakfda müsâ‘ade var iken vakfun mürtezikaları hilâf-ı şer‘ mâni‘ olup gadr itmeğle şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/170/684 İstanbul'da, mukataayı kendisine verme vaadi ile para alan evkaf mütevellisi ve verdiği paranın iadesini isteyen şahıs arasındaki ihtilafın ilgili kadılıkta görülmesine dair hüküm.

İstanbul kãimmakãmına ve monlâsına hüküm ki:

Ahmed gelüp mahrûse-i İstanbul'da vâkı‘ müteveffâ (boş) evkãfı mütevellîsi olan dîğer Ahmed nâm kimesne mütevellîsi olduğum evkãfdan (boş) mukãta‘asın sana vireyim diyü bunun iki bin beş yüz guruşın alup lâkin mukãta‘a-i merkúmı buna virmeyüp âhara virmeğle bu dahi virdüği meblağ-ı merkúmı girü taleb eyledükde virmekde te‘allül üzre olduğın bildürüp şer‘le alıvirilmek içün hüküm yazılmışdur.

[Fî] evâsıt-ı Za sene [1]108 [1-10 Haziran 1697]

25/174/701 İstanbul'da, Sultan Bayezit câmi‘ yakınında Okçubaşı Hayreddin evkafından vazifeli cüzhan olan kimse ve bir süredir bunun hak kazandığı parayı ödemeyen vakıf mütevellisiyle katibi arasındaki ihtilafın ilgili kadılıkta görülmesine dair hüküm.

Âstâne kãimmakãmına ve İstanbul kãdîsına hüküm ki:

Mustafâ nâm kimesne ordû-ı hümâyûnuma gelüp İstanbul'da vâkı‘ merhûm ve mağfûrun leh Sultân Bâyezîd Hân tâbe serâhu câmi‘-i şerîfi kurbında müteveffâ Okcıbaşı Hayreddîn evkãfından almak üzre yevmî iki akçe vazîfe ile berât-ı şerîfümle cüzhân olup edâ-yı hıdmet idüp kusûrı yoğiken vakf-ı merkúm mütevellîsi olan İbrâhîm ve kâtibi Yedekcioğlı (boş) nâm kimesneler beş altı seneden berü hıdmeti mukãbelesinde berâtı mûcebince müstahıkk olduğı vazîfesin virmeyüp gadr eyledüğin bildürüp berâtı mûcebince vazîfesi alıvirilmek bâbında hüküm recâ itmeğin şer‘le görilmek içün hüküm yazılmışdur.

Fî evâsıt-ı Za sene [1]108 [1-10 Haziran 1697]

25/175/705 İstanbul'da, Hacı Mehmet Efendi ve Balcı Mehmet Paşa evkaflarının mütevelli vekili ve mütevellileri arasındaki vakıf parasına ilişkin ihtilafın ilgili kadılıkta görülmesine dair hüküm.

Âstâne kãimmakãmına ve İstanbul kãdîsına hüküm ki:

İstanbul sâkinlerinden Osmân nâm kimesne ordû-ı hümâyûnuma gelüp İstanbul'da vâkı‘ el-Hâcc Mehmed Efendi ve Balcı Mehmed Paşa evkãflarınun bin yüz (boş) senesinde mütevellî vekîli olup zimmetinde zuhûr iden mâl-ı vakfı evkãf-ı mezbûre mütevellîleri olan Ahmed ve Yahyâ nâm kimesnelere bi’t-temâm edâ vü teslîm eyleyüp zimmetinde mâl-ı vakfdan bir nesne kalmış değil iken mezbûrlar mücerred ta‘cîz içün mâl-ı vakfı [edâ vü teslîm] eyledüğüne hüccetün yokdur diyü hilâf-ı şer‘-i şerîf akçe talebiyle dahl ü rencîde eyledüklerin bildürüp men‘ olınmak bâbında hüküm recâ itmeğin şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/180/728 Fındıklı'da, yeni beratına rağmen gıyabında tevliyetten azledilen Defterdâr Mahmut Efendi evkafı mütevellisi ve kendisine tevliyet verilen kimsenin yargılanarak hak kiminse, vakfedenin şartı üzere, ona verilmesine dair hüküm.

