22.03.2014, saat 17:20
Həsrət qoyma
Hey axtarır qəmli baxan gözlərim,
Həsrət qoyma zülüm çəkən gözünü.
Yanan ocaq, sənə gəlir, sən anla,
Söndürmə gəl ocağının közünü.
Kimsə duymaz sənin sevən qəlbini,
Səndən gələn gül-çiçəyin ətrini.
Bir gözəlin həsrət çəkən xatirini
Sevindirsəm, mənlə görər özünü.
Sabir Binnət, o yazığın özüdür,
Yar həsrəti, dil-ağzının sözüdür.
Vicdanında düz əməlin düzüdür,
Dürüst bilib, gəl dürüst aç gözünü.
22.04.2014, saat 23:45
Bitəydin ürəyimdə
Yaşıl çəmən olaydım,
Uca dağ ətəyində.
Sən bir laləyə dönüb,
Bitəydin ürəyimdə.
30.04.2014, saat 18:10
Üstə
Aşıq olum, sən də saz ol,
Qoy oxuyum, Kərəm üstə.
Sən Əsli ol, mən Sabirəm,
Sinən olsun sinəm üstə.
Dağı-dərəni əzərəm,
Külli-cahanı gəzərəm.
Güllü baxçanı bəzərəm,
Bir nazlı yar, sənəm üstə
Əcəb sevdaya düşmüşəm,
Eşqin şərbətin içmişəm.
Sabir Binnətəm, gəlmişəm,
Bağ-baxçalı çəmən üstə.
Dostları ilə paylaş: |