Etnik pedaqoji mədəniyyət və «insanın etnomədəniyyəti» anlayışları.
2.2.1. Pedaqoji mədəniyyətin mahiyyəti İstər maddi, istərsə mənəvi sərvətlər yalnız mövcud olduğu dövrün məhsulu deyil, xalqın, eyni zamanda bütün bəşəriyyətin, həmin dövrə qədərki mədəni təcrübəsinin tarixən qazanılmış nailiyyətlərinin əsasında formalaşmış nümunələrdir. Bu təcrübənin uzun inkişaf dövrü keçərək zəmanəmizə qədər gəlib çatması isə öyrənmə və öyrətmə prosesinin, müasir elmi dillə deyilsə, pedaqoji prosesin nəticəsində mümkün olmuşdur.
Mənəvi mədəniyyət xalqın uzun əsrlər boyu toplayaraq, mühafizə etdiyi, ehtiyatda saxladığı enerjidir. Bu enerjidən istifadənin ən sınanmış, aparıcı yolu pedaqoji prosesdir. Mənəvi mədəniyyətin qorunması və inkişafı müvafiq pedaqoji proses olmadan mümkün deyildir. Bu mənada pedaqoji proses mənəvi mədəniyyətin ən əsas atributu olub, xalqın pedaqoji mədəniyyətinin göstəricisi və reallaşmasıdır.