Âstâne kãimmakãmına hüküm ki:

Fındıklı'da vâkı‘ müteveffâ Defterdâr Mahmûd Efendi evkãfınun evlâdiyyet ve meşrûtiyyet üzre mütevelliyesi olan Afîfe nâm hânım gelüp bu umûr-ı vakfı görüp azl îcâb ider hâli yoğiken vakfun ba‘zı umûriyçün Edirne'ye geldükde tevliyet-i merkúmeden azl ve âhara tevcîh olınup gadr olınduğın bildürüp ol bâbda hükm-i hümâyûnum recâ itmeğin sen ki vezîr-i müşârun ileyhsin bunun yedinde cedîd berâtı var iken gıyâbında ne vechile tevcîh olınmışdur mahallinde murâfa‘a-i şer‘ ve hakk her kangısınun ise şart-ı vâkıf üzre tevcîh eyleyesin diyü yazılmışdur.

Fî evâsıt-ı Za sene [1]108 [1-10 Haziran 1697]

25/182/736 İstanbul'da, Emin Sinan mahallesindeki yanmış evi kendi malıyla onarmak isteyen şahsın talebi üzerine evin keşfolunmasına dair hüküm.

İstanbul kãdîsına hüküm ki:

Ulemâdan Hüseyin ordû-ı hümâyûnuma gelüp mahrûse-i İstanbul'da Emîn Sinân mahallesinde vâkı‘ ulemâya meşrûta vakf menzilde ber mûceb-i şart-ı vâkıf sâkin iken menzil-i mezbûr bi emri’llâhi te‘âlâ muhterik olup süknâya i‘tibâr(?) olmağla yedinde olan fetvâ-yı şerîfe mûcebince menzil-i merkúmı mâlıyla ta‘mîr murâd itmeğle şer‘le keşf olınmak bâbında hükm-i hümâyûnum recâ itmeğin şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/183/738 Mısır'da, ataları Hoca Abdullah ve Hoca Mehmet vakıflarının tevliyet ve gelirlerine birlikte tasarruf eden kardeşler arasındaki ihtilafın ilgili kadılıkta görülmesine dair hüküm.

Âstâne kãimmakãmına ve İstanbul kãdîsına hüküm ki:

Müderrisînden Mevlânâ Seyyid Şeyh Mehmed zîde ilmuhû ordû-ı hümâyûnuma arz-ı hâl idüp mahrûse-i Mısır'da vâkı‘ ceddi müteveffâ Hâce Abdullâh ve Hâce Mehmed evkãflarınun tevliyet ve gallesin vakfiyye-i ma‘mûlün bihâlarında evlâdından olanlara şart ve ta‘yîn itmeğle müderrisînden karındaşı Seyyid Mehmed Sa‘deddîn ile meşrûtiyyet üzre ber vech-i iştirâk mutasarrıflar iken mezkûr Seyyid Mehmed hilâf-ı şart-ı vâkıf müstakıllen zabt itmek üzre bin yüz (boş) senesinde hissesine âid olan virmekde te‘allül üzre olduğın bildürüp ve bu bâbda da‘vâsına muvâfık şeyhülislâmdan fetvâ-yı şerîfesi olduğın bildürüp karındaşı mezbûr hâlâ İstanbul'da olmağla karındaşı mezkûrun kabz eyledüği galle-i vakfdan isâbet iden hissesi alıvirilmek bâbında hüküm recâ itmeğin şer‘le görilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/198/806 İstanbul'da, Bali Reca evkafı katip ve cabilerinin bazı şahıslara usulsüz vazife ihdas ettikleri iddiasının İstanbul evkaf müfettişi vekilince incelenmesine dair hüküm.

Âstâne-i sa‘âdetümde müfettiş-i evkãf vekîli (boş) zîde ilmuhûya hüküm ki:

Mahrûse-i İstanbul'da vâkı‘ Bâlî Recâ evkãfınun mütevellîsi olan Süleymân gelüp merkúmun kâtib ve câbîleri birbirleriyle yekdil olup mâl-ı vakfı ekl itmeleriyle vakfun icâr[e]leri ve musakkafâtı muhtell ü mü[şe]vveş olup vakfun müsâ‘adesi yoğiken âhardan ba‘zı kimesneler muhdes vazîfe ihdâs itmeleriyle muhdes vazîfe husûsı şer‘le ta‘arruz⁷¹ vukú‘ı üzre i‘lâm olınmak bâbında hükm-i hümâyûnum recâ itmeğin vech-i meşrûh üzre şer‘le görilmek içün yazılmışdur.

Fî evâhir-i Za sene [1]108 [11-20 Haziran 1697]

25/210/855 İstanbul'da Valide Sultan vakfına ait bir adet dükkanı mütevelli izniyle verdiği kimse zimmetinde kalan önceki kiracının alacağının tahsil edilmesine dair hüküm.

Kãimmakãm paşaya ve İstanbul kãdîsına hüküm ki:

Dimitraşko nâm zimmî gelüp merhûm Vâlide Sultân tâbe serâhâ İstanbul'da binâ eyledüği câmi‘-i şerîf evkãfından câmi‘ kurbında Yeniçârşû'da vâkı‘ mutasarrıf olduğı bir bâb kârgîr dükkânı bin yüz guruş bedeli mukãbelesinde izn-i mütevellî ile İstanbul'da sâkin Receb nâm kimesneye bin yüz (boş) senesinde ferâğ ve tefvîz idüp bedelini almadın Berkene(?) nâm zimmî dahi ba‘zı kimesneler (...) ve bunı bir tarîkle habs idüp mahbûs ile mezbûr zimmî mezkûr Receb ile bunun yanına gelüp mezbûr bir kimesne bir peştemal içinde bir mikdâr akçeyi mezkûr Receb'e virüp ol dahi dükkân bedeli olmak üzre ol beştemali buna virüp ba‘de’l-kabz makbûzı olduğın mükrehen ikrâr itdürdükden sonra mezbûr Berkene ol peştemalı akçesiyle alduğından gayrı kendü mâlından dahi seksen guruş alup ba‘dehû ıtlâk itdürüp bu dahi dükkân bedeli olan meblağ-ı mezbûrı mezkûr Receb'den taleb eyledükde bin guruşı ikrâr ve yüz guruşı inkâr idüp ikrârı mûcebince yüz guruşı dahi edâ ve teslîme men‘⁷² birle hüccet virilüp ol hüccet-i şer‘iyyeye muğãyir nizâ‘ eyledüğin bildürüp müteveccih olan hakkı alıvirilmek içün yazılmışdur.

Fî evâsıt-ı Za sene [1]108 [1-10 Haziran 1697]

25/250/1020 İstanbul'da, Mimar Sinan mahallesinde ulemaya şart edilmiş mahlul evin Rumeli kazaskerince Mehmet Emin'e tevcih edildiğine dair hüküm.

İstanbul kãdîsına hüküm ki:

Mehmed Emîn gelüp mahrûse-i İstanbul'da vâkı‘ Mi‘mâr Sinân mahallesinde vâkı‘ ulemâya meşrûta bir bâb menzile ulemâdan Seyyid Ca‘fer mutasarrıf iken fevt olup ve süknâya eşedd-i ihtiyâc ile muhtâc olmağla ber mûceb-i şart-ı vâkıf Rûmili kãdîaskeri tarafından kendüye tevcîh olınup hüccet-i şer‘iyye virilmeğle mûcebince zabt itdürilmek bâbında emr-i şerîfüm recâ itmeğin hüccet-i şer‘iyye mûcebince zabt itdürilmek üzre yazılmışdur.

Fî evâil-i M sene 1109 [20-29 Temmuz 1697]

25/380/1503 İstanbul'da, Sultan Süleyman evkafına ait Büyük Anafarta mukataasını zapteden Mustafa ve bunun zimmetinde bulunan vakıf parasını talep eden vakıf mütevellisi arasındaki ihtilafın ilgili kadılıkta görülmesine dair hüküm.

Âstâne kãimmakãmına ve kãdîsına hüküm ki:

Mahrûse-i İstanbul'da vâkı‘ merhûm ve mağfû[run] leh Sultân Süleymân Hân tâbe serâhu evkãfı mütevellîsi el-Hâcc Mehemmed gelüp evkãf-ı merkúm mukãta‘alarından Anafarta-i kebîr mukãta‘asını bin yüz altı senesinde zabt iden Mustafâ nâm kimesne zimmetinde memhûr temessüki mûcebince yetmiş iki bin akçe mâl-ı vakf olup taleb eyledükde virmekde te‘allül ü muhâlefet üzre olduğın bildürüp zimmetinde olan mâl-ı vakf tahsîl olınmak bâbında emr-i şerîfüm recâ itmeğin vech-i meşrûh üzre şer‘le görile diyü yazılmışdur.

Fî evâil-i Ca sene [1]109 [15-24 Kasım 1697]

25/405/1590 Rumelihisarı'nda, Muharrem vakfına ait ev ile bağın aynı yerdeki Yusuf Ağa câmi‘nde imam-hatip olanlara şart edildiğini belirtip zaptetmek isteyen câmi‘imam-hatibi ve bu bağı zapteden şahıs arasındaki ihtilafın ilgili kadılıkta görülmesine dair hüküm.

İstanbul kãimmakãmına ve Galata kãdîsına hüküm ki:

Mahrûse-i Galata'ya tâbi‘ Rûmilihisârı'nda vâkı‘ müteveffâ Yûsuf Ağa binâ eyledüği câmi‘-i şerîfün bi’l-fi‘l imâmı olan İsmâ‘îl nâm kimesne Dergâh-ı mu‘allâma arz idüp Rûmilihisârı'nda vâkı‘ mülk menzile ve bir kıt‘a mülk bâğa mutasarrıf olan Muharrem nâm kimesne zikr olınan menzil ve bâğ tasarrufın teslîme mütevellîsi⁷³ ve tescîl-i şer‘î birle câmi‘-i mezbûrda imâm ve hatîb olanlara vakf ve şart idüp ve bu câmi‘-i mezbûrda imâm ve hatîb olup ber mûceb-i şart-ı vâkıf zabt eylemek istedükde âhardan Resûl nâm kimesne zikr olınan vakf bâğı [zabt](?) ve bu bâbda da‘vâsına muvâfık şeyhülislâmdan fetvâsı olduğın bildürüp fetvâ ve vakfiyye-i ma‘mûlün bihâ mûcebince amel olınup şer‘le görilüp ihkãk-ı hakk olınmak bâbında hükm-i hümâyûnum recâ itmeğin vech-i meşrûh üzre şer‘le görilmek içün yazılmışdur.

Fî evâsıt-ı Ca sene [1]109 [25 Kasım-4 Aralık 1697]

25/411/1610 Kaptan-ı derya Piyale Paşa vakfına ait İstanbul'da Mahmut Paşa yakınında ölüm sebebiyle mahlul kalan Yeni hanın odabaşılığının Dervîş Ahmet'e verildiğinden tarafından zaptına dair hüküm.

İstanbul kãimmakãmına ve kãdîsına hüküm:

Dervîş Ahmed gelüp müteveffâ kapudân-ı sâbık Piyâle Paşa akãrâtından İstanbul'da Mahmûd Paşa kurbında Hân-ı cedîd'ün odabaşılığı Osmân fevtinden mütevellîsi Ahmed tarafından memhûr temessük virilmeğle mûcebince zabtiyçün yazılmışdur.

Fî evâsıt-ı Ca sene [1]109 [25 Kasım-4 Aralık 1697]

25/428/1671 İstanbul'da, Sarı Kethüda Mustafa Paşa câmi‘ evkafından vazifeli olanların, hizmetleri karşılığı hak kazandıkları vazifelerinin ödenmesine dair hüküm.

İstanbul kãimmakãmına ve İstanbul kãdîsına hüküm:

Hâfız Mustafâ ve Hâfız Mehmed nâm kimesneler gelüp mahrûse-i İstanbul'da vâkı‘ müteveffâ Sarı Kethudâ Mustafâ Paşa câmi‘-i şerîfi evkãfından almak üzre yevmî altı akçe vazîfe ile göri(?) ve beş akçe ile ihlâshân ve iki akçe ile huzûrda(?) cüzhân olmalarıyla edâ-yı hıdmet idüp hıdmetleri mukãbelesinde berâtları mûcebince müstahıkk oldukları vazîfelerin taleb eyledükde vakf-ı merkúm mütevellîsi olan (boş) nâm kimesne otuz ve⁷⁴ aydan berü virmeyüp gadr eyledüğin bildürüp ol bâbda hükm-i hümâyûnum recâ eyledükleri ecilden Küçük evkãf defterlerine nazar olındukda vech-i meşrûh üzre olduğı mastûr u mukayyed bulınmağın hıdmetleri mukãbelesinde müstahıkk oldukları vazîfeleri alıvirilmek içün yazılmışdur.

Fî evâsıt-ı Ca sene [1]109 [25 Kasım-4 Aralık 1697]

25/430/1675 İstanbul'da, Topkapı yakınındaki Ahmet Paşa câmi‘ evkafının yeni ve eski mütevellisi arasındaki vakıf malvarlığı hususundaki ihtilafın ilgili kadılıkta görülmesine dair hüküm.

İstanbul'da şeyhülislâm nezâretinde olan evkãf müfettişi vekîline hüküm ki:

Mahrûse-i İstanbul'da Topkapu kurbında vâkı‘ müteveffâ Ahmed Paşa binâ eyledüği câmi‘-i şerîfi evkãfınun mütevellîsi el-Hâcc Mehmed gelüp vakf-ı mezbûrun sâbıkã mütevellîsi İstanbul sâkinlerinden Ahmed nâm kimesne mâl-ı vakfdan üç bin guruşdan ziyâde akçe ekl ü bel‘ ve zâyi‘ ve telef ve istihlâk itmeğle bu dahi şer‘le muhâsebesin görmek istedükde umûr-ı vakfa sarf eyledüm ve muhâsebemi dahi görmem diyü te‘allül ü inâd idüp küllî gadr itmeğle şer‘le muhâsebesi görilüp zimmetinde zuhûr iden mâl-ı vakf vakfiçün alıvirilmek bâbında şer‘le görilmek içün yazılmışdur.

Fî evâsıt-ı Ca sene [1]109 [25 Kasım-4 Aralık 1697]

25/433/1686 İstanbul'da, Seyit Ömer mahallesindeki Hüsameddin Efendi vakfına ait tasarruflarında olan odaların ecr-i misle denk kirasını vermeğe razı olan kiracılar ve ziyade kira talep eden mütevelli arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

İstanbul'da vâkı‘ Seyyid Ömer mahallesinde müteveffâ Hüsâmeddîn Efendi vakfından müteehhilîn odaları müste’cirleri olan Dervîş Mustafâ nâm kimesne ile sâirleri gelüp bunlar icâre-i müeccele ile mutasarrıf oldukları vakf odalarun yedlerinde olan hüccet-i şer‘iyye mûcebince ecr-i misle mu‘âdil icârelerin cânib-i vakfa edâya râzîlar iken hâlâ vakf-ı mezbûr mütevellîsi olan (boş) nâm kimesne kanâ‘at itmeyüp ol hüccete muğãyir ziyâde talebiyle rencîde eyledüklerin bildürüp ziyâde talebiyle rencîde olınmayup men‘ u def‘ olınmak bâbında hükm-i hümâyûnum recâ eyledükleri ecilden hüccet-i şer‘iyyeleri mûcebince amel olınmak içün yazılmışdur.

Fî evâhir-i Ca sene [1]109 [5-14 Aralık 1697]

25/444/1726 Borçlarını bir defada ödeme kudreti olmayan ve İstanbul gümrüğünden aldığı duacı vazifesini alacaklılarına taksit ile ödemeyi taahhüt eden ulemadan Mustafa'nın, alacaklılarınca rencide ettirilmemesine dair hüküm.

İstanbul kãimmakãmına ve kãdîsına hüküm ki:

İstanbul sâkinlerinden ulemâdan Mustafâ gelüp bunun (boş) ve (boş) ve (boş) nâm kimesnelere olan (silik) olup edâda matalı(?) olmayup def‘aten edâya iktidârı olmamağla İstanbul gümrüğ[in]den almak üzre berât-ı şerîfümle mutasarrıf olduğı yevmî yiğirmi akçe du‘âgûy vazîfesini dâyinlerine taksît [ile] edâya ta‘ahhüd itmiş iken dâyinleri kanâ‘at itmeyüp ahz [ü] habs ile rencîde itmeleriyle def‘aten edâya iktidârı olmadığı(?) hilâf-ı şer‘ rencîde itdürmeye diyü hüküm yazılmışdur.

Fî evâhir-i Ca sene [1]109 [5-14 Aralık 1697]

25/452/1758 Şeyh Abdülhayy'ın damadı sulehadan Şeyh Ahmet'e İstanbul'da, Süleymaniye câmi‘ evkafından ilk düşen mahlulden günlük on akçe vazife ve iki aş ekmeği verilmesine dair hüküm.

Mahrûse-i İstanbul'da merhûm ve mağfûrun leh Sultân Süleymân Hân tâbe serâhu câmi‘-i şerîf evkãfı mütevellîsine hüküm ki:

E‘izze-i kirâmdan Şeyh Abdülhayy dâme takvâhunun dâmâdı sulehâdan kıdvetü’s-sulehâi’s-sâlikîn Şeyh Ahmed zîde salâhuhû Dergâh-ı mu‘allâma arz-ı hâl idüp bu talebe-i ulûmdan olup bunun vech-i ma‘âşda zarûreti olmağla evkãf-ı merkúmdan ibtidâ düşen mahlûlden yevmî on akçe vazîfe ve iki aş etmeği ile kendüye virilmek içün arz olınmak bâbında hükm-i hümâyûnum recâ eyledüği ecilden vech-i meşrûh üzre ibtidâ düşen mahlûl-i mezbûrdan virilmek içün yazılmışdur.

Fî evâsıt-ı Ca sene [1]109 [25 Kasım-4 Aralık 1697]

26/16/62 İstanbul'da, Mahmut Paşa câmi‘nde, Hoca Ebubekir vakfından vazifeli cüzhan olan kişi ve bunu öldü gösterip cüzhanlığı üzerine alan kimse ile birikmiş vazifesini ödemeyen diğer kimse arasındaki ihtilafın usulüne göre çözülmesine dair hüküm.

İstanbul kãimmakãmına ve Âstâne'de müfettiş-i evkãf vekîli (boş) zîde ilmuhûya hüküm ki:

İbrâhîm Alî gelüp mahmiyye-i mezbûrda vâkı‘ Mahmûd Paşa câmi‘inde Hâce (...) Ebûbekir vakfından almak üzre yevmî iki akçe vazîfe ile cüzhân olup edâ-yı hıdmet idüp üzerinde iken hilâf-ı inhâ fevt oldı diyü Mehmed Mustafâ alup gadr itmeğle mevti gayr-i vâkı‘ olmağla ibkã ve mukarrer kılınup müceddeden(?) berât ve yedinde olan berâtı mûcebince zabt itdürilüp mezbûr Mehmed'i ve âharı müdâhale itdürmeyüp Nasûh(?) nâm kimesne zimmetinde olan üç sene edâ-yı hıdmet idüp müstahıkk olduğı vazîfesinden müctemi‘ bâkï kalan vazîfesi vakfun müsâ‘adesi kemâlde olmağla alıvirilüp icrâ-yı hakk olınmak bâbında hükm-i hümâyûnum recâ itmeğin vech-i meşrûh üzre şer‘le görilmek içün yazılmışdur.

Fî evâil-i Z sene [1]108 [21-30 Haziran 1690]

26/22/101 Davut Paşa mahallesinde Safiye Hatun'un vakfettiği evin tasarruf nöbeti hususunda Üsküdar'da, Davut Paşa camii imamı ve vakfeden kadının azatlıları evladı iddiasında olan kadın arasındaki ihtilafın ilgili kadılıkta görülmesine dair hüküm.

İstanbul kãimmakãmına ve Üsküdar nâibine hüküm ki:

Medîne-i Üsküdar'da Dâvûd Paşa câmi‘inde imâm olan Şeyh Mehmed arz-ı hâl idüp mukaddemâ Dâvûd Paşa mahallesinde ma‘lûmetü’l-hudûd bir bâb mülk menzile mutasarrıfe olan Safiyye nâm hâtûn menzil-i merkúmun tasarruf ve süknâsın evvelen kendüye ba‘dehû kız karındaşınun evlâd-ı evlâdına ve ba‘de’l-inkırâz mahalle-i mezbûre imâmına şart eyledüği vakfiyye-i ma‘mûlün bihâsında mastûr u mukayyed ve vâkıfe-i mezbûrenün silsilesi(?) münkarız olmağla nevbet-i tasarruf bunun olup utekãsına şart itmiş değil iken ecânibden İsmihân nâm hâtûn vâkıfe-i mezbûrenün utekãsı evlâdıyım diyü hilâf-ı şart-ı vâkıf zabt idüp te‘addî eyledüğin ve bu bâbda bunun yedinde vakfiyye-i ma‘mûlün bihâsı olduğın bildürüp şart-ı vâkıf üzre amel olınup şer‘le alıvirilmek bâbında emr-i şerîfüm recâ şer‘le görilmek içün emr-i şerîf virilmişdür.

Fî evâhir-i Za sene [1]108 [11-20 Haziran 1697]

26/24/112 Üsküdar'da, Mahmut Ağa evkafı mütevellisi ve vakfa olan borçlarını ödemeyen Üsküdar'da sakin kimseler arasındaki ihtilafın ilgili kadılıkta görülmesine dair hüküm.

Üsküdar nâibine hüküm ki:

Üsküdar'da vâkı‘ müteveffâ Mahmûd Ağa evkãfınun bi’l-fi‘l berât-ı şerîfümle mütevellîsi olan Mehmed gelüp kazâ-i mezbûrede sâkin Ahmed ve Çekirge(?) oğlı Mehmed ve Na‘lbend Alî ve Ca‘fer Efendi ve (boş) ve (boş) nâm kimesneler ile Fâtıma nâm hâtûn zimmetinde mütevellîye-i sâbıka (...) dört yüz on iki guruş mâl-ı vakf olup hâlâ vakfiyyeti içün mezbûrlardan taleb eyledükde virmekde te‘allül ü inâd idüp vakfa küllî gadr eyledüğin bildürüp şer‘le görilüp zimmetlerinde zuhûr iden mâl-ı vakf vakfiçün alıvirilmek bâbında şer‘le görilmek içün yazılmışdur.

Fî evâil-i Z sene [1]108 [21-30 Haziran 1697]